Եվրոպագիտություն

ԵՊՀ եվրոպական ուսումնասիրությունների կենտրոնն իրականացնում է «Եվրոպագիտություն» մագիստրոսական ծրագիրը, որը մշակվել է Եվրոպայի առաջատար հետազոտական համալսարանների և գիտահետազոտական կենտրոնների հետ համատեղ:

1,5 տարի տևողությամբ «Եվրոպագիտություն» միջմասնագիտական մագիստրոսական կրթական ծրագրի (90 կրեդիտ) նպատակն է եվրոպական կառույցների քաղաքականության, տնտեսության, գործընկերության և անվտանգության համակարգերի ուսումնասիրության միջոցով զարգացնել ուսանողների վերլուծական հմտությունները և խնդիրների լուծման կարողությունները:

Ծրագիրը պատրաստում է եվրոպական ինտեգրման արդյունավետության գնահատման ու եվրոպականացման գործընթացների վերլուծության բարձրակարգ մասնագետներ, որոնք տիրապետում են համեմատական եվրոպագիտության մեթոդաբանությանը, ինչպես նաև եվրոպական ինտեգրման մոդելների և ռազմավարությունների մշակման համար պահանջվող կիրառական խնդիրների լուծման գործիքակազմին:

Ծրագիրը նպատակ ունի նաև ուսանողներին ապահովելու գիտելիքներով, հմտություններով և կարողություններով, որոնք անհրաժեշտ են պետական կառավարման և տեղական ինքնակառավարման մարմիններում, գիտահետազոտական կենտրոններում, քաղաքացիական հասարակության և միջազգային կազմակերպություններում աշխատելու համար: Այդ նպատակներին հասնելու համար կենտրոնն անցկացնում է նորարական և միջմասնագիտական դասընթացներ:

Դասընթացներն անցկացվում են հայերենով և անգլերենով: Ծրագրի շրջանակում դասավանդում են դասախոսներ՝ Հայաստանից և եվրոպական այլ երկրներից:

«Եվրոպագիտություն» մասնագիտության մագիստրոսական ծրագրի արտադրական և ուսումնական պրակտիկաների տևողությունն ութ շաբաթ է: Յուրաքանչյուր ուսանող ունի հնարավորություն ընտրելու կամ առաջարկելու իր նախընտրած միջազգային կազմակերպությունը կամ պետական կառույցը: Ուսանողներն արտադրական պրակտիկան անցնում են հետևյալ կառույցներում՝ ՀՀ նախագահի աշխատակազմ, ՀՀ արդարադատության և ֆինանսների նախարարություններ, բանկային համակարգ, Մարդու իրավունքների պաշտպանի գրասենյակ։

«Եվրոպագիտություն» մագիստրոսական ծրագիրը բաց է բոլոր այն դիմորդների համար, որոնք ունեն բակալավրի աստիճան, տիրապետում են հայերենին և անգլերենին:

Մագիստրատուրայի ընդունելության համար դիմորդները պետք է մուտքագրեն հետևյալ փաստաթղթերը (սքանավորված)․

ա. բարձրագույն կրթության դիպլոմը և դիպլոմի միջուկը* (միջուկի 1-ին էջը և գնահատականների միայն հայերեն հատվածը),
բ. լուսանկար՝ 3X4 չափսի,
գ. զինվորական գրքույկի (առկայության դեպքում) բնօրինակը (անհրաժեշտ է ներբեռնել 1-4-րդ և 18-19-րդ էջերը),
դ. անձնագիրը (1-4-րդ էջերը) կամ նույնականացման քարտը (երկկողմանի),
ե․ մոտիվացիոն նամակ (նամակն անհրաժեշտ է ուղարկել info@ces.am էլհասցեին)
զ. ընդունելության ծառայությունների համար գանձվող 3000 դրամի վճարման անդորրագիրը (ԵՊՀ «Արդշինբանկ» ՓԲԸ-ի 2470101276000001 հաշվեհամարին)։

Եթե փոխանցումը կատարված է առցանց տարբերակով, և անդորրագրի վրա չեն երևում վճարման նպատակը և դիմորդի անուն-ազգանունը, ապա դրանք անհրաժեշտ է ձեռագիր ավելացնել և սքանավորել:

*2023 թ. ԵՊՀ շրջանավարտները (դեռևս դիպլոմ չստացած) պետք է ներկայացնեն ակադեմիական տեղեկագիր՝ կնքված և ստորագրված ֆակուլտետի դեկանի կողմից, իսկ ՀՀ այլ բուհերի՝ 2023 թ. շրջանավարտները (դեռևս դիպլոմ չստացած)՝ տվյալ բուհի ռեկտորի ստորագրությամբ տեղեկանք՝ բակալավրիատի շրջանավարտ լինելու մասին, և ակադեմիական տեղեկագիր՝ կնքված և ստորագրված: 

Արտասահմանյան բուհի դիպլոմ ներկայացնելու դեպքում դիմորդը դիպլոմի հետ պետք է ներկայացնի նաև Ակադեմիական փոխճանաչման և շարժունության ազգային տեղեկատվական կենտրոնից տեղեկանք՝ դիպլոմի համարժեքության մասին:

ԵՊՀ մագիստրատուրայի ընդունելությունը կատարվում է առցանց եղանակով՝ admission.ysu.am կայքէջի միջոցով (տես՝ «Դիմում-հայտի լրացման կարգ» բաժնում):

Ուսման վարձը՝ տարեկան 900 000 ՀՀ դրամ։

Առկա են սահմանափակ թվով անվճար տեղեր:

Բոլոր դիմորդները պետք է հանձնեն ընդունելության քննություն, որի արդյունքների հիման վրա կայացվում է ընդունելության մասին որոշում։

Ծրագրի ընդունելության պահանջների և ժամկետների վերաբերյալ առավել մանրամասն տեղեկություններ ստանալու համար այցելե՛ք www.ces.am կայքէջ։

«Եվրոպագիտություն» միջմասնագիտական մագիստրոսական ծրագրի ընդունելության

ՀԱՐՑԱՇԱՐ

1. Եվրախորհրդի հիմնադրումն ու ընդլայնումը
2. Եվրախորհրդի ինստիտուցիոնալ համակարգն ու գործառույթները
3. Եվրաինտեգրման քաղաքական, սոցիալական, տնտեսական և հոգևոր-մշակութային նախադրյալները
4. ՀՀ-Եվրախորհուրդ համագործակցության հիմնական ձևաչափերը
5. Մարդու իրավունքների և հիմնարար ազատությունների Եվրոպական կոնվենցիայի դերն ու նշանակությունը ՀՀ-ում
6. ԵԱՀԿ-ի հիմնադրումն ու ընդլայնումը
7. ԵԱՀԿ-ի ինստիտուցիոնալ համակարգն ու գործառույթները
8. ՀՀ-ԵԱՀԿ համագործակցության հիմնական ձևաչափեր
9. Եվրամիության հիմնադրումն ու ընդլայնումը
10. Եվրամիության ինստիտուցիոնալ համակարգն ու գործառույթները
11. Խորհրդարանական ժողովրդավարության մշակույթը ԵՄ անդամ պետություններում
12. Կուսակցություններն ու քաղաքական խմբերը Եվրոպական խորհրդարանում
13. Եվրոպական քաղաքացիական հասարակության ինստիտուցիոնալ համակարգը (հասարակական կազմակերպություններ, արհմիություններ, սոցիալական ցանցեր)
14. Եվրոպական հարևանության քաղաքականության սուբյեկտները, նպատակներն ու խնդիրները:
15. Արևելյան գործընկերության սուբյեկտները, նպատակներն ու խնդիրները
16. ՀՀ-ԵՄ գործընկերության և համագործակցության հիմնական մակարդակները
17. ԵՄ արտաքին և անվտանգության քաղաքականության ընդհանուր բնութագիրը Հարավային Կովկասում
18. Մարդու իրավունքների պաշտպանության ներպետական և Եվրոպական ընթացակարգերը (ԵՄ, ԵԽ, ԵԱՀԿ)
19. Հարավային Կովկասը Եվրաինտեգրման գործընթացում
20. ՀՀ քաղաքական համակարգը Եվրաինտեգրման գործընթացում
21. ՀՀ կուսակցությունները Եվրաինտեգրման գործընթացում
22. ՀՀ տնտեսությունը Կոպենհագենի տնտեսական չափանիշների տեսանկյունից

Գրականության ցանկ

• Ալեքսանյան Ա., Արևմտյան ժողովրդավարությունների քաղաքական համակարգեր. Տեսություն և արդիականություն: Եր., 2009:
• Հայրապետյան Գ., Բաղդասարյան Վ., Հայաստանի տնտեսությունը Կոպենհագենի տնտեսական չափանիշների տեսանկյունից (վերլուծություն)։
• Քաղաքագիտություն: Ուսումնական ձեռնարկ (Խմբ. Մանուչարյան Հ. Գ. և ուրիշներ): Եր.: ԵՊՀ հրատ., 2006:
• Եվրոպական արհմիությունների համադաշնություն։
• Եվրոպական ՀԿ-ներ։
• Տեղեկատվական պարբերական «Եվրոպան այսօր» (հանդես 1)։
• Տեղեկատվական պարբերական «Եվրոպան այսօր» (հանդես 2)։
• Տեղեկատվական պարբերական «Եվրոպան այսօր» (հանդես 3)։
• Eastern Partnership Civil Society Forum․
• EUROPA-Connect with EU on Social Networks․
• Use of Social Media in EU communication – European Commission․