March 26, 2024 | 14:57
Events
Appreciating contribution to development of YSU: jubilee event at YSU
An extended session of the Academic Council of the Faculty of Oriental Studies, dedicated to the 60th anniversary of Professor Alexander Safaryan, Candidate of Historical Sciences, Head of Chair of Turkology, was held at YSU.
Ալեքսանդր Սաֆարյանը ծնվել է 1964 թվականի մարտի 24-ին: Պրոֆեսորը 1990 թվականից որպես դասախոս աշխատում է ԵՊՀ արևելագիտության ֆակուլտետի թյուրքագիտության ամբիոնում, իսկ 1996 թվականից մինչ այժմ ԵՊՀ թյուրքագիտության ամբիոնի վարիչն է: Ալեքսանդր Սաֆարյանին նվիրված գիտխորհրդի ընդլայնված նիստին մասնակցեցին ԵՊՀ ռեկտորը, պրոռեկտորները, տարբեր ֆակուլտետների դեկաններ, ամբիոնների վարիչներ, օտարերկրյա դեսպաններ, ուսանողներ:
Միջոցառմանը բացման խոսքով հանդես եկավ ԵՊՀ ռեկտոր Հովհաննես Հովհաննիսյանը: Կարևորելով պրոֆեսոր Սաֆարյանի գործունեությունը Երևանի պետական համալսարանում՝ նա ընդգծեց․
«Ինձ համար մեծ պատիվ է այս ամբիոնից շնորհավորելը մեր սիրելի դասախոսի, պրոֆեսորի, համալսարանի նվիրյալի 60-ամյակը: Համալսարանը մշտապես աչքի է ընկել իր նվիրյալների նկատմամբ մեծ հարգանքով՝ հիշելով և մեծարելով նրանց: Ա․ Սաֆարյանը հսկայական ավանդ է ներդրել թյուրքագիտության, միջինասիական երկրների հետ մեր հարաբերությունների զարգացման գործում, որն անգնահատելի է ԵՊՀ ուսանողների և պրոֆեսորադասախոսական կազմի համար»,- ընդգծեց Հ. Հովհաննիսյանը՝ Ալեքսանդր Սաֆարյանին մաղթելով առողջություն, երկար տարիների կյանք:
Արևելագիտության ֆակուլտետի դեկան Ռուբեն Մելքոնյանը հիշողությունների ակնարկ կատարեց՝ պատմելով ուսանողական տարիների պատմություններ: Նա նշեց, որ թյուրքագիտութան ասպարեզում Ալեքսանդր Սաֆարյանն իր ուսուցիչն է եղել և իր առաջին հանդիպումը պրոֆեսորի հետ եղել է 1996 թվականին:
«Ա․ Սաֆարյանի մեծ ներդրումը թյուրքագիտության ոլորտում ամրագրված է օբյեկտիվ փաստերով: Նա մեծագույն ջանքեր է գործադրել 1990-ականներին թյուրքագիտության դպրոցի աշխատանքները շարունակելու համար, քանի որ տվյալ ժամանակաշրջանը ճգնաժամային էր։ Հենց նրա ջանքերով է, որ համալսարանական թյուրքագիտությունը վեր է հառնել, շարունակվել և զարգացել: Սա Ա․ Սաֆարյանի կենսագրության մեջ ոսկե տառերով գրվելիք փաստ է»,- ասաց Ռ. Մելքոնյանը:
Միջոցառմանը ներկա էին Իրանի Իսլամական Հանրապետությունում ՀՀ արտակարգ և լիազոր դեսպան, պրոֆեսոր Արսեն Ավագյանը, Հայաստանում Ղազախստանի արտակարգ և լիազոր դեսպան Բոլատ Իմանբաևը, Հայաստանում Թուրքմենստանի արտակարգ և լիազոր դեսպան Մուհամետգելդի Այազովը: Դեսպաններն ընդգծեցին ԵՊՀ-ի, ռեկտոր Հ. Հովհաննիսյանի և պրոֆեսոր Ա. Սաֆարյանի բացառիկ դերը հայ-ղազախական և հայ-թուրքմենական դարավոր բարեկամության ամրապնդման, գիտակրթական և մշակութային կապերի համակողմանի զարգացման գործընթացներում: Հայաստանում Ղազախստանի արտակարգ և լիազոր դեսպան Բոլատ Իմանբաևը Ա. Սաֆարյանին հանձնեց պաշտոնական շնորհավորական ուղերձ և նվիրեց Ղազախստանի ազգային տարազ:
Արևելագետների բազում սերունդների ուսուցիչ, պրոֆեսոր Գուրգեն Մելիքյանը փաստեց, որ Ալեքսանդր Սաֆարյանը մեծացել է գիտնականների ընտանիքում, որտեղ ստացել է համապարփակ գիտելիքներ։
«Հպարտությամբ եմ արձանագրում, որ համալսարանը այսպիսի գիտնական ունի, տոհմիկ հայ և մարդ, համալսարանական մարդ. այս կոչումը բոլորին տրված չէ, Ալեքսանդր Սաֆարյանը զինվորագրված է իր գործին: Շնորհակալ ենք Ա․ Սաֆարյանին, որ նա իր գիտելիքները շռայլորեն նվիրում է իր սաներին, համալսարանական այն շրջանավարտներին, որոնք այսօր զարդարում են Եվրոպայի ցանկացած համալսարան»,- ասաց Գուրգեն Մելիքյանը:
Ելույթ ունեցավ նաև ճանաչված բանաստեղծ, թարգմանիչ Վարուժան Խաստուրը, որը պատմեց իր և պրոֆեսոր Ալեքսանդր Սաֆարյանի ստեղծագործական բազմամյա համագործակցության մասին, որի արդյունքում հրատարակվել են թուրքմենական և ղազախական գրականության դասականների բազմաթիվ ստեղծագործություններ:
«Նրա ջանքերի շնորհիվ ես ընդգրկվեցի ղազախական և թուրքմենական գրականության թարգմանչական աշխատանքներում և ուզում եմ առանձնացնել նրա գիտական վերաբերմունքը, նրա պատասխանատվությունն այդ աշխատանքները կազմակերպելիս»,- նշեց Վարուժան Խաստուրը՝ ընթերցելով Մահթումկուլի Ֆրագիի և Մաղժան Ժումաբաևի բանաստեղծությունների հայերեն թարգմանությունները:
Միջոցառման ավարտին Ալեքսանդր Սաֆարյանը երախտագիտություն հայտնեց ներկաներին, ընտանիքի անդամներին, իր ուսուցիչներին՝ Գուրգեն Մելիքյանին և Դավիթ Հովհաննիսյանին:
