Archeology and Ethnology

Ծրագրի ուսումնական կառուցամասը բաղկացած է ընդհանուր, մասնագիտական և մասնագիտացման դասընթացների կրթամասերից։ Վերջինս պարունակում է ինչպես պարտադիր, այնպես էլ կամընտրական դասընթացներ։ Ընդհանուր կրթամասը ծառայում է մագիստրոսի որակավորման աստիճանի ընդհանուր հենքի (ընդհանրական գիտելիքներ և կարողություններ) ապահովմանը կամ համալրմանը։ Մասնագիտական կրթամասը կոչված է տվյալ մասնագիտության շրջանակում ապահովելու պահանջվող ընդհանուր գիտելիքներն ու կարողությունները։ Մասնագիտացման կրթամասը ծրագրի անհատականացված ուսուցման մասն է, որը նախատեսված է զարգացնելու խորացված գիտելիքներ, կարողություններ և հմտություններ մասնագիտության որևէ նեղ ասպարեզում։

Ընդունելության պահանջները

«Հնագիտություն և ազգաբանություն» մագիստրոսական ծրագրի ընդունելությունը կատարվում է բանավոր քննությամբ։

Ընդունելության քննության հարցաշարը՝ «Ընդունելություն» բաժնում:

Ծրագրի նպատակը

«Հնագիտություն և ազգաբանություն» մագիստրոսական կրթական ծրագրի նպատակն է ապագա մագիստրոսներին տալ կայուն գիտելիքներ հնագիտության և ազգագրության տեսական հիմնախնդիրների վերաբերյալ: Դասընթացի թեմաները ներկայացվում են հնագիտական և ազգագրական մշակույթների առարկայական հենքի, ինչպես նաև ժամանակակից գիտության տեսական-մեթոդաբանական մոտեցումների հաշվառման հիմքի վրա: Ապագա մագիստրանտները կողմնորոշվելու են հնագիտության և ազգագրության հետազոտական դաշտերում այսօր առկա հիմնական տեսական գրականության և տեսական կառուցումների, ինչպես նաև մեթոդաբանական մոտեցումների մեջ: Նպատակ է դրված բնագավառ առ բնագավառ մատուցելու մասնագիտությունների արդիական խնդիրների հիմնական հետազոտական խնդիրները, լուսաբանելու դրանցից ակնկալվող կոնկրետ գիտական արդյունքի հնարավոր շարքը: Դասընթացը ներկայացնելու է տեսական խնդիրների բոլոր բնագավառները որոշակի պատմամշակութային դարաշրջանների առնչությամբ:

Առավելությունները

Ծրագիրը հաջողությամբ ավարտելու դեպքում շրջանավարտը կունենա մասնագիտության տարբեր հիմնախնդիրներին վերաբերող տեսական, մեթոդաբանական, ինչպես նաև կոնկրետ կիրառական գիտելիք, կտիրապետի մասնագիտությունների հիմնահարցերին առնչվող հնագիտական և ազգագրական, ինչպես նաև հարակից գիտակարգերի և բնագիտական տվյալների ողջ փաթեթին, կիմանա հնագիտության և ազգագրության հիմնական հասկացությունները, գիտական տարբեր դպրոցներում դրանց գործածության առանձնահատկություններն ու տարբերությունները, ծանոթ կլինի հնագիտական և ազգագրական հիմնական դպրոցներին, տեսական հնագիտության և ազգագրության զարգացման հիմնական փուլերին, կկողմնորոշվի հնագիտություն, ազգագրություն, պատմություն, մշակույթ ասպարեզների փոխադարձ առնչություններում:

Պրակտիկան նախատեսված է 3-րդ կիսամյակում։ Պրակտիկայի անցկացման վայրն ընտրում են կրթական ծրագրի ղեկավարը և գիտական ղեկավարը՝ կախված մագիստրոսական թեզի թեմայից։

Կարիերայի հնարավորությունները

Կրթությունը հնարավոր է շարունակել ԵՊՀ ասպիրանտուրայում (առկա և հեռակա), ՀՀ ԳԱԱ հնագիտության և ազգագրության ինստիտուտի ասպիրանտուրայում (առկա և հեռակա), արտերկրի մի շարք համալսարաններում։

Մագիստրոսի որակավորում ստացած մասնագետները կկարողանան աշխատանքի անցնել ՀՀ ԳԱԱ հնագիտության և ազգագրության ինստիտուտում, «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ում, Պատմամշակութային ժառանգության գիտահետազոտական կենտրոնում, մասնագիտական լաբորատորիաներում, պետական կառավարման համակարգում (նախարարություններ, գերատեսչություններ), մարզպետարաններում, համայնքապետարաններում, թանգարաններում, զբոսաշրջային ու այլ կազմակերպություններում: