ԵՊՀ մարքեթինգի բաժնի հիմնական գործառույթներից են հաղորդակցական նյութերի տարածման միջոցով ԵՊՀ հանրային դիրքի շարունակական բարելավումը, ԵՊՀ բրենդի զարգացումն ու առաջխաղացումը, ինչպես նաև սոցիալական ցանցերում ԵՊՀ տեսանելիության ապահովումը:
ԵՊՀ մարքեթինգի բաժինը համալսարանի կրթական ու գիտահետազոտական աշխատանքները և գրանցած արդյունքները հանրությանն է ներկայացնում պաշտոնական կայքէջի, սոցիալական մեդիայի, ինչպես նաև ԶԼՄ-ի հետ համագործակցության միջոցով:
ԵՊՀ կայքէջում հրապարակվում են համալսարանում տեղի ունեցող իրադարձությունների, ինչպես նաև հաջողություններ գրանցած ուսանողների, ԵՊՀ հետազոտողների գիտական նվաճումների, ֆակուլտետների գործունեության մասին պատմող և այլ տեղեկություններ: Այս նյութերի ստեղծման, ռուսերեն և անգլերեն թարգմանությունների, ինչպես նաև ԵՊՀ կայքէջի խմբագրական աշխատանքները կատարում է ԵՊՀ մարքեթինգի բաժինը:
Բաժինն ուսումնասիրում է կրթության ու համալսարանի վերաբերյալ հանրային ընկալումները, պահանջարկը, անհրաժեշտության դեպքում կազմակերպում հարցազրույցներ, նկարահանում և հանրայնացնում հաղորդաշարեր, ճեպազրույցներ:
Բաժինն ապահովում է ԵՊՀ տեսողական ինքնության պահպանումը. կատարում է ԵՊՀ բրենդային ապրանքների նախագծման, դիզայներական աշխատանքները, հետևում տպագրական աշխատանքների որակին՝ մշտական կապ պահելով ապրանքների մատակարարների հետ: Հիմնական գործառույթներից են ԵՊՀ ստորաբաժանումների համար տարբերանշանների, բուկլետների, ազդագրերի, այցեքարտերի, սոցիալական էջերի համար ետնանկարների, թեմատիկ պաստառների ստեղծման աշխատանքները:
Մեծամասշտաբ միջոցառումների կազմակերպական հիմնական աշխատանքներով ևս զբաղվում է Մարքեթինգի բաժինը:
Մարքեթինգի բաժինը մշտադիտարկում է կրթական ծառայությունների ոլորտը և ստացված տվյալների հիման վրա ԵՊՀ այլ ստորաբաժանումների հետ համատեղ մշակում և իրագործում է մարքեթինգային պլանը:
Բաժինն աջակցում է ԵՊՀ տարբեր ստորաբաժանումների միջև արդյունավետ հաղորդակցության կազմակերպմանը:
ԵՊՀ մարքեթինգի բաժինը համակարգում է նաև նորաստեղծ Տեղեկատվական կենտրոնի աշխատանքները, որի նպատակն է ուսանողներին, ինչպես նաև հետաքրքրված այլ անձանց տրամադրել անհրաժեշտ տեղեկություններ ԵՊՀ գործունեության, կրթական ծրագրերի և տարաբնույթ այլ հարցերի վերաբերյալ:
