Child Psychology and Psychotherapy

Ընդունելության պահանջները

Մանկական հոգեբանություն և հոգեթերապիա կրթական ծրագրի ընդունելությունն իրականացվում է բանավոր քննությամբ՝ «Հոգեբանություն» քննական առարկայից (հարցաշարը՝ Ընդունելություն բաժնում)։

Ծրագրի նպատակը

Ծրագրի նպատակն է նախապատրաստել մանկական հոգեբանության և հոգեթերապիայի ոլորտում տեսամեթոդաբանական և կիրառական խնդիրներով զբաղվող մասնագետներ, որոնք ունակ կլինեն.

• ուսումնասիրելու երեխայի զարգացման օրինաչափությունները, նոր մոտեցումները,
• ուսումնասիրելու երեխայի զարգացման առանձնահատկությունները՝ կրթության ոլորտում բարելավումներ իրականացնելու համար,
• կազմակերպելու հոգեբանական աջակցության ծառայություն՝ իրականացնելով հոգեախտորոշիչ, հոգեկարգավորիչ և զարգացնող աշխատանք երեխայի զարգացման տարբեր փուլերում, ինչպես նաև կազմակերպելով խորհրդատվական և հոգեթերապևտիկ աշխատանքներ զարգացման, հոգեբանական, վարքային և հուզական, ընտանեկան դժվարություններ ունեցող երեխաների և դեռահասների հետ:

Առավելությունները

Ծրագրի շրջանավարտն ունակ կլինի.

1. ներկայացնելու հիմնարար գիտելիք տարիքային տարբեր փուլերում զարգացման առանձնահատկությունների, գործընթացների և օրինաչափությունների վերաբերյալ,
2. սահմանելու մանկական հոգեբանության ժամանակակից տեսությունները և մեթոդաբանական հիմքերը,
3. ներկայացնելու երեխաների և դեռահասների հետ հոգեախտորոշիչ և հոգեշտկող աշխատանքի իրականացման սկզբունքները և մեթոդները,
4. բնութագրելու խորհրդատվական և հոգեթերապևտիկ աշխատանքի իրականացման սկզբունքները և առանձնահատկությունները տարբեր հոգեբանական դժվարությունների դեպքում,
5. սահմանելու զարգացման խանգարումների առաջացման գործոնները և աշխատանքի առանձնահատկությունները,
6. նախագծելու մանկական հոգեբանության ժամանակակից հիմնախնդիրներին վերաբերող հետազոտական կիրառական ծրագրեր,
7. ուսումնասիրելու երեխայի զարգացման առանձնահատկությունները սոցիալ-մշակութային գործոնների ներքո և վերլուծելու ընտանիքի դերը անձի զարգացման գործընթացում,
8. կիրառելու հոգեախտորոշիչ մեթոդներ ինչպես օրինաչափ զարգացում ունեցող, այնպես էլ ախտաբանական խնդիրներ ունեցող երեխաների և դեռահասների հետ աշխատանքում,
9. կիրառելու հոգեշտկողական և հոգեթերապևտիկ մեթոդները զարգացման տարբեր խնդիրներով երեխաների, դեռահասների և մեծահասակների հետ աշխատանքում,
10. իրականացնելու խորհրդատվական և լուսավորչական աշխատանք (psychoeducation) տարբեր խնդիրների դեպքում՝ թե՛ երեխաների, թե՛ նրանց հետ աշխատող մեծահասակների հետ:

Շրջանավարտների կարիերայի հնարավորությունները

«Մանկական հոգեբանություն և հոգեթերապիա» մագիստրոսական ծրագրի շրջանավարտները կարող են աշխատել որպես՝

• դպրոցական հոգեբան,
• զարգացման հոգեբան,
• մանկան և դեռահասների հոգեբան-խորհրդատու,
• մանկական կլինիկական հոգեբան,
• ընտանեկան հոգեբան:

Շրջանավարտները կարող են աշխատել հետևյալ հաստատություններում.

• հիմնական և ավագ դպրոցներ,
• հատուկ ծրագրով ուսուցմամբ կրթական հաստատություններ,
• զարգացման խանգարումներ ունեցող երեխաների հատուկ դպրոցներ,
• մանկական խնամքի և պաշտպանության կենտրոններ,
• մանկական վերականգնողական հաստատություններ,
• հոգեբանական ծառայության կենտրոններ,
• մասնագիտական կողմնորոշման կենտրոններ։

Ծրագրով նախատեսված գիտելիքները և կարողությունները հնարավորություն են տալիս շրջանավարտներին վերոնշյալ հաստատություններում իրականացնելու անհատական և (կամ) խմբային խորհրդատվական, զարգացնող, հոգեախտորոշիչ և հոգեկանխարգելիչ աշխատանքներ։ Նրանք կարող են իրականացնել ծնողավարման և ընտանեկան խորհրդատվություն, ինչպես նաև կատարել հոգեբանական գնահատման և վերականգնողական աշխատանքներ տարբեր հաստատություններում։

Ծրագիրը հնարավորություն է ընձեռում իր շրջանավարտներին անցկացնելու մասնավոր պրակտիկա երեխաների և դեռահասների հետ։

Ծրագրի շրջանավարտները հնարավորություն ունեն ուսումը շարունակելու ԵՊՀ փիլիսոփայության և հոգեբանության ֆակուլտետի ասպիրանտուրայում: