Ս.թ. հոկտեմբերի 31-ից նոյեմբերի 2-ը տեղի ունեցավ Խաչատուր Աբովյանի անհետացման 175-րդ տարելիցին նվիրված հայագիտական հանրապետական գիտաժողով։ Այն մեկնարկեց ՀՀ ԳԱԱ Մանուկ Աբեղյանի անվան գրականության ինստիտուտում, շարունակվեց Երևանի պետական համալսարանում և իր տրամաբանական ավարտն ունեցավ Խաչատուր Աբովյանի տուն-թանգարանում։ Եռօրյա բոլոր նիստերն էլ անցան գիտական պատշաճ մակարդակով․ կարդացվեցին լրջմիտ զեկուցումներ, տարբեր դիտանկյուններից արժևորվեց հայ նոր գրականության հիմնադրի գրական ժառանգությունը, մեկ անգամ ևս փաստվեցին հայոց մեծագույն և ամենաողբերգական զավակներից մեկի՝ Խաչատուր Աբովյանի ստեղծագործության վերժամանակյա բնույթն ու խորը արդիականությունը։
![](/sites/default/files/styles/large_half_text/public/2023-11/20231101_133918.jpg?itok=whU6eA0i)
Գիտաժողովի երկրորդ նստաշրջանը կայացավ նոյեմբերի 1-ին Երևանի պետական համալսարանի հայ բանասիրության ֆակուլտետում։ Բացելով գիտական նստաշրջանը՝ ֆակուլտետի դեկան, դոցենտ Արշալույս Գալստյանը ողջույնի ջերմ խոսք ասաց նիստի մասնակիցներին և համառոտ բնութագրեց Խաչատուր Աբովյանի կյանքն ու գործը։
Այնուհետև ակադեմիկոս Հր․ Թամրազյանի անվան հայ գրականության պատմության և գրականության տեսության ամբիոնի վարիչ, պրոֆեսոր Ալ․ Մակարյանը հանգամանորեն ներկայացրեց «Վերք Հայաստանի․ Ողբ հայրենասիրի» պատմավեպի խորհուրդն ու ներքին շերտերը՝ այդ համատեքստում շեշտադրելով աբովյանական իմաստուն դասերը։
![](/sites/default/files/styles/large_half_text/public/2023-11/fb_img_1699013070630_1.jpg?itok=hp_Wj64Z)
Ուշագրավ էր նաև հայ նորագույն գրականության և գրաքննադատության ամբիոնի վարիչ, դոցենտ Ս․ Գրիգորյանի՝ «Շարլոտտա Շուլցի կերպարը Խ․ Աբովյանի «Դորպատյան օրագրերում» և Ե․ Չարենցի «Դեպի լյառը Մասիս» պոեմում» թեմայով զեկուցումը։
![](/sites/default/files/styles/large_half_text/public/2023-11/20231101_115728.jpg?itok=86m7LK03)
Բանասիրության դոկտոր Ս․ Հովհաննիսյանի ելույթը նվիրված էր Խ. Աբովյանի գրապատմական դերի արժևորման թումանյանական ուղուն։ Ելույթ ունեցան նաև դոցենտներ Ն․ Դիլբարյանը, Ս․ Սրապիոնյանը, Ա․ Ափինյանը, բանասիրության թեկնածուներ Ն․ Սարգսյանը, Ա․ Սողոյանը և Խ․ Աբովյանի տուն-թանգարանի հանրահռչակման բաժնի վարիչ Ա․ Ստամբոլցյանը։
Եռօրյա գիտաժողովի ընթացքում ընթերցված զեկուցումներն անուրանալի ներդրում են գրականագիտության մեջ և կարող են խթան հանդիսանալ աբովյանագիտության հետագա զարգացման համար։
![](/sites/default/files/styles/large_half_text/public/2023-11/fb_img_1699013055915.jpg?itok=12zOLI_x)
![](/sites/default/files/styles/large_half_text/public/2023-11/fb_img_1699013061894_1.jpg?itok=2BNYJt-X)
![](/sites/default/files/styles/large_half_text/public/2023-11/fb_img_1699013066096.jpg?itok=S1uPi_Oq)
![](/sites/default/files/styles/large_half_text/public/2023-11/fb_img_1699013085732.jpg?itok=cOE5SlbS)
![](/sites/default/files/styles/large_half_text/public/2023-11/fb_img_1699013089630.jpg?itok=lBuAUQ4n)
![](/sites/default/files/styles/large_half_text/public/2023-11/20231101_142332.jpg?itok=PftAbjjJ)