Delegation led by chairman of Vietnam’s National Assembly visits YSU to strengthen academic and scientific ties

Yerevan State University hosted a delegation led by Vietnam’s National Assembly Chairman Tran Thanh Man. During the visit, the delegation toured the university, explored the laboratories and infrastructure of the Faculty of Chemistry, and visited YSU-Krisp AI Lab.

ԵՊՀ ռեկտոր Հովհաննես Հովհաննիսյանը, ներկայացնելով համալսարանի հնարավորությունները, ընդգծեց, որ ԵՊՀ-ն Հայաստանի ամենահին և ամենամեծ համալսարանն է։

«Երևանի պետական համալսարանը պատմական կապեր ունի Վիետնամի հետ: Վիետնամից մոտ 100 ուսանողներ տարբեր մասնագիտությունների գծով ուսումնառել են ԵՊՀ-ում՝ սկսած Խորհրդային միության ժամանակաշրջանից: Մենք հուսով ենք, որ Վիետնամի ԱԺ նախագահի՝ Հայաստան, մասնավորապես ԵՊՀ կատարած այցը կվերականգնի մեր կապերը Վիետնամի հետ գիտակրթական, հետազոտական և այլ ուղղություններով»,- ասաց նա:

Վիետնամի Սոցիալիստական Հանրապետության Ազգային ժողովի նախագահ Չան Թան Մանն ընդգծեց, որ ներկայում Հայաստանը և Վիետնամը կառուցում են բարեկամական ամուր կապեր՝ կարևորելով խաղաղության հաստատումն ու բարգավաճումը։

«Կրթության ոլորտում համագործակցություն հաստատելը ևս կարող է կամուրջ դառնալ երկու երկրների միջև՝ նպաստելով գործակցային և բարեկամական կապերի ամրապնդմանը, հարուստ փորձի փոխանակմանը և նոր հորիզոնների նախանշմանը»,- ասաց նա։

Չան Թան Մանը նշեց, որ իրենք բարձր են գնահատում ԵՊՀ տարբեր սերունդների ուսանողների և պրոֆեսորադասախոսական կազմի մեծ ջանքերը նոր հաջողություններ ու ձեռքբերումներ գրանցելու գործում։

«Համալսարանականներն իրենց ներդրումն են ունենում հետազոտության և կրթության ոլորտների զարգացման, ինչպես նաև նորարարության խթանման գործում։ Սա վկայում է այն մասին, որ ԵՊՀ-ն ունի գերազանց մասնագետներ ու գիտնականներ, ինչպես նաև առաջադեմ կրթական համակարգ, որը հիմնված է որակյալ գիտելիքի տրամադրման և միջազգային հարթակում հեղինակության բարձրացման նպատակի վրա»,- մատնանշեց նա։

Չան Թան Մանը հիշատակեց, որ Վիետնամի մի շարք անվանի համալսարաններ, օրինակ, Հանոյի կամ Հո Շի Մինի ազգային համալսարանները, իրենց կրթական համակարգը կառուցել են՝ առաջնահերթություն տալով գիտության, հետազոտության և նորարարության խթանմանը։

«Վիետնամի նշյալ բուհերն ընդգրկվել են մի շարք տեղական և միջազգային վարկանիշավորման հեղինակավոր աղյուսակներում և փոխանակման ծրագրերի ու հետազոտական նախագծերի շրջանակում հաստատել են միջազգային գործընկերային կապեր տարբեր համալսարանների ու կառույցների հետ։ Դիտարկելով երկու երկրների կրթական համակարգերի զարգացման ուղին՝ կարող ենք ասել, որ դրանք բազմաթիվ նմանություններ ունեն։ Ե՛վ հայ ժողովուրդը, և՛ վիետնամցիները մեծ տեղ են տալիս կրթությանը և իրենց գիտելիքով, իմաստությամբ ու տաղանդով պահպանում և զարգացնում ավանդույթը»,- շեշտեց նա։

Չան Թան Մանն այս համատեքստում առաջարկեց ԵՊՀ-ի հետ միասին իրագործել մի շարք ծրագրեր։

«Պետք է զարգացնել ուսանողների, դասախոսների և հետազոտողների փոխանակման ծրագրերը Հայաստանի և Վիետնամի համալսարանների միջև, ինչը կլինի լավագույն հնարավորություն մեր երկրների երիտասարդ սերունդների համար՝ միմյանցից սովորելու և երկու երկրները միմյանց կապող կամուրջ ստեղծելու համար։ Կարող ենք մշակել գիտական և հետազոտական նախագծեր երկուստեք հետաքրքրություն ներկայացնող թեմաների շուրջ։ Հայաստանը մեծ առաջընթաց է գրանցում տեղեկատվական տեխնոլոգիաների, բարձր տեխնոլոգիաների, մաթեմատիկայի և ֆիզիկայի ոլորտներում, որոնց Վիետնամում նույնպես մեծ ուշադրություն է դարձվում՝ նպաստելով դրանց զարգացմանը»,- ասաց նա ու հավելեց, որ համատեղ կարող են իրականացնել բարձրագույն կրթության կառավարման և որակի ապահովման փորձի փոխանակում և մշակել կրթական ծրագրեր, որոնք կհամապատասխանեն թվային դարաշրջանի միջազգային չափանիշներին և աշխատաշուկայի պահանջներին։

ԵՊՀ ռեկտոր Հովհաննես Հովհաննիսյանը, ի պատասխան Չան Թան Մանի առաջարկներին, շեշտեց, որ ԵՊՀ-ն պատրաստ է համագործակցելու նշված ուղղություններով, և հույս հայտնեց, որ Հայաստան կատարած հաջորդ այցին արդեն իսկ կլինեն համագործակցության տեսանելի արդյունքներ։

Հանդիպման ավարտին Հովհաննես Հովհաննիսյանը Վիետնամի Սոցիալիստական Հանրապետության Ազգային ժողովի նախագահ Չան Թան Մանին նվիրեց ԵՊՀ 100-ամյակին նվիրված հուշամեդալ, ինչպես նաև ԵՊՀ Իջևանի մասնաճյուղի կիրառական արվեստի ֆակուլտետի աշխատակիցների պատրաստած կտավը, իսկ Չան Թան Մանը ԵՊՀ ռեկտորին նվիրեց Վիետնամի առաջին համալսարանի ձեռակերտ պատկերը: