May 18, 2022 | 16:46
Կրթություն
Ուսանողական
ԵՊՀ-ՈՒՄ ԿԱՅԱՑԱՎ «ՀԵՔԻԱԹԸ ՀԱՄԱՇԽԱՐՀԱՅԻՆ ՄՇԱԿՈՒԹԱՅԻՆ ՀԱՄԱՏԵՔՍՏՈՒՄ» ԽՈՐԱԳՐՈՎ ԳԻՏԱԺՈՂՈՎ
ԵՊՀ հայ բանասիրության ֆակուլտետում կայացավ «Հայկական հեքիաթը համաշխարհային մշակութային համատեքստում» խորագրով գիտաժողով, որի ընթացքում ներկայացված զեկույցների թեմաները հիմնականում վերաբերում էին հայկական ժողովրդական հեքիաթներին, դրանց թարգմանություններին և գրական մշակումներին։ Գիտաժողովի ընթացքում ներկայացված զեկուցումները լույս կտեսնեն հոդվածների ժողովածուի տեսքով:
Գիտաժողովին բացման խոսքով հանդես եկավ ֆակուլտետի դեկան, բ.գ.դ., պրոֆեսոր Արծրուն Ավագյանը. «Ժողովրդական հեքիաթները մեր շատ ու շատ գրողներին ստեղծագործական նյութ են մատակարարել: Ժողովրդական այդ ստեղծագործությունները հաճախ դարձել են անհատական գրական գլուխգործոցներ: Մտաբերեցի այն միտքը, որ ամեն մարդ այնքան ազնիվ է, որքան հեքիաթ ունի իր մեջ»,- ասաց պրոֆեսորը:
ԵՊՀ ուսումնական գծով պրոռեկտոր Էլինա Ասրիյանը ներկայացրեց «Հեքիաթը՝ որպես անձի առաջնային պատկերացումների ձևավորման աղբյուր» թեմայով զեկույց:
«Ես ուսումնասիրում եմ այս թեման՝ սկսած 2002 թվականից, երբ առաջին անգամ մագիստրոսական թեզս նվիրեցի հեքիաթների և միֆերի վերլուծությանը: Այնուհետև սա վերածվեց թեկնածուական ատենախոսության, որի հիմքն էին հեքիաթը, միֆը, առասպելը: Այսօր ես կներկայացնեմ փոքրիկ հատված իմ բազմաթիվ հետազոտություններից, որոնք վերաբերում են հեքիաթի, էպոսի, առասպելի վերլուծությանը և հետազոտությանը»,- ասաց Է. Ասրիյանը և հույս հայտնեց, որ հեքիաթի ֆենոմենի հետազոտմանն ու քննարկմանը նվիրված գիտաժողովները կունենան պարբերական բնույթ, ավելի կմեծանա մասշտաբը, և հետագայում կիրականացվի միջազգային գիտաժողով:
Գիտաժողովի ընթացքում ներկայացված զեկույցներում հեքիաթը ներկայացվում է գրականագիտության, հոգեբանության, բանագիտության և թարգմանչական խնդիրների քննությամբ, դիտարկվում են այնպիսի խնդիրներ, ինչպիսիք են անձի ձևավորման վրա հեքիաթի ունեցած դերը, ժողովրդական հեքիաթի առասպելական-այլաբանական շերտերը, հեքիաթների գրական մշակումները արևմտահայ գրողների ստեղծագործություններում, հայկական թարգմանական հեքիաթը և Թումանյանի անձնական գրադարանում պահվող թարգմանված հեքիաթների նմուշները, հանրահայտ «Մոխրոտը» հեքիաթի հայկական մշակումները:
Հայ բանասիրության ֆակուլտետի՝ ակադ. Հր․ Թամրազյանի անվան հայ գրականության պատմության ամբիոնի կազմակերպած գիտաժողովին մասնակցում էին ԵՊՀ, ՀՀ ԳԱԱ հնագիտության և ազգագրության ինստիտուտի, Մ. Աբեղյանի անվան գրականության ինստիտուտի, Հովհաննես Թումանյանի թանգարանի ներկայացուցիչներ:
