ԵՊՀ-ն դիմավորեց 105-րդ սերնդի առաջինկուրսեցիներին

Միջոցառման նպատակն էր ուսանողներին ծանոթացնել համալսարանի ընձեռած ուսումնական և արտաուսումնական բազմաթիվ հնարավորություններին և օգնել նրանց ստանալ իրենց հետաքրքրող հարցերի պատասխանները։

ԵՊՀ ռեկտոր Հովհաննես Հովհաննիսյանը, ողջունելով ներկաներին և շնորհավորելով առաջինկուրսեցիներին համալսարանական դառնալու կապակցությամբ, նշեց. «Այսօրվա հանդիսության խորագիրը խորհրդանշում է ԵՊՀ մնայուն ժառանգությունն ու իր առաքելությունն իրագործելու հանձնառությունը: Այն նշանակում է ոչ միայն նոր ուսումնական տարվա սկիզբ, այլև ակադեմիական գերազանցության ու համալսարանական համայնքի բազմամյա ավանդույթ, որը հարստացել է ավելի քան մեկդարյա պատմության ընթացքում: Եվ այս «բարևը» պարզապես ողջույն չէ. այն հրավեր է դեպի բացահայտումների աշխարհ, դրական փոխակերպումների խոստում ու ձեր գիտելիքներն ու հմտությունները զարգացնելու պարտավորություն»:

ԵՊՀ ռեկտորն առաջինկուրսեցիներին խորհուրդ տվեց  ոգևորությամբ ու է՛լ ավելի մեծ խանդավառությամբ ձգտել դեպի գիտելիքը և հավատալ աշխարհն ավելի լավը դարձնելու սեփական ներուժին, որը բացահայտելու հարթակը համալսարանն է:

Միջոցառման ընթացքում առանձին տաղավարներով ներկայացան Գիտական քաղաքականության վարչությունը, Ֆիզիկական դաստիարակության և սպորտի ամբիոնը, Սարգիս և Մարի Իզմիրլյանների անվան գրադարանը, Շարունակական կրթության կենտրոնը, Շրջանավարտների և կարիերայի կենտրոնը, Շ. Ազնավուրի անվան մշակույթի կենտրոնը, Լ. Ղարիբջանյանի անվան պատմության թանգարանը, Մարքեթինգի բաժինը:

Ուսումնամեթոդական վարչությունը ուսանողներին ներկայացրեց կրթական գործընթացի կազմակերպմանն առնչվող մանրամասները:

Գիտական քաղաքականության վարչությունը գիտական ուղղություններով հետաքրքրված ուսանողների համար կազմակերպեց շրջայց գիտական լաբորատորիաներում, անցկացրեց խաղ-մրցույթներ և ներկայացրեց վարչության գործունեությունը:

Ֆինանսական վերլուծությունների վարչությունը ծանոթացրեց ուսումնական զեղչերին առնչվող կարևոր տեղեկությունների՝ դիմելու կարգ, պայմաններ, փաստաթղթեր, ժամկետներ և այլն:

Միջազգային համագործակցության վարչությունը իրազեկեց միջազգային կրթական և գիտական ծրագրերի հնարավորությունների մասին, ծանոթացրեց «Էրազմուս+» միջազգային ծրագրի մանրամասներին, դիմելու ընթացակարգին, պայմաններին և ընձեռվող հնարավորություններին:

Տեղեկատվական տեխնոլոգիաների վարչությունը ու SS կրթական և հետազոտական կենտրոնը ուսանողներին ներկայացրին թեմատիկ կպչուկներ և QR կոդեր, որոնք կհեշտացնեն ուսանողական էլեկտրոնային հասցեն վերականգնելու գործընթացը, ինչպես նաև կդառնան ուղեցույց՝ ԵՊՀ կայքէջից անհրաժեշտ տեղեկությունները գտնելու համար:

Ֆիզիկական դաստիարակության և սպորտի ամբիոնն իր տաղավարում ներկայացրեց  տարբեր մարզաձևերից ԵՊՀ հավաքական թիմերի գրաված գավաթները  և պատվոգրերը, ամբիոնի գործունեությունը և համալսարանում գործող սպորտային խմբակները:

Սարգիս և Մարի Իզմիրլյանների անվան գրադարանի տաղավարում ներկայացվեցին գրադարանի բաժինները, էլեկտրոնային տարբերակով գրականության փնտրման և պատվիրման կարգերը, իսկ ցանկացողների համար անցկացվեց շրջայց գրադարանում:

Շարունակական կրթության կենտրոնը ներկայացրեց կենտրոնի ծրագրերը, ինչպես նաև համալսարանի ուսանողների և դասախոսների համար անցկացրեց քվեսթ, որին մասնակցեցին 15 թիմեր և 110 համալսարանականներ։

Շրջանավարտների և կարիերայի կենտրոնը ուսանողների համար անցկացրեց քուիզ, կարճ դասընթաց՝ ինքնակենսագրական (CV) կազմելու և գործատուներին ներկայանալու թեմայով, ինչպես նաև գրանցեց ուսանողների տվյալները կենտրոնի բազայի համալրման նպատակով։

Շ. Ազնավուրի անվան մշակույթի կենտրոնը ներկայացրեց կենտրոնի գործունեությունը, սաների և խմբերի մրցանակները, կենտրոնի կերպարային հագուստների նմուշները, ինչպես նաև ելույթ ունեցավ «YSU BAND»-ը, ֆլեշմոբերով ներկայացան պարի և երգչախմբի սաները։

Լ. Ղարիբջանյանի անվան պատմության թանգարանի տաղավարում ցուցադրված էին համալսարանի հիմնադիր դասախոսների լուսանկարներ, գրքեր և բացիկներ, հնագիտական ցուցանմուշներ, ինչպես նաև թանգարանի աշխատակիցներն անցկացրին էքսկուրսիա՝ ԵՊՀ բակի հուշարձաններին ծանոթացնելու նպատակով:

Մարքեթինգի բաժինը ծանոթացրեց ԵՊՀ սոցիալական ցանցերի պաշտոնական էջերին ու բրենդային ապրանքատեսակներին, բաժնի գործունեությանը և ուսանողների՝ ներհամալսարանական հաղորդակցությանը մասնակցելու կարևորությանը, ինչպես նաև բաժնում կամավորական աշխատանք կատարելու հնարավորություններին և առավելություններին: Մարքեթինգի բաժնի տաղավարում ուսանողների համար անցկացվեցին նաև խաղ-մրցույթներ։

«105-ՐԴ ԲԱՐԵՎԸ» միջոցառումն ամփոփվեց տոնական համերգով, որի ժամանակ ելույթ ունեցան «NEMRA» և «By The Way» երաժշտական խմբերը:

Միջոցառմանը մասնակցեցին ԵՊՀ պրոֆեսորադասախոսական կազմի ներկայացուցիչներ, տարբեր ստորաբաժանումների աշխատակիցներ, ուսանողներ և շրջանավարտներ:

Միջոցառման մասին պատմող տեսանյութը՝ այստեղ։