Մաթեմատիկոս մասնագետների պատրաստումը ԵՊՀ-ում սկսվել է 1924 թ. հասարակագիտական ֆակուլտետի ֆիզիկամաթեմատիկական ենթաբաժնում, որը 1933 թ. դարձել է ֆիզիկամաթեմատիկական ֆակուլտետ: 1959 թ. այն տրոհվել է՝ ձևավորելով ֆիզիկայի և մեխանիկամաթեմատիկական ֆակուլտետները:
1963 թ. մեխանիկամաթեմատիկական ֆակուլտետում բացվել է մաթեմատիկական կիբեռնետիկայի մասնագիտությունը, որի հիման վրա 1972 թ. ստեղծվել է կիրառական մաթեմատիկայի և ինֆորմատիկայի ֆակուլտետը: 1988 թ․ մեխանիկամաթեմատիկական ֆակուլտետը բաժանվել է երկու առանձին՝ մեխանիկայի և մաթեմատիկայի ֆակուլտետների, իսկ 2007 թ. նրանք վերամիավորվել են՝ ձևավորելով մաթեմատիկայի և մեխանիկայի ֆակուլտետը:
Մաթեմատիկայի և մեխանիկայի ֆակուլտետում գործում է առկա ուսուցման եռաստիճան համակարգ՝ բակալավրիատական, մագիստրոսական և ասպիրանտական։
Ֆակուլտետում դասավանդում են հանրապետության անվանի և առաջատար մասնագետներ, որոնք վերապատրաստումներ են անցնում միջազգային հեղինակավոր ուսումնական և գիտական հաստատություններում, ինչպես նաև ներգրավված են տեղական ու միջազգային հետազոտական ծրագրերում։
Ֆակուլտետը գործակցության լայն կապեր ունի մաթեմատիկայի և մեխանիկայի ուղղությամբ մի շարք խոշոր կենտրոնների, բուհերի և գիտահետազոտական հիմնարկների հետ, որոնց թվում՝ ՀՀ ԳԱԱ մեխանիկայի և մաթեմատիկայի ինստիտուտները, Մոսկվայի Մ. Լոմոնոսովի անվան պետական համալսարանը, Ռուսաստանի ԳԱ Վ. Ստեկլովի անվան մաթեմատիկայի ինստիտուտը, Ռուսաստանի ԳԱ մեխանիկայի պրոբլեմների ինստիտուտը, Ուկրաինայի ԳԱԱ մեխանիկայի և կիրառական մաթեմատիկայի պրոբլեմների ինստիտուտը, Փարիզի համալսարանը, Լե Մանի համալսարանը (Ֆրանսիա), Ստոկհոլմի թագավորական տեխնոլոգիական ինստիտուտը (Շվեդիա), Այովայի պետական համալսարանը (ԱՄՆ), Կառլի համալսարանը (Չեխիա), Տամպերեի տեխնոլոգիական համալսարանը (Ֆինլանդիա) և այլն։
Ֆակուլտետում ուսանողական կյանքը առավել հետաքրքիր և արդյունավետ անցկացնելուն նպաստում է ուսանողական կառույցների ակտիվ գործունեությունը։ Փոխանակման ծրագրերի շրջանակում ֆակուլտետի ուսանողները հնարավորություն ունեն կրթություն ստանալու արտերկրի հեղինակավոր համալսարաններում։
Բակալավրիատի ուսանողները հնարավորություն ունեն մասնակցելու մանկավարժական կրթաբլոկի դասընթացներին (վճարովի հիմունքով) և ստանալու մանկավարժի որակավորում։
Ֆակուլտետի շրջանավարտները ստանում են մաթեմատիկայի, մեխանիկայի, վիճակագրության, ֆինանսական մաթեմատիկայի բակալավրի և մագիստրոսի որակավորում և հնարավորություն ունեն իրենց գիտելիքներն ու հմտությունները կիրառելու գիտահետազոտական տարբեր հիմնարկներում, միջնակարգ և բարձրագույն մասնագիտական ուսումնական հաստատություններում, հանրակրթական դպրոցներում, ՏՏ ոլորտի ընկերություններում, ֆինանսական, քաղաքական, արտադրության կառավարման և այլ ոլորտներում:
