«ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏԸ ՄԵԾ ԸՆՏԱՆԻՔ Է, ՈՐՏԵՂ ԲՈԼՈՐԸ ՀԱՄԱԶԳԱՅԻՆ ԵՎ ՀԱՄԱՄԱՐԴԿԱՅԻՆ ԱՐԺԵՔՆԵՐԻ ԿՐՈՂ ԵՆ». ՏԱԹԵՎ ԴՈՒՆԱՄԱԼՅԱՆ

- Ինչպե՞ս որոշեցիք ընդունվել ԵՊՀ արևելագիտության ֆակուլտետ:

- Ֆակուլտետի ընտրության հարցում կարևոր է եղել մասնագիտական կողմնորոշումը:

Ինձ մշտապես հետաքրքրել են իրանական հարուստ մշակույթը, դարերի խորքից եկող պատմությունը և քաղաքակրթությունը, ուստի ցանկություն ունեի ավելի խորն ուսումնասիրելու ոչ միայն վերոնշյալ ոլորտները, այլև լեզուն, ապա իմ գիտելիքները ծառայեցնելու հայ-իրանական հարաբերությունների առավել խորացմանն ու ամրապնդմանը: Ինձ համար կարևոր է եղել նաև ֆակուլտետի հեղինակությունը:

ԵՊՀ արևելագիտության ֆակուլտետը համալսարանի՝ ավանդույթներով հարուստ ֆակուլտետներից մեկն է, որտեղ ուսանողները ոչ միայն ձեռք են բերում մասնագիտական գիտելիքներ, այլև ստանում են հայրենասիրական դաստիարակություն՝ կրթվելով որպես իսկական հայորդիներ: Իսկ ֆակուլտետի շրջանավարտները հիմնականում աշխատանքի են անցնում պետական համակարգում և իրենց ստացած գիտելիքները ծառայեցնում ի նպաստ հայրենիքի:

- Արդյո՞ք այդ ընտրությունն իրեն հետո արդարացրեց:

- Միանշանակ այո:

ԵՊՀ-ում ուսանելու տարիները հագեցած էին ինչպես կրթական, այնպես էլ արտաուսումնական ծրագրերով և միջոցառումներով։ Ստացած մասնագիտական գիտելիքներից և հմտություններից զատ՝ կարևոր ձեռքբերումներից է ֆակուլտետում ձևավորված ընկերությունը։ Ինչպես մենք ենք սիրում ասել, Արևելագիտության ֆակուլտետը մեծ ընտանիք է, որտեղ բոլորը համազգային և համամարդկային արժեքների կրող են:

- Ի՞նչ է իրանագիտությունը Ձեզ համար, ինչպե՞ս այն կսահմանեք:

- Ամենասկզբում իրանագիտությունն ինձ համար փակ, սակայն մշտապես գրավիչ, իր ետևում պատմություն և քաղաքակրթություն ունեցող դուռ էր, որի բանալին գտնում ես համալսարանում ուսանելու տարիներին, իսկ ավարտելիս վստահ բացում ես այդ դուռը և սահուն ներս մտնում:

- Ի՞նչ կամավորական աշխատանքներ եք կատարել այս ընթացքում: Ինչպե՞ս համատեղել ուսումն ու կամավորական աշխատանքը, և ի՞նչ կարևորություն ունի վերջինս ուսանողի կյանքում:

- Կամավորության մասին կարելի է անվերջ խոսել: 15 տարեկանից մինչ օրս զբաղվում եմ կամավորական աշխատանքներով, որոնք իմ կյանքում մեծ նշանակություն ունեն: Այդ աշխատանքների շնորհիվ երիտասարդները ձեռք են բերում մեծ փորձ, նոր գիտելիքներ և ընկերներ:

Կատարածս կամավորական աշխատանքների մեծ մասը բխել է իմ մասնագիտությունից և նպաստել որպես մասնագետ իմ կայանալուն:

Այժմ ինձ համար հասարակական ամենակարևոր գործունեությունն ՈՒԳԸ-ի շրջանակում կատարված աշխատանքն է, որն իրականացնում եմ ամենայն պատասխանատվությամբ, քանի որ ինձ համար մեծ պատիվ է լինել ԵՊՀ արևելագիտության ֆակուլտետի ՈՒԳԸ նախագահը:

Մեր կառույցն ակտիվ գործունեություն է ծավալում, իրականացնում մի շարք միջոցառումներ, կազմակերպում գիտաժողովներ, գիտաճանաչողական այցեր, տարբեր թեմաներով բանախոսություններ, որոնց ընթացքում ուսանողները ևս մեկ անգամ հնարավորություն են ունենում լսելու ոլորտի լավագույն մասնագետներին, ինչպես նաև արևելյան գրականությունը հայերենով մատուցում է հայ ընթերցողին. թարգմանությունների մրցույթ, օլիմպիադաներ, գրքերի և ֆիլմերի քննարկումներ, մի շարք այլ միջոցառումներ: Մեր կարևոր նպատակներից մեկը միջֆակուլտետային համագործակցությունն է, որի շրջանակում կազմակերպվում են բազմաբովանդակ միջոցառումներ:

- Ի՞նչ խորհուրդ կտայիք իրանագիտություն ընտրողներին:

- Ապագա իրանագետներին խորհուրդ եմ տալիս երբեք չվախենալ բարդություններից, մշտապես կարևորել ընտրած մասնագիտությունը և լավագույնը լինել իրենց ոլորտում:

Արևելագետ լինելն իսկապես կոչում է, որը պետք է պատվով կրել։