ՈՒՍՈՒՄՆԱԿԱՆ ՎԱՐԺԱՆՔ ԵՊՀ-ՈՒՄ

Երևանի քաղաքապետարանի տարեկան միջոցառումների պլանին համապատասխան կազմակերպված միջոցառման նպատակն էր ճգնաժամային իրավիճակներում ուսումնական հաստատությունների պատրաստվածության մակարդակի բարձրացումը:

Ուսումնական վարժանքին ներկա էին ԵՊՀ ռեկտոր Հովհաննես Հովհաննիսյանը, ԵՊՀ ռեկտորի աշխատակազմի ղեկավար Դավիթ Հովհաննիսյանը, ՀՀ ներքին գործերի նախարարի տեղակալ, ՆԳՆ փրկարար ծառայության տնօրեն Կամո Ցուցուլյանը, Երևանի քաղաքապետ Հրաչյա Սարգսյանը և այլք:

Միջոցառման ընթացքում գործարկվել է ԵՊՀ շչակը, ԵՊՀ նորաստեղծ ուսանողական փրկարարական ջոկատի անդամները ներկայացրել են հակառակորդի հարձակման դեպքում հայտարարված օդային տագնապից հետո նախատեսվող պատսպարման գործողությունը, իսկ օդային տագնապի ավարտից հետո՝ հետախուզական, որոնողական, փրկարարական և առաջին բուժօգնության գործողությունները:  Այնուհետև ժամանել են ՀՀ փրկարարական ծառայության ջոկատները՝ ցուցադրելով տարբեր իրավիճակներում կատարվող քայլերը:

Ուսումնավարժանքի կազմակերպման աշխատանքներում ներգրավվել են ԵՊՀ քաղաքացիական պաշտպանության ամբիոնը, ուսանողական փրկարարական ջոկատը, հակահրդեհային ծառայությունը, էներգետիկ համակարգի շահագործման բաժինը և ներքին անվտանգության ծառայությունը, ինչպես նաև Երևանի փրկարարական վարչությունը և փրկարարական բոլոր ստորաբաժանումները, Հայկական Կարմիր խաչի ընկերությունը և այլն:

Նշենք, որ ԵՊՀ-ում պարբերաբար կազմակերպվում են նմանօրինակ ուսումնական վարժանքներ: Դրանք ԵՊՀ քաղաքացիական պաշտպանության ամբիոնի ուսումնական գործընթացի մի մասն են, որոնց նպատակն է ուսանողների տեսական գիտելիքների ամրապնդումը և կիրառական հմտությունների զարգացումը: