ԵՊՀ շրջանավարտների և կարիերայի կենտրոնի նախաձեռնությամբ այս տարի ևս իրականացվում է շրջանավարտների բազայի ամենամյա համալրման գործընթացը։
Ավանդույթ դարձած այս գործընթացի շրջանակում համալսարան են հրավիրվում Շրջանավարտների և կարիերայի կենտրոնի մի շարք գործընկեր կազմակերպությունների ներկայացուցիչներ, որոնք ԵՊՀ շրջանավարտներին են ներկայացնում իրենց կազմակերպություններում առկա թափուր աշխատատեղերը։
ԵՊՀ գործընկեր «Բրեվիս», «Մեյջորել Արմենիա», «Էվոլուշն Արմենիա», «Ինտերնեյշնլ Մասիս Տաբակ», «FYM Management» ընկերությունների և Հայկական ատոմային էլեկտրակայանի ներկայացուցիչները համալսարանի հետ գործակցության շրջանակում ներկա են եղել ԵՊՀ մի շարք ֆակուլտետների և ինստիտուտների շրջանավարտների դիպլոմների հանձնման արարողությանը։
Ֆիզիկայի ինստիտուտի շրջանավարտների դիպլոմների հանձնման արարողությանը ներկա էր Հայկական ատոմային էլեկտրակայանի ներկայացուցիչ Հունան Հունանյանը։ Շնորհավորելով շրջանավարտներին՝ նա ընդգծեց նորավարտ մասնագետների ներգրավման կարևորությունը հատկապես ֆիզիկայի և ռադիոֆիզիկայի ոլորտներում, ինչպես նաև ներկայացրեց Հայկական ատոմային էլեկտրակայանում կարիերայի զարգացման հնարավորությունները։
