January 31, 2025 | 16:09
Educational programs
International cooperation
Student
Broader outlook through studying abroad: YSU students on unique aspects of YSU and University of Lille
Students from YSU Faculty of Geography and Geology continued their professional studies at the University of Lille (France) under the Erasmus+ program, expanding their knowledge in geology. They shared their motivations for studying abroad, and reflected on the differences in the organization of education and student-professor relationships at YSU and the University of Lille.
Երկրաբանություն մասնագիտության 3-րդ կուրսի ուսանող Ռազմիկ Մակարյանը Լիլի համալսարանում ուսումնասիրել է «Երկրապահպանություն», «Կենսաշերտագրություն», «Գիտական գրություն և հաղորդակցություն», «Երկրաբանական նյութերի բնութագրման մեթոդիկա» և այլ առարկաներ:
Նա տեսական դասընթացներին ու լաբորատոր աշխատանքներին զուգահեռ պրակտիկա է անցել արտերկրում՝ ծանոթանալով երկրաբանական ընդհանուր աշխատանքներին: ՅՈՒՆԵՍԿՕ-ի «Famenne-Ardenne» գլոբալ գեոպարկում այցելել է բնակերտ թունել ու ականատես եղել ստալագմիտների (քարի տեսակ, որն առաջանում է քարայրների հատակին՝ բարձրանալով ստալակտիտների դեմ հանդիման. երբեմն միանալով նրանց՝ առաջացնում են սյուներ) ու ստալակտիկների (քարի տեսակ, որն առաջանում է կալցիումի կարբոնատով հագեցած ջրային կաթիլներից գազերի հեռացման և դրանց գոլորշիացման հետևանքով նստող աղերից. ստալակտիտները կախվում են քարայրների առաստաղներից) առաջացման գործընթացներին:
«Երկրաբանությունը բազմաճյուղ է, ընդգրկում է տարբեր ոլորտներ, և ներկայիս երկրաբանական նմուշները, որոնք կարող են լինել միակը՝ հայտնաբերված տվյալ տարածքից, պետք է պահպանվեն՝ հետագայում տեխնիկայի զարգացմամբ պայմանավորված ավելի լավ ուսումնասիրությունների համար»,- ընդգծեց Ռազմիկ Մակարյանը:
Ռազմիկը ԵՊՀ-ում մեկ կիսամյակ ուսանելուց հետո անցել է զինվորական պարտադիր ծառայության: Դա, սակայն, չի խանգարել նրան, որ վերադառնալուն պես շարունակի կրթությունն ու հարստանա նոր գիտելիքներով. «2020 թվականին ընդունվեցի ԵՊՀ աշխարհագրության և երկրաբանության ֆակուլտետ, ընդամենը մեկ կիսամյակ սովորելուց հետո զինվորակոչվեցի: Ծառայությունս վերջացնելուց հետո որոշեցի, որ պետք է լավ սովորեմ։ 2023 թվականի երկրորդ կիսամյակից շարունակեցի ուսումս: Ցանկանում էի նաև օգտվել ԵՊՀ ընձեռած հնարավորությունից և ուսանել Լիլի համալսարանում, սակայն անհրաժեշտ էր անգլերենի B2 մակարդակի իմացություն: Ուստի սկսեցի խորացնել անգլերենի իմացությունս: Եթե կա հնարավորություն, ապա պետք է փորձել ու հասնել նրան, ինչին ձգտում ես: Նպատակը կար, մնում էր ջանք ու եռանդ չխնայել, ինչն էլ տվեց իր պտուղները»:
Խոսելով կրթության կազմակերպման, ուսանող-դասախոս փոխհարաբերությունների մասին՝ Ռազմիկը շեշտեց. «Դասախոսը գիտելիքին զուգահեռ պետք է ունենա ուսանողակենտրոն աշխատելաոճ, ինչը ԵՊՀ-ում բավական բարձր մակարդակի է: Իսկ ինչ վերաբերում է Լիլի համալսարանին՝ կարելի է ասել՝ հասարակությունից առանձնացված ուսանողական քաղաք է Լիլի ծայրամասում։ Այնտեղ ամեն մի մասնագիտություն ունի իր մասնաշենքը, իր սարքավորումները, բոլոր լսարանները համալրված են անհրաժեշտ գույքով։ Դասերը սկսվում են 8։00-ից: Մեկ դասն առանց դադարի կարող էր տևել մի քանի ժամ, անգամ պատահում էր՝ կեսօրին տրված մեկ ժամ ընդմիջումից հետո դասը ձգվում էր մինչև 20։00-ն. դա իմ կարծիքով չափից շատ ծանրաբեռնող է»։
Շարունակելով համեմատել ԵՊՀ-ն և Լիլի համալսարանը՝ նա ընդգծեց, որ արտերկրի բուհում մեկ դասընթացը դասավանդում էին տարբեր դասախոսներ և ասպիրանտներ. «Ամեն մեկն իրեն հատկացված ժամին ներկայացնում էր իր նյութը։ Թե՛ մասնագետները, թե՛ ուսանողները տիրապետում էին մեկ ուղղության միայն. այլ ոլորտներից հարցեր չէիր կարող տալ, մինչդեռ ԵՊՀ-ում այդպես չէ»:
Լիլի համալսարանում Ռազմիկին տպավորել է նաև այն, որ անգլերենով կազմված կրթական նյութերը և հոդվածները ամեն ամիս թարմացվել են. «Օրինակ՝ ԵՊՀ-ում դեռ կան երկրաբանության ոլորտին վերաբերող խորհրդային ժամանակաշրջանի հաշվարկներ, մինչդեռ աշխարհում, կարելի է ասել, ամեն օր նոր հայտնագործություններ են արվում»,- ասաց նա ու հավելեց, որ Լիլի համալսարանի դրական կողմերից էին գործնական դասընթացների հաճախակի կազմակերպումն ու լաբորատորիաների տեխնիկական հագեցվածությունը:
Մասնագիտական կրթությանը զուգահեռ Ռազմիկը Լիլի համալսարանում մասնակցել է նաև ֆրանսերենի ինտենսիվ դասընթացների, որոնք կազմակերպվել են ֆրանսերենով: Ըստ ուսանողի՝ այս մոտեցումը մի փոքր խոչընդոտում է լեզվի հեշտ յուրացմանը:
Ռազմիկ Մակարյանը նպատակ ունի շարունակաբար զարգացնելու իր գիտելիքները երկրաբանության ոլորտում. «Կցանկանայի հանքարդյունաբերության ոլորտում ղեկավար պաշտոն զբաղեցնել։ Ցանկություն կա նաև ուսումնասիրելու մոլորակագիտություն, տիեզերագիտություն: Հուսամ՝ այս մասնագիտություններն էլ Հայաստանում արագ զարգացում կապրեն»,- եզրափակեց նա։
Աշխարհագրության և երկրաբանության ֆակուլտետի «Քարտեզագրություն և կադաստրային գործ» կրթական ծրագրի մագիստրատուրայի երկրորդ կուրսի ուսանող Սարգիս Սարգսյանը ևս «Էրազմուս+» ծրագրի շրջանակում չորս ամիս սովորել է Ֆրանսիայի Լիլի համալսարանում՝ ուսումնասիրելով «Երկրապահպանություն», «Գեոմատիկա և գեոստատիստիկա, կիրառումը երկրաբանության մեջ», «Պալեոկլիմայագիտություն», «Պալեոմիջավայրի վերակառուցումներ», «Գիտական հաղորդակցություն և գրելու հմտություններ» և այլ ուսումնական առարկաներ:
Սարգիսը նշեց՝ որոշել է օգտվել ԵՊՀ ընձեռած հնարավորությունից, քանի որ ունի բարձր առաջադիմություն, հետաքրքրված է արտասահմանյան կրթական համակարգով և ասպիրանտուրա ընդունվելու նպատակ ունի:
Սարգիսին ևս գրավել է հատկապես այն փաստը, որ Լիլի համալսարանում լսարանները հագեցած են ուսանողների թվին համապատասխան ժամանակակից սարքավորումներով. «Դա ավելի է հեշտացնում գործնական աշխատանքները և ակտիվացնում ուսանողների մասնակցությունը հետազոտություններին։ Հույս ունեմ, որ ԵՊՀ-ն կշարունակի համալրել հատկապես բնագիտական ֆակուլտետների սարքավորումների քանակը»:
Սարգիսն ընդգծեց, որ ինչպես ԵՊՀ-ում, այնպես էլ արտերկրի բուհում դասախոսները պատրաստակամ էին օգնելու ուսանողներին:
Նրա հետաքրքրության շրջանակում է «Հեռազննում և ԱՏՀ տեխնոլոգիաների կիրառումը անտառային տարածքների համար» թեման և վստահ է՝ արտերկրում ձեռք բերած գիտելիքները կօգնեն փորձառու մասնագետ դառնալ։
