Ակադեմիկոս Վիկտոր Համբարձումյանի անվան ընդհանուր ֆիզիկայի և աստղաֆիզիկայի ամբիոն

ԸՆԴՀԱՆՈՒՐ ՖԻԶԻԿԱՅԻ և ԱՍՏՂԱՖԻԶԻԿԱՅԻ ԱՄԲԻՈՆ

 Երևանի պետական համալսարանի ընդհանուր ֆիզիկայի և աստղաֆիզիկայի ամբիոնը հիմնադրվել է 1933 թ. ֆիզիկամաթեմատիկական ֆակուլտետի կազմում:

Ստեղծման օրվանից մինչև 1956 թ. այն կոչվել է էքսպերիմենտալ ֆիզիկայի ամբիոն, ապա վերանվանվել է ընդհանուր ֆիզիկայի ամբիոն:

30-ական թվականներին ամբիոնն աշխատել է, չունենալով ուսումնական լաբորատորիաներ: Առաջին՝ մեխանիկայի և մոլեկուլային ֆիզիկայի լաբորատորիաները կազմակերպվել են 1940 թ․, 1944 թ․՝ օպտիկայի լաբորատորիան: Մայրենի լեզվով առաջին լաբորատոր փորձերի ձեռնարկը հրատարակվել է 1953 թվականին: Այժմ ամբիոնի ուսումնական և գիտական լաբորատորիաներն ունեն անհրաժեշտ տեխնիկական հագեցվածություն, որոնց զգալի մասը ձեռք է բերվել պայմանագրային և դրամաշնորհային աշխատանքների միջոցով ձեռք բերված ֆինանսական միջոցների հաշվին։

1978-1989 թ.  ամբիոնում բացվել և հաջողությամբ գործել է «Մթնոլորտի ֆիզիկա» ուսումնական ծրագիրը, ներառելով գիտահետազոտական և կիրառական պայմանագրային աշխատանքներ ՀԽՍՀ հակակարկտային և Մոսկվայի օդերևութաբանական կայանների հետ:  Արդյունքում մասնագիտական կրթություն են ստացել մոտ 160 շրջանավարտներ, որոնք չափազանց կարևոր դեր են կատարել հանրապետությունում օթերևութաբանական ծառայության և շրջակա միջավայրի պահպանության աշխատանքներում:

1989թ.այն,փոխարինվել է «Ցածր ջերմաստիճանների ֆիզիկա» ուսումնական ծրագրով, ինչը գործել է մինչև 2000-ականների սկիզբը: Այդ  հարցում  ամբիոնին  լուրջ  օգնություն է ցույց տվել ԽՍՀՄ ԳԱ ֆիզիկական պրոբլեմների ինստիտուտը :

  2009 թ. Վ. Համբարձումյանի անվ. Աստղաֆիզիկայի ամբիոնը միացվել է Ընդհանուր ֆիզիկայի ամբիոնին և միացյալ ամբիոնը մինչ այժմ կոչվում է Վ. Համբարձումյանի անվ. Ընդհանուր ֆիզիկայի և Աստղաֆիզիկայի ամբիոն: Աստղաֆիզիկայի ամբիոնը բացվել է 1945 թ. ակադեմիկոս Վիկտոր Համբարձումյանի ղեկավարությամբ, ով մինչև 1994 թ. եղել է ամբիոնի վարիչ:

Ֆիզիկայի ֆակուլտետի բակալավրատում ամբիոնն ապահովում է «Կոնդենսացված միջավայրերի ֆիզիկա» ուղղության մասնագիտական առարկաների նկատելի, իսկ «Տարրական մասնիկների ֆիզիկա և աստղաֆիզիկա» ուղղության մասնագիտական առարկաների առավել մասը:

Մագիստրատուրայի համակարգում ամբիոնը մասնագետներ է պատրաստում «Աստղաֆիզիկա» մասնագիտությունով: Այն ընդգրկում է մի շարք ակտուալ բնագավառներ՝ ոչ ստացիոնար պրոցեսներ տիեզերքում, արեգակ և արեգակնային համակարգ, արտագալակտիկական աստղագիտություն, ռադիոաստղագիտություն, գերհաղորդականություն և գերհոսելիություն և այլն: Ժամանակակից ֆիզիկոս-մասնագետներ պատրաստելու գործում կարևոր նշանակություն ունի «Քվանտային տեխնոլոգիաների ֆիզիկայ» առարկայի դասավանդումը, որի ծրագիրը մշակվել է ամբիոնում:

2013 թ. հիմնադրվել և ամբիոնային հենքի վրա  գործում է «Ֆիզիկական էկոլոգիայի միջազգային» լաբորատորիան,որը ակտիվ համագործակցում է ինչպես արտասահմանյան մի շարք երկրների(ԱՄՆ,Ճապոնիա,Անգլիա,Ռուսաստան և այլն) համալսարանների համապատասխան լաբորատորիաների հետ , այնպես էլ ԵՊՀ-ի ներսում սերտ համագործակցության մեջ է կենսաբանության, քիմիայի, ռադիոֆիզիկայի, մաթեմատիկայի և մեխանիկայի ֆակուլտետների հետ:

Ընդհանուր ֆիզիկայիև աստղաֆիզիկայի ամբիոնը ուսումնա-գիտական մի մեծ կոլեկտիվ է, որն իր մեջ ընդգրկում է տարբեր գիտական թեմաներով զբաղվող խմբերի, որոնք կատարում են ժամանակակից գիտական մակարդակին համապատասխան կարևոր տեսական և փորձարարական աշխատանքներ: