March 30, 2022 | 17:10
Կրթություն
Գիտություն
ԵՐԵՎԱՆԻ ՊԵՏԱԿԱՆ ՀԱՄԱԼՍԱՐԱՆԻ ՀՅՈՒՐՆ Է ՊՐՈՖԵՍՈՐ ԼԵՈՆԻԴ ՄԱՐԳՈԼԻՍԸ
ԵՊՀ կենսաբանության ֆակուլտետն այսօր հյուրընկալել է ԱՄՆ առողջության ազգային ինստիտուտի լաբորատորիայի ղեկավար, Մոսկվայի պետական համալսարանի պրոֆեսոր Լեոնիդ Մարգոլիսին: Պրոֆեսորը ծանոթացավ լաբորատորիաներին, այնտեղ տարվող գիտական աշխատանքներին, հանդիպեց ֆակուլտետի գիտաշխատողների և դասախոսների հետ:
Կենսաբանության գիտահետազոտական ինստիտուտի տնօրեն Ալեքսանդր Եսայանը կարևորում է նման հանդիպումները. «Մեր ֆակուլտետը պատրաստ է օգտագործելու ցանկացած այսպիսի հնարավորություն: Ըստ իս՝ տարբեր երկրների առաջատար գիտնականների հետ մշտական կապի և շփման մեջ պետք է լինեն և՛ պրոֆեսորադասախոսական կազմը, և՛ ուսանողները»:
Կենսաքիմիայի, մանրէաբանության և կենսատեխնոլոգիայի ամբիոնի վարիչ Աննա Փոլադյանն ասաց, որ կարևորում է հետագա համագործակցությունը և կապի պահպանումը դասախոսների ու գիտնականների միջև, որը հնարավոր է իրականացնել այսպիսի հանդիպումների շնորհիվ:
Տեղեկացնենք, որ վաղը՝ մարտի 31-ին՝ ժամը 14:30-ին, ԵՊՀ կենսաբանության ֆակուլտետի դահլիճում պրոֆեսոր Մարգոլիսը դասախոսելու է «ՁԻԱՀ–ից մինչև COVID. էլ ի՞նչ է պետք իմանալ համաճարակների տարածումը կանխելու համար» թեմայով:
