Ֆարմացիայի ինստիտուտի գիտահետազոտական կենտրոն

ԵՊՀ ֆարմացիայի ինստիտուտի գիտահետազոտական կենտրոնի հիմնական ուղղություններն են ասիմետրիկ սինթեզը և բժշկակենսաբանական սկրինինգը։

Ասիմետրիկ սինթեզի խումբը ուսումնասիրում է նոր քիրալային մետաղակոմպլեքսային կատալիզատորների և օրգանակատալիզատորների սինթեզը, և կատալիտիկ եղանակով ստացվում են կենսաբանորեն պոտենցիալ ակտիվ միացություններ: Ասիմետրիկ սինթեզի խումբը շարունակաբար կատարում է հետազոտություններ ասիմետրիկ սինթեզի ոլորտում, մասնավորապես մշակվում են տարբեր կառուցվածքներով էնանտիոմերապես հարստացված, օպտիկապես ակտիվ ոչ սպիտակուցային ամինաթթուների ու դրանցից կազմված պեպտիդների ստացման արդյունավետ մեթոդներ՝ ստեխիոմետրիկ և կատալիտիկ:

Կենսաբժշկական սկրինինգի խմբի կողմից նախատեսվում է կատարել՝

• որոշ պայմանական պաթոգեն մանրէների հակաբիոտիկայունության ձևավորման մեխանիզմների հետազոտում, դրանց վրա տարբեր սերնդի հակաբիոտիկների ազդեցության հետազոտում,

• Հայաստանում աճող որոշ դեղաբույսերից կենսաբանական ակտիվ նյութերի՝ եթերայուղերի, ֆլավոնոիդների, սապոնիների, գլիկոզիդների անջատում, կազմի պարզում, դրանց որոշ կենսաբանական հատկությունների հետազոտում,

• այդ բույսերից անջատված եթերայուղերի և այլ կենսաբանական ակտիվ նյութերի և հակաբոիտիկների զուգորդված հակամանրէային հատկությունների ուսումասիրում և դրանց ազդեցության հետազոտումը նյութափոխանակային առանցքային ֆերմենտների վրա,

• ասիմետրիկ սինթեզի խմբի կողմից սինթեզած էնանտիոմերապես հարստացված ոչ սպիտակուցային ամինաթթուների և պեպտիդների որոշ կենսաբանական հատկությունների հետազոտում: