DAYS OF FRANCOPHONIE AT YSU

Երևանի պետական համալսարանը՝ որպես ֆրանսերենի և ֆրանսիական գրականության վերաբերյալ համակողմանի գիտելիքներ տրամադրող բուհ, յուրաքանչյուր տարի հայտարարում է Ֆրանկոֆոնիային նվիրված միջոցառումների երկամսյակ, ինչը նպատակ ունի խթանելու ֆրանսերենի, ֆրանսիական մշակույթի, Ֆրանկոֆոնիայի գաղափարների տարածումը, ինչպես նաև ընդլայնելու ֆրանսիախոս ազգերի միջև կապն ու համագործակցությունը:

Ֆրանկոֆոնիայի երկամսյակի միջոցառումների բացման արարողության ընթացքում անդրադարձ կատարվեց հայ-ֆրանսիական հարաբերություններին, ԵՊՀ-ում ֆրանսերենին և ֆրանսիական գրականությանն առնչվող կրթական ծրագրերին, Ֆրանսիայի բուհերի հետ գործակցությանը, որից հետո ներկայացվեց Ռայմոն Քենոյի երկի հիման վրա ստեղծված բեմադրությունը:

Միջոցառմանը ներկա էին ԵՊՀ եվրոպական լեզուների և հաղորդակցության ֆակուլտետի պրոֆեսորադասախոսական կազմի ներկայացուցիչներ, ուսանողներ, Հայաստանում Ֆրանսիայի դեսպանության աշխատակիցներ, Ֆրանսիայի համալսարանների դասախոսներ և այլք:

Նշենք, որ Ֆրանկոֆոնիայի երկամսյակի ընթացքում անցկացվելու են գիտական և մշակութային մի շարք միջոցառումներ՝ գրքերի քննարկումներ, շնորհանդեսներ, հանդիպումներ (նաև առցանց ձևաչափով), ԵՊՀ ֆրանսիական բանասիրության ամբիոնի պրոֆեսորադասախոսական կազմի ներկայացուցիչների մասնագիտական վերապատրաստումներ Ֆրանսիայի բուհերի դասախոսների կողմից և այլն: