ԶԱՐԳԱՑՄԱՆ ՆՈՐ ՀՆԱՐԱՎՈՐՈՒԹՅՈՒՆՆԵՐ ՔԻՄԻԱՅԻ ՈԼՈՐՏՈՒՄ. ՀԱՄԱԳՈՐԾԱԿՑՈՒԹՅԱՆ ՀԱՄԱՁԱՅՆԱԳԻՐ ԵՊՀ-Ի ԵՎ «ՅՈՒՆԻՔԻՄ» ԸՆԿԵՐՈՒԹՅԱՆ ՄԻՋԵՎ

Ըստ համագործակցության նոր համաձայնագրի՝ երկու կառույցներն այսուհետ միավորելու են ջանքերը՝ կենցաղային քիմիայի, քիմիայի և այլ ոլորտներում իրականացնելու բակալավրական և մագիստրոսական համատեղ ծրագրեր, ստեղծելու ուսումնալաբորատոր և ուսումնամեթոդական բազաներ,  լաբորատորիաներ, փոխանցելու մասնագիտական գիտելիքներ, ունակություններ և հմտություններ:

Հանդիպմանը մասնակցում էին ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը, Քիմիայի ֆակուլտետի անօրգանական և անալիտիկ քիմիայի ամբիոնի վարիչ Արմեն Մարտիրյանը, ամբիոնի գիտաշխատող Վլադիմիր Վարդապետյանը և ֆակուլտետի ՈՒԽ նախագահ Արթուր Նիգարյանը:

Հովհաննես Հովհաննիսյանը նշեց համաձայնագրով սահմանված դրույթներն ամբողջ ծավալով կյանքի կոչելու կարևորությունը՝ ընդգծելով, որ այսօրվա զարգացող աշխարհում իրապես որակյալ մասնագետներ ունենալու համար գործարար աշխարհը պետք է մասնակից դառնա կրթական գործընթացին:

Ըստ ռեկտորի՝ քիմիան այն ոլորտն է, որի զարգացումը շատ կարևոր է մեր երկրի համար, և որ հաստատված համագործակցությունը նպաստելու է էլ ավելի որակյալ կադրերի պատրաստմանն ու գիտահետազոտական աշխատանքների իրականացմանը:

Վրեժ Օհանյանի խոսքով, ընկերությունը և Քիմիայի ֆակուլտետը վաղուց են համագործակցում մի շարք ուղղություններով: Ըստ նրա՝ այս համաձայնագրով նոր ծրագրերի իրագործման և գիտական ձեռքբերումները գործնականում կիրառելու հնարավորություններ կբացվեն:

Կարինե Նազարյանի խոսքով, աշխատաշուկայի պահանջներին համապատասխան որակյալ կադրեր պատրաստելու գործում ֆակուլտետի գործունեությունն  առավել արդյունավետ կդառնա բուհի և ընկերության միջև հաստատված համագործակցությամբ:

Տեղեկացնենք, որ նախատեսվում է նաև «Յունիքիմ» ընկերության հետ նոր լաբորատորիայի ստեղծում, որը հնարավորություն կտա նպաստելու քիմիական արտադրության տարբեր ոլորտներում նորագույն տեխնոլոգիաների ներդրմանը, նոր տեխնոլոգիաների մշակմանը, վերլուծությունների իրականացմանը, հումքի տեխնիկական ցուցանիշների որոշմանը, որակի գնահատմանը: