February 23, 2024 | 14:49
Science
Research
Student
I have been attracted by mathematics since school, and the university made me strongly attached to science – YSU postgraduate student
Arman Bayramyan, a postgraduate student at the Chair of Algebra and Geometry of YSU Faculty of Mathematics and Mechanics is one of the winners of the "Research Assistance Program for Young Applicants and PhD Students - 2023" announced by the Higher Education and Science Committee of RA MoESCS.
Մեզ հետ զրույցում երիտասարդ հետազոտողը պատմեց տեսական մաթեմատիկայի զարգացման հեռանկարների, ուսումնասիրության արդիականության, ԵՊՀ գիտական միջավայրի մասին:
- Արմա՛ն, ներկայացրե՛ք, խնդրեմ, Ձեր հետազոտությունը:
- «Անվերջ պարբերական խմբեր և հավանականային նույնություններ խմբերի մեջ» թեմայով ուսումնասիրությունս վերաբերում է հանրահաշվի ենթատեսություններից մեկին՝ խմբերի տեսությանը: Ավելի կոնկրետ՝ դիտարկում եմ անվերջ պարբերական խմբերը: Այս ենթաճյուղի զարգացման մեջ մեծ ներդրում ունի ֆիզիկա-մաթեմատիկական գիտությունների դոկտոր, պրոֆեսոր, ՌԳԱ ակադեմիկոս Սերգեյ Ադյանը: Երբեմն կատակով ասում եմ, որ ես նրա «գիտական թոռն» եմ (ժպտում է- հեղ․), քանի որ զբաղվում եմ անվերջ պարբերական խմբերի ուսումնասիրությամբ, որտեղ մեծ ներդրում ունի նա: Այժմ ակադեմիկոսի հետազոտած որոշ կառուցվածքների միջոցով փորձում ենք նոր խնդիրներ լուծել: Հետազոտությունս ամբողջովին տեսության մասին է, սակայն մաթեմատիկան՝ որպես գիտություն, իր գոյությամբ բազմիցս ապացուցել է, որ տեսական շատ բարդ գաղափարներ ունեցել են
կարևոր կիրառություններ, եղել շատ օգտավետ: Այս տեսանկյունից մենք այժմ մեր հետազոտությամբ փորձում ենք մաթեմատիկայի անսահման տիրույթում, առաջադրելով խնդիրներ, գտնել լուծումներ՝ բերելով նորույթ:
- Ո՞վ է ղեկավարում Ձեր գիտահետազոտական աշխատանքը, կպատմե՞ք գիտական ղեկավարի հետ համագործակցության մասին:
- Գիտական ղեկավարս Հանրահաշվի և երկրաչափության ամբիոնի վարիչ, ֆ․մ․գ․դ․, պրոֆեսոր Վարուժան Աթաբեկյանն է: Չափազանց կարևորում եմ պրոֆեսորի հետ համագործակցությունը մշտապես մասնագիտական աջակցություն ցուցաբերելու տեսանկյունից: Այս դեպքում պարզապես անգնահատելի են գիտական աշխարհում մեծ փորձառություն ունեցող մասնագետի ուղղորդումն ու խորհուրդները: Ես պարոն Աթաբեկյանի հետ համագործակցում եմ դեռ բակալավրիատի 3-րդ կուրսից և նրա օգնությամբ մագիստրատուրայում արդեն երկու հոդված եմ գրել: Այժմ էլ պարբերաբար հանդիպում ենք, քննարկում մեր աշխատանքի խնդիրները, հետագա անելիքները:
- Ի՞նչ եք կարծում, եթե ԵՊՀ-ում չլինեիք, գիտությունը կլինե՞ր այսքան գրավիչ:
- ԵՊՀ-ն այն միջավայրն է, որը նպաստում է գիտությամբ զբաղվելուն: Եթե չգայի համալսարան, միգուցե ընդհանրապես չզբաղվեի մաթեմատիկայով, իսկ ԵՊՀ-ն ապահովում է գիտությամբ զբաղվելու շարունակականությունը թե՛ գիտական ղեկավարների, պրոֆեսորադասախոսական կազմի հետ արդյունավետ աշխատանքի, թե՛ մեզնից կրտսեր սերնդի հետ հաղորդակցվելու միջոցով: Ես կարծում եմ, որ մեզնից յուրաքանչյուրի առաջնահերթ խնդիրն է խթանել առկա գիտական դպրոցի զարգացումը, մեծացնել տարբեր ուսումնասիրություններով զբաղվող երիտասարդների թիվը: Այս առումով համալսարանը նպաստավոր միջավայր է:
- Պատմեք, խնդրում եմ, համալսարանական միջավայրում Ձեր և առավել կրտսեր սերնդի միջև մասնագիտական հարցերի շուրջ հաղորդակցության, քննարկումների մասին:
- Կրտսեր կուրսերի ուսանողների հետ մշտապես շփվում եմ, զրուցում մաթեմատիկական տարբեր խնդիրների մասին: Երբեմն պատմում եմ մեր ուսումնասիրությունների մասին, փորձում հրապուրել, որ զբաղվեն խմբերի տեսությամբ: Նաև՝ հաղորդակցումն ապահովվում է տարբեր սեմինարների շրջանակում: Օրինակ՝ անցած կիսամյակ սեփական նախաձեռնությամբ սկսել էի
հանրահաշվական տոպոլոգիայի վերաբերյալ դասընթացների շարք: Ներկա էին թեմայով հետաքրքրված ուսանողներ Մաթեմատիկայի և մեխանիկայի, Ինֆորմատիկայի և կիրառական մաթեմատիկայի ֆակուլտետներից: Սեմինարները կարևոր միջոց են մաթեմատիկայի գրավչությունը ցույց տալու, ուսանողներին գիտության մեջ ներգրավելու համար, քանի որ այստեղ նույնիսկ ակնհայտ դրույթներից խոսելը, գաղափարների փոխանակումը կարող են վերածվել նոր ուսումնասիրության, հետազոտության:
2019-2021 թթ․-ին մասնակցել եմ Մաթեմատիկական միջազգային ուսանողական օլիմպիադային, իսկ վերջին երկու տարիներին ներգրավվել եմ թիմում՝ որպես մարզիչ: Այսպես ևս մշտապես հաղորդակցվում եմ ինձնից կրտսերների հետ:
Ամփոփելով՝ շեշտեմ, որ եթե մաթեմատիկան գրավի որևէ մեկին, ապա նրանից հեռանալ այլևս չի ստացվի: Կարևոր դերակատարում ունի ճիշտ ընտրված միջավայրը, այս դեպքում՝ հարազատ ԵՊՀ-ն, քանի որ չնայած մաթեմատիկան գրավել է ինձ դեռ դպրոցից, բայց համալսարանն է, որ ինձ ամուր կապել է գիտությանը:
