Ambassador of Islamic Republic of Iran Mehdi Sobhani visits YSU

Following the aim of strengthening cooperative relations between YSU and leading educational institutions in Iran, Ambassador of the Islamic Republic of Iran to Armenia Mehdi Sobhani visited the YSU Faculty of Oriental Studies and delivered a lecture on regional issues.

Իրանի Իսլամական Հանրապետության նորանշանակ դեսպան Մեհդի Սոբհանին առաջին անգամ է այցելում ԵՊՀ: Նրան ուղեկցեց դեսպանատան մշակույթի կենտրոնի ղեկավար Մոհամմադ Սոբհանին։

Ողջունելով հյուրերին՝ Արևելագիտության ֆակուլտետի դեկան Ռուբեն Մելքոնյանը նշեց, որ դեսպանի այցը ԵՊՀ տարիների վաղեմություն ունեցող ավանդույթի շարունակությունն է:

«Արևելյան երկրների դեսպանների և ԵՊՀ արևելագիտության ֆակուլտետի բարեկամությունն արդեն տասնամյակների պատմություն ունի։ Ամեն անգամ, երբ նոր դեսպան է նշանակվում, գիտակրթական ոլորտում իր առաջին այցերից մեկն անպայման լինում է ԵՊՀ-ն՝ Արևելագիտության ֆակուլտետը»,- նշեց դեկանը:

Արևելագիտության ֆակուլտետի Իրանագիտության ամբիոնի վարիչ, պրոֆեսոր Վարդան Ոսկանյանը, խոսելով ՀՀ և ԻԻՀ բարձրագույն ուսումնական հաստատությունների գործակցության ուղիներից, ասաց. «ԵՊՀ-ն ինստիտուցիոնալ մակարդակով համագործակցում է իրանական մի շարք համալսարանների՝ Ղազվինի Իմամ Խոմեյնի միջազգային համալսարանի, Թեհրանի, Թավրիզի, Ղոմի կրոնների և դավանանքների և այլ բարձրագույն ուսումնական հաստատությունների հետ: Փորձում ենք ոչ միայն ամրապնդել առկա կապերը, այլև շարունակաբար ընդլայնել դրանք»:

Շեշտելով նմանօրինակ գործակցությունների կարևորությունը՝ Վ. Ոսկանյանը հավելեց, որ կողմերի ակտիվ շփումները կարևոր են թե՛ ուսանողների լեզվական հմտությունների զարգացման և թե՛ գիտնականների միջազգային գործակցության համար՝ հետազոտական տարբեր ծրագրերի իրականացման տեսանկյունից:

Հանդիպմանը ներկա էին թեմայով հետաքրքրված ուսանողներ, դասախոսներ: Ֆակուլտետի ուսանողները ներկայացան նաև իրանական Ամանորին նվիրված ելույթներով և թեմատիկ հյուրասիրությամբ: