Պատմություն

Դարեր շարունակ պատմությունը եղել է հայ մշակույթի աչքի ընկնող և զարգացած ոլորտներից մեկը: Հետևելով Մովսես Խորենացու մոտեցմանը և չնայելով մեր անցած ճանապարհի՝ ոգևորություն չառաջացնող բազում էջերին՝ հայերը շարադրել են պատմությունը, փորձել հասկանալ իրենց և շրջապատող աշխարհը։

Այսօր, երբ հայությունը ներքին ու արտաքին պատճառներով ստիպված է պատասխանելու մի շարք սպառնալիքների, մեծացել է պատմությանը դիմելու, այն համարձակորեն քննելու, նորովի գնահատելու և վերագնահատելու անհրաժեշտությունը։ Մեր օրերում առաջնային նշանակություն է ստացել կենսունակ պետական և ազգային գիտակցություն ունեցող քաղաքացիների, սերունդների ձևավորումը և առկա սպառնալիքների չեզոքացմամբ ամուր ու զարգացած պետության կառուցումը։ Այդ խնդիրը լուծելու գործում կարևոր դեր ունեն պատմաբանները։

Այս տեսանկյունից՝ դարից ավելի պատմություն, ավանդույթներ ու փորձ ունեցող ԵՊՀ պատմության ֆակուլտետն առաջարկում է բակալավրի «Պատմություն» կրթական ծրագիրը:

Ընդունելության պահանջները

Ընդունելությունը կատարվում է «Հայոց պատմություն» (գրավոր), «Հայոց լեզու և գրականություն» (գրավոր) կամ «Օտար լեզու» (գրավոր) առարկաների քննությունների արդյունքների հիման վրա:

Ծրագրի նպատակը

Ծրագրի նպատակը հիմնարար գիտելիքներ, տեսական պատրաստվածություն ու գիտահետազոտական աշխատանք կատարելու կարողություն և հմտություններ ունեցող պատմաբաններ պատրաստելն է։

Առավելությունները

«Պատմություն» ծրագրի շրջանակում ձեռք բերված գիտելիքների ու հմտությունների շնորհիվ տասնամյակներ շարունակ և այսօր մեր շրջանավարտները բարձր, ղեկավար դիրքեր են զբաղեցնում քաղաքական դաշտում, պետական կառավարման տարբեր օղակներում (ՀՀ կառավարություն, նախարարություններ, Ազգային ժողով, Սփյուռքի հանձնակատարի գրասենյակ, ԱԱԾ, մարզպետարաններ, քաղաքապետարաններ, համայնքապետարաններ և այլն):

Կարիերայի հնարավորությունները

Առաջարկվող ծրագրի շրջանավարտները հնարավորություն ունեն աշխատանքի անցնելու ՀՀ ԳԱԱ պատմության, արևելագիտության ինստիտուտներում, Հայոց ցեղասպանության թանգարան-ինստիտուտում և այլ հետազոտական հաստատություններում։ Սույն ծրագրի շրջանավարտները պահանջված են Հայաստանի ազգային արխիվում, տուրիստական գործակալություններում և թանգարաններում, իսկ լրացուցիչ մանկավարժի որակավորում ձեռք բերելու դեպքում նաև դպրոցներում և միջին մասնագիտական ուսումնական հաստատություններում։