YSU students are the winners of the quarter-finals of the "ICPC" International Programming Olympiad
ԵՊՀ ինֆորմատիկայի և կիրառական մաթեմատիկայի ֆակուլտետում անցկացվեց «ICPC» ծրագրավորման միջազգային օլիմպիադայի քառորդ եզրափակիչ փուլը, որին մասնակցած ԵՊՀ-ն ներկայացնող 4 թիմեր գրանցեցին տպավորիչ արդյունքներ՝ ձեռք բերելով մրցույթի կիսաեզրափակիչ փուլի ուղեգիր։
![](/sites/default/files/styles/large_slide/public/2023-11/00.jpg?h=11458ba0&itok=DmLS6Y7b)
![](/sites/default/files/styles/large_half_text/public/2023-11/elina_asryan.jpg?itok=Ve-OMdDj)
ԵՊՀ ակադեմիական/ուսումնական հարցերի գծով պրոռեկտոր Էլինա Ասրիյանը, կարևորելով նմանօրինակ միջոցառումները, շնորհավորեց կիսաեզրափակիչ փուլ անցած թիմերին՝ մաղթելով նորանոր հաջողություններ մրցույթի հաջորդ փուլերում. «ԵՊՀ-ն բարձր է գնահատում նմանօրինակ միջոցառումները, քանզի մեծ է ուսանողների դերը մեր երկրի վերաբերյալ պատկերացում կազմելու գործում։ Պատահական չէ, որ Հայաստանի մասին խոսելիս ասում են՝ այստեղ ապրում են մաթեմատիկական կուռ գիտելիքներով զինված մարդիկ»։
![](/sites/default/files/styles/large_half_text/public/2023-11/dowmanyan.jpg?itok=w31_wQxF)
«ICPC» համալսարանական թիմերի ծրագրավորման միջազգային օլիմպիադայի Հայաստանի տարածաշրջանի տնօրեն, ԵՊՀ ինֆորմատիկայի և կիրառական մաթեմատիկայի ֆակուլտետի թվային անալիզի և մաթեմատիկական մոդելավորման ամբիոնի դասախոս, պրոֆեսոր Վահրամ Դումանյանը, ընդգծելով մրցույթի բարդությունն ու միջազգային նշանակությունը, ասաց, որ մասնակցությունը ևս մասնագիտական աճ գրանցելու հնարավորություն է։
![](/sites/default/files/styles/large_half_text/public/2023-11/armen_andreasyan.jpg?itok=ycUTUs4U)
ԵՊՀ ինֆորմատիկայի և կիրառական մաթեմատիկայի ֆակուլտետի ծրագրավորման և ինֆորմացիոն տեխնոլոգիաների ամբիոնի ասիստենտ, ԵՊՀ ծրագրավորման օլիմպիադայի թիմերի մարզիչ Արմեն Անդրեասյանը նշեց, որ մրցույթի քառորդ եզրափակիչ փուլին ԵՊՀ-ն ներկայացել է լավագույնս պատրաստված 11 թիմերով։
«ICPC» ծրագրավորման միջազգային օլիմպիադայի՝ Հայաստանի քառորդ եզրափակիչ փուլին մասնակցում էին 31 մրցութային և 3 արտամրցութային թիմեր 9 համալսարաններից և դպրոցներից:
Նշենք, որ «ICPC»-ն ծրագրավորման ուսանողական միջազգային օլիմպիադա է, որին մասնակցում են շուրջ 3000 համալսարաններից ավելի քան 50 000 ուսանողներ։ ԱՄՆ-ի կողմից կազմակերպվող այս հեղինակավոր մրցույթին ԵՊՀ- ն միացել է 2000 թվականից: ԵՊՀ թիմերին երեք անգամ հաջողվել է անցնել եզրափակիչ փուլ։
Հիշեցնենք, որ ԵՊՀ թիմը 2022 թ. ապրիլին «ICPC» ծրագրավորման միջազգային օլիմպիադայում գրանցել էր աննախադեպ արդյունք՝ արժանանալով բրոնզե մեդալի: