ԵՊՀ ՍՈՑԻՈԼՈԳԻԱՅԻ ՖԱԿՈՒԼՏԵՏԸ ՀԱՄԱԼՐԵՑ ԻՐ ԳՐԱԴԱՐԱՆԸ

ԵՊՀ ռեկտոր Հովհաննես Հովհաննիսյանը, ողջունելով ներկաներին, փաստեց, որ համալսարանում ձևավորվել է գեղեցիկ ավանդույթ, այն է՝ գրքերի շնորհանդեսների ու դրանց շուրջ քննարկումների կազմակերպումը: Հ. Հովհաննիսյանը նշեց, որ հայ գրականությունը հարստանում է այսօրինակ գրքերի լույսընծայումով, ինչը ողջունելի է:

ԵՊՀ սոցիոլոգիայի ֆակուլտետի շրջանավարտ, ԱՄՆ Միչիգանի համալսարանի դասախոս Վահե Սահակյանի հեղինակած «Սփյուռքագիտություն. քննական անթոլոգիա» գրքում ներառված են առաջին անգամ հայերեն թարգմանված և Սփյուռքն ուսումնասիրող ոլորտներում ներդրում ունեցած միջազգային ճանաչում ունեցող հեղինակների ուսումնասիրություններ:

Անթոլոգիայում ներառված են նաև Սփյուռքի սահմանումներին, Սփյուռքի ուսումնասիրության ոլորտի զարգացմանն ու առանձնահատկություններին նվիրված քննական աշխատություններ։ Ի դեպ, «Սփյուռք» հասկացության ըմբռնումների շուրջ բազմազան ու երբեմն հակընդդեմ մոտեցումների ներկայացմամբ անթոլոգիան նպատակ ունի խթանելու և խրախուսելու քննական մոտեցումները Հայկական սփյուռքի ուսումնասիրություններում։

Վ. Սահակյանը մեզ հետ զրույցում ընդգծեց, որ գիրքը կիրառական նշանակություն կունենա սոցիոլոգների, սփյուռքագետների, հայագետների, պատմաբանների, քաղաքագետների ու հոգեբանների համար:

«Սփյուռքագիտություն. քննական անթոլոգիա» գրքի գրախոս, ԵՊՀ կիրառական սոցիոլոգիայի ամբիոնի վարիչ Արթուր Աթանեսյանի խոսքով՝ գիրքը դասական կոնցեպտուալ մոտեցումների ամբողջություն է:

Նշենք, որ գիրքը հասանելի է ԵՊՀ սոցիոլոգիայի ֆակուլտետի գրադարանում։