ՈՒՍԱՆՈՂՆԵՐԸ ԾԱՆՈԹԱՑԵԼ ԵՆ ՓԱԽՍՏԱԿԱՆՆԵՐԻ ԻՐԱՎՈՒՆՔՆԵՐԻ ՊԱՇՏՊԱՆՈՒԹՅԱՆ ԱՌԱՆՁՆԱՀԱՏԿՈՒԹՅՈՒՆՆԵՐԻՆ. ԱՆՑԿԱՑՎԵԼ Է «ՓԱԽՍՏԱԿԱՆՆԵՐԻ ԻՐԱՎՈՒՆՔ» ԽՈՐԱԳՐՈՎ ԴՊՐՈՑԸ

Արդեն 10-րդ տարին կազմակերպվող «Փախստականների իրավունք» դպրոցի նպատակն է խթանել փախստականների իրավունքների պաշտպանության ոլորտում կլինիկական կրթության զարգացումն ու հանրապետության տարբեր բուհերի իրավաբանական կլինիկաների միջև սերտ համագործակցությունը:

Մեզ հետ զրույցում ԵՊՀ իրավաբանական կլինիկայի տնօրեն Քնարիկ Վարդանյանն ասաց, որ դպրոցի շնորհիվ ապագա իրավաբանները գիտելիքներ և փորձ են ստանում ՄԱԿ ՓԳՀ-ում, ՀՀ միգրացիոն ծառայությունում, դատական համակարգում, փաստաբանական և ակադեմիական ոլորտում գործունեություն ծավալող մասնագետների կողմից։

Եռօրյա դպրոցին մասնակցել են Հայաստանի տարբեր մարզերում գործող իրավաբանական կլինիկաների մոտ երեսուն ներկայացուցիչներ, այդ թվում՝ ԵՊՀ, Երևանի «Գլաձոր», Գավառի պետական և Գյումրու «Պրոգրես» համալսարանների իրավաբանական կլինիկաների ուսանողներ։

«Եռօրյա դասընթացի ժամանակ ուսանողների ուշադրությանն են ներկայացվել փախստականների պաշտպանության ոլորտի տարաբնույթ թեմաներ, ներառյալ՝ փախստականների միջազգային իրավական պաշտպանության ձևավորման պատմությունը, փախստականի կարգավիճակի ներառման, բացառման և դադարեցման հիմքերը, փախստականների միջազգային պաշտպանության հիմնարար սկզբունքները, ապաստան հայցողների և փախստականների հիմնական իրավունքներն ու պարտականությունները և այլն։ Ուսանողները ծանոթացել են նաև ՀՀ միգրացիոն ծառայության կողմից իրականացվող ապաստանի որոշման ընթացակարգերին»,- նշեց Քնարիկ Վարդանյանը։

Նրա տեղեկացմամբ, ուսանողներին տրամադրվող տեսական նյութը համալրված էր մի շարք գործնական վարժություններով, հարցուպատասխանով և քննարկումներով։

Դպրոցի ավարտին ուսանողների համար կազմակերպվել է արդեն ավանդույթ դարձած շրջայց դեպի Տավուշի մարզի Գոշ գյուղ, որտեղ գտնվում է հայ գիտնական, մանկավարժ, առակագիր, օրենսգիր, «Գիրք Դատաստանի» երկի հեղինակ, վարդապետ Մխիթար Գոշի կողմից 12-րդ դարում հիմնադրված՝ մշակույթի, կրոնի և կրթության նշանավոր կենտրոն Գոշավանքը:

Քնար Միսակյան