ԳԱՂԱՓԱՐԸ ԲԻԶՆԵՍԻ ՎԵՐԱԾԵԼՈՒ ՆՈՐ ՀՆԱՐԱՎՈՐՈՒԹՅՈՒՆ ՈՒՍԱՆՈՂՆԵՐԻ ՀԱՄԱՐ
ԵՊՀ գիտխորհրդի նիստերի դահլիճում ՀՀ բարձր տեխնոլոգիական արդյունաբերության նախարարի տեղակալ Դավիթ Սահակյանը ուսանողներին ներկայացրեց «Գաղափարից մինչև բիզնես» դրամաշնորհային ծրագրի մանրամասները:
![a-new-opportunity-for-students-to-turn-an-idea-into-a-business](/sites/default/files/styles/large_slide/public/migrated/images/OCcKru8xR3ZxwEtMpMUVS1k6df.jpg?h=bccd1fa5&itok=-pk6fGt4)
Ծրագրի նպատակն է ֆինանսավորման միջոցով աջակցել շուկայում բարձր տեխնոլոգիաների ոլորտի՝ գաղափարի և (կամ) արդեն իսկ զարգացման փուլում գտնվող արտադրանքի առաջխաղացմանը: Ծրագիրը բաղկացած է երկու փուլից՝ «Գաղափարի փուլ» (մինչև 5 մլն ՀՀ դրամ ֆինանսավորում, ընդհանուր՝ 150 մլն ՀՀ դրամ) և «Մուտք դեպի շուկա» (մինչև 10 մլն ՀՀ դրամ ֆինանսավորում, ընդհանուր՝ 200 մլն ՀՀ դրամ):
Դավիթ Սահակյանի խոսքով՝ ՀՀ բուհերում առկա է տեխնոլոգիական մեծ ներուժ, սակայն դրանք բիզնեսում կիրառելու հմտությունները զարգացած չեն:
Նախարարի տեղակալը, անդրադառնալով ոլորտի զարգացմանն ուղղված հետագա ծրագրերին, նշեց․ «Նպատակ ունենք բուհերի հետ համագործակցության շրջանակում տարբեր ֆակուլտետների կրթական ծրագրերում տեխնոլոգիական ձեռներեցությանն առնչվող նոր առարկա ներդնելու: Այն ուսանողներին հնարավորություն կտա տեսական գիտելիքները բիզնեսում կիրառելու հմտություններ ձեռք բերելուն, կզարգացնի ստեղծարար մտածելակերպը և կնպաստի սեփական բիզնեսի առաջխաղացմանը»:
Հանդիպման ավարտին ներկաները տվեցին իրենց հետաքրքրող հարցերը և ստացան սպառիչ պատասխաններ: