ՕՏԱՐԵՐԿՐՅԱ ՈՒՍԱՆՈՂՆԵՐԸ ԵՊՀ-ՈՒՄ ՄԱՍՆԱԿՑԵԼ ԵՆ ՓՈՐՁԱԳԻՏԱԿԱՆ ՀԱՆԴԻՊՄԱՆ

ԵՊՀ միջազգային համագործակցության վարչության և ԵՊՀ ամերիկյան հետազոտությունների կենտրոնի համատեղ նախաձեռնած հանդիպման բանախոսության թեմաները վերաբերում էին ԱՄՆ քաղաքական կյանքի տարբեր բնագավառներին (արտաքին քաղաքականություն, էներգետիկա, ԱՄՆ-ԵՄ, ԱՄՆ-Հարավկովկասյան տարածաշրջան փոխհարաբերություններ և այլն):

Հանդիպման շրջանակում ԵՊՀ միջազգային համագործակցության վարչության պետ, ք.գ.դ., պրոֆեսոր Ալեքսանդր Մարգարովը ներկայացրել է ԵՊՀ պատմությունը, գիտական և հետազոտական ներուժը, ինչպես նաև ԵՊՀ գործունեության հիմնական ուղղությունները և փորձագիտական ու մասնագիտական կարողությունների զարգացման հեռանկարային հնարավորությունները:

ԵՊՀ ամերիկյան հետազոտությունների կենտրոնի տնօրեն, պ.գ.թ., դոցենտ Վահագն Ագլյանը, խոսելով արտաքին քաղաքականության տեսահայեցակարգային մոտեցումներից, նշել է, որ համաշխարհային արդի իրողությունների պայմաններում միջազգային կազմակերպությունների դերակատարությունը պետք է աճ գրանցի:

Բանախոսը խոսել է նաև միջազգային հարաբերությունների արդի համակարգը երեք պարբերաշրջանների (հետխորհրդային տարածաշրջան-ԵՄ-գլոբալ աշխարհակարգ) տեսքով ներկայացնելու հնարավորության մասին։

ԵՊՀ ամերիկյան հետազոտությունների կենտրոնի հետազոտող, պ.գ.թ., դոցենտ Բենիամին Պողոսյանի բանախոսության շրջանակն ընդգրկել է Հարավկովկասյան տարածաշրջանում տիրող իրավիճակը, մասնավորապես ՀՀ հարաբերությունները հարևան պետությունների հետ:

ԵՊՀ ամերիկյան հետազոտությունների կենտրոնի հետազոտող Նորա Գևորգյանը, անդրադառնալով ՀՀ-ԵՄ հարաբերություններին, մասնավորապես Արևելյան գործընկերության շրջանակում,  նշել է համագործակցության երկուստեք կարևոր դրդապատճառները:

ԵՊՀ ամերիկյան հետազոտությունների կենտրոնի հետազոտող Տիգրան Սարգսյանը ներկայացրել է եվրոպական էներգետիկ անվտանգության խնդիրը ԱՄՆ էներգետիկ քաղաքականության համատեքստում:

Բանախոսը մասնավորապես նշել է, որ էներգետիկ անվտանգության տեսանկյունից կարևոր է էներգետիկ աղբյուրների տարատեսականացումը, չվերականգնվող ռեսուրսների ռացիոնալ սպառումը և վերականգնվող բնական պաշարների սպառման ծավալների տեսակարար կշռի ավելացումը, էներգետիկ կախվածության նվազեցումը:

Հանդիպումն ավարտվել է մասնագիտական բուռն քննարկմամբ: