Public Policy

«Հանրային քաղաքականություն» մագիստրոսական կրթական ծրագիրը ԵՊՀ-ում գործարկվում է՝ սկսած 2016 թվականից։ Այն մշակվել և ներդրվել է ԵՊՀ երկարամյա գործընկեր Արիզոնայի պետական համալսարանի հետ համագործակցության շրջանակում։

Ընդունելության պահանջները

Հանրային կառավարման մասնագիտությամբ դիմորդների ընդունելությունն անցկացվում է առանց քննությունների, իսկ հարակից մասնագիտություններով դիմորդները հանձնում են «Հանրային կառավարում» մասնագիտության բակալավրի ավարտական ամփոփիչ քննություն:

Ծրագրի նպատակը

Առաջարկվող մասնագիտական կրթական ծրագիրն ունի բազմագիտակարգային բնույթ: Այն արտացոլում է ինչպես միջազգային, այնպես էլ հայաստանյան իրականության մեջ կառավարման և հանրային քաղաքականության մասնագիտական ոլորտներում առկա միտումները, աշխատաշուկայի պահանջներն ու պետական կառավարման և քաղաքականության իրագործման ասպարեզներում երկարաժամկետ, տիրապետող գերակայությունները։

Մագիստրոսական ծրագրի հիմնական առավելությունը, բացի նորարարական ուսումնական ծրագրերից և վերլուծական պարտադիր բաղադրիչի առկայությունից, նաև այն է, որ դասավանդումը կամընտրական առարկաների մի մասի համար նախատեսվում է իրականացնել անգլերենով: Մագիստրոսական ծրագիրը ներառում է նաև ոչ պետական (շահույթ չհետապնդող) հատվածի մենեջմենթի և պետական կարգավորման հետ կապված մի շարք մոդուլների դասավանդում:

Շրջանավարտների կարիերայի հնարավորությունները

Մագիստրոսական ծրագրի շրջանավարտները կարող են աշխատանքի անցնել հանրային (պետական) քաղաքականության մշակման և վերլուծության բնագավառում, մասնավորապես`

1. ՀՀ գործադիր և օրենսդիր իշխանության մարմիններում,

2.միջգերատեսչական համակարգման գործառույթներ իրականացնող պետական մարմիններում (հանձնաժողովներ, գործակալություններ),

3.կառավարության կառուցվածքային ստորաբաժանումների, նախարարությունների ոլորտային/պրոֆիլային վարչություններում (քաղաքականության կամ ծրագրերի պատրաստում, իրականացում, մշտադիտարկում, տվյալների բազաների հետ աշխատանք),

4. ոչ պետական հատվածի կարգավորման և կառավարման ոլորտներում: