Ռադիոֆիզիկայի և էլեկտրոնիկայի ամբիոն

Ռադիոֆիզիկայի և էլեկտրոնիկայի ամբիոնը կազմավորվել է 1938 թ. էլեկտրառադիոյի լաբորատորիայի հիմքի վրա էլեկտրականության և տատանումների ֆիզիկայի ամբիոն անվանումով։ Ամբիոնի հիմնադիր վարիչն է եղել պրոֆեսոր Հարություն Անժուրը (Չեբոտարյան): Հետագայում ամբիոնը վերանվանվել է ռադիոֆիզիկայի և էլեկտրոնիայի ամբիոն:

Տարբեր տարիների ամբիոնը ղեկավարել են ՀՀ ԳԱԱ ակադեմիկոսներ Ռ. Մարտիրոսյանը, Կ. Քոչարյանը, Ռ․ Ղազարյանը, ԳԱԱ թղթակից անդամ Ա. Հախումյանը, պրոֆեսորներ Պ. Պողոսյանը, Լ. Մովսիսյանը, Յու. Ավետիսյանը:

Ամբիոնը պատրաստում է ռադիոֆիզիկայի ոլորտի, հայրենական և միջազգային աշխատաշուկայում գիտատեխնիկական և ճարտարագիտական մրցունակ և բարձրակարգ մասնագետներ, ինչպես նաև կատարում գիտական հետազոտություններ՝ միտված ռադիոֆիզիկայի ոլորտում ծառացած արդիական խնդիրների լուծմանը։

Ամբիոնում կատարվող գիտական հետազոտությունների հիմնական ուղղություններն են`
ԳԲՀ, տերահերցային և օպտիկական տիրույթների էլեկտրամագնիսական ալիքների գեներացումը, փոխակերպումը, ճառագայթումն ու ընդունումը, տարբեր միջավայրերում և կառուցվածքներում այդ ալիքների տարածումը, կլանումը և տեղայնացումը, մակերևութային պլազմոն-պոլյարիտոնների առանձնահատկությունների ուսումնասիրումը հաճախությունների տեսանելի և տերահերցային տիրույթներում, կենսաբանական օբյեկտների հետ էլեկտրամագնիսական ճառագայթման փոխազդեցության ուսումնասիրումը, կենսաազդանշանների գրանցումն ու մշակումը:

Ամբիոնին կից գործում է Երևանի պետական համալսարանի, «Ինտեգրա թեքնոլոջիս ինթերնեյշընըլ» ՍՊԸ (ԱՄՆ), և ՀՀ ԳԱԱ ռադիոֆիզիկայի և էլեկտրոնիկայի ինստիտուտի (ՌՖԷԻ) համատեղ լաբորատորիան (ղեկավար՝ պրոֆեսոր Յու․ Ավետիսյան)։

Ամբիոնն իրականացնում է «Ռադիոֆիզիկա» բակալավրիատական և մագիստրոսական կրթական ծրագրերը։