Փիլիսոփայության և հոգեբանության ֆակուլտետ

Երևանի պետական համալսարանում սկզբնապես գործել է փիլիսոփայության ամբիոն, որի հիման վրա 1964 թ. պատմության ֆակուլտետում բացվել է փիլիսոփայության բաժին։ 1982 թ․ այն առանձնացել է պատմության ֆակուլտետից, և ստեղծվել է փիլիսոփայության և սոցիոլոգիայի ֆակուլտետ։ 1991 թ․ սոցիոլոգիան առանձնացել է փիլիսոփայությունից և դարձել ինքնուրույն բաժին, որից էլ 1995 թ. ստեղծվել է սոցիալական աշխատանքի բաժինը:

1992 թ․ ֆակուլտետում բացվել է հոգեբանության բաժին, և ֆակուլտետը վերանվանվել է փիլիսոփայության, սոցիոլոգիայի և հոգեբանության ֆակուլտետ: 2004 թ. սոցիոլոգիայի և սոցիալական աշխատանքի բաժիններն առանձնացել են ֆակուլտետից և ձևավորել ինքնուրույն ֆակուլտետ, իսկ մայր ֆակուլտետը վերանվանվել է փիլիսոփայության և հոգեբանության ֆակուլտետ:

Փիլիսոփայության և հոգեբանության ֆակուլտետում գործում է առկա և հեռակա ուսուցման եռաստիճան համակարգ՝ բակալավրիատական, մագիստրոսական և ասպիրանտական։

Ֆակուլտետում աշխատում են ոլորտի առաջատար մասնագետներ, ՀՀ ԳԱԱ ակադեմիկոս և թղթակից անդամ, դոկտորներ, պրոֆեսորներ, գիտության թեկնածուներ և դոցենտներ: Ֆակուլտետի դասախոսները՝ որպես հրավիրյալ մասնագետներ, դասախոսություններ են կարդում արտերկրի համալսարաններում, վերապատրաստումներ են անցնում միջազգային հեղինակավոր ուսումնական և գիտական հաստատություններում, ինչպես նաև ներգրավված են միջազգային հետազոտական ծրագրերում։

Կարդալ ավելին