July 17, 2024 | 13:11
Society
Lifelong learning
Student
YSU natural science camp: the key to the world of science for schoolchildren
On the initiative of the YSU Continuing Education Center and the Hayastan All Armenian Fund, 60 schoolchildren from different provinces of Armenia participated in the "Science is fun!" See! Touch! Try!" camp, engaging in scientific experiments and hands-on activities.
![](/sites/default/files/styles/large_slide/public/2024-07/img_0080.jpg?h=88f69718&itok=yR_IDN59)
Վերջերս ԵՊՀ-ում ամփոփվեց «Բնագիտությունը զվարճալի՜ է. տե՛ս, շոշափի՛ր, փորձի՛ր» բնագիտական երեքշաբաթյա աշխատարանը, որի շրջանակում դպրոցականները, այցելելով ԵՊՀ նորագույն տեխնոլոգիաներով հագեցած լաբորատորիաներ և լսարաններ, կատարեցին բնագիտական բազմաթիվ փորձեր ու լաբորատոր աշխատանքներ՝ առավել լավ ծանոթանալով բնական գիտություններին:
![](/sites/default/files/styles/large_half_text/public/2024-07/img_8766.jpg?itok=Coxs83NV)
ԵՊՀ շարունակական կրթության կենտրոնի և «Հայաստան» համահայկական հիմնադրամի նախաձեռնությամբ աշխատարանն ընդլայնեց իր գործունեության շրջանակը՝ ԵՊՀ Բյուրականի ուսումնաարտադրական բազայում ճամբար կազմակերպելով դպրոցականների համար: ՀՀ մարզերից 60 աշակերտներ (այդ թվում՝ գերակշիռ մասը Արցախից տեղահանված) հնարավորություն ստացան անվճար հիմունքներով մասնակցելու «Բնագիտությունը զվարճալի՜ է. տե՛ս, շոշափի՛ր, փորձի՛ր» բնագիտական ճամբարին:
ԵՊՀ շարունակական կրթության կենտրոնի մասնագիտական վերապատրաստման բաժնի գլխավոր մասնագետ Տաթևիկ Խաչատրյանը, ներկայացնելով ճամբարի ծրագրի մանրամասները, նշեց. «Ճամբարի շրջանակում դպրոցականներն ուսումնասիրել են բնագիտական տարբեր առարկաներ՝ «Ֆիզիկա», «Քիմիա», «Կենսաբանություն» և այլն: Հիմնականում շեշտադրվել են գիտափորձերը, որոնց շնորհիվ աշակերտներն ուսումնասիրել և ճանաչել են իրենց շրջապատող աշխարհը: Բացի բնագիտական առարկաների ուսումնասիրությունից՝ անցկացվել են նաև մասնագիտական կողմնորոշման դասընթացներ, արվեստի ուղղվածությամբ աշխատարաններ (թղթի, հագուստի վերամշակում, կավագործություն), այցեր աստղադիտարան, պատմական տարբեր հուշարձաններ և այլն»:
![](/sites/default/files/styles/large_half_text/public/2024-07/img_0243.jpg?itok=-37YhgjF)
Խոսելով ծրագրի արդյունքներից՝ Տաթև Խաչատրյանն ընդգծեց, որ անգամ այն աշակերտները, որոնք նախկինում չեն սիրել ու հետաքրքրվել բնագիտությամբ, ակտիվ աշխատարանների շնորհիվ սկսել են հետաքրքրվել քիմիայով, կենսաբանությամբ ու ֆիզիկայով:
Աշակերտների համար թեմատիկ դասախոսություններն անցկացրել են ԵՊՀ դասախոսները և «YSO Student Chapter»-ի ուսանողները՝ ցույց տալով գիտությունների փորձարարական կողմը:
ԵՊՀ օրգանական քիմիայի ամբիոնի աշխատակից, ք․գ․թ․, դոցենտ Մելանյա Սամվելյանը, պատմելով դասընթացի մասին, շեշտեց. «Աշակերտները սովորաբար դպրոցական տարիքից չեն սիրում բնագիտական առարկաները: Նմանօրինակ աշխատարանները օգնում են կոտրելու ձևավորված կարծրատիպերը գիտության այս «բարդ» ճյուղերի մասին: Հարկ է նշել, որ քիմիան մեր կյանքն է, ուստի չպետք է խուսափել այս և հարակից գիտաճյուղերից, փոխարենը պետք է մոտ լինել ու լավ ճանաչել այն»:
![](/sites/default/files/styles/large_half_text/public/2024-07/2z7a4851.jpg?itok=0PUoAB_X)
Իսկ թե ինչ են հասցրել սովորել ճամբարում, պատմեցին իրենք՝ մասնակիցները: 11-րդ դասարանի աշակերտ Արման Առաքելյանը, որն ապագա բժիշկ է, պատասխանելով հարցին, թե ինչու որոշեց մասնակցել ճամբարին, վստահեցրեց, որ այն տարբերվում է մյուսներից. այստեղ չեն գալիս միայն զվարճանալու համար:
«Ծրագիրը շատ է տարբերվում այլ ծրագրերից, քանի որ այստեղ հմուտ և փորձառու մասնագետների շնորհիվ ուսումնասիրում ենք գիտության տարբեր ճյուղեր, կատարում մեր առաջին գիտափորձերն ու առաջին քայլերը բնական գիտությունների ոլորտում: Ընկերներիս ևս խորհուրդ կտամ դիմել նմանօրինակ ծրագրերի՝ որպես մասնագիտական կողմնորոշման և զարգացման հնարավորություն»,- ասաց Արմանը:
Նշենք, որ բնագիտական ճամբարը ԵՊՀ շարունակական կրթության կենտրոնի հերթական նախաձեռնությունն է, որի նպատակն է ակտիվացնել ֆորմալ և ոչ ֆորմալ կրթական գործընթացները՝ տարբեր մեթոդների համադրմամբ բարձրացնելով ուսումնական գործընթացի արդյունավետությունը: