ԵՊՀ Շառլ Ազնավուրի անվան մշակույթի կենտրոնում տեղի ունեցավ կորեերենին և կորեական մշակույթին նվիրված ցերեկույթ, որի ավարտին կորեերենի ութամսյա դասընթացի մասնակիցները ստացան ավարտական վկայականներ:
ԵՊՀ միջազգային հարաբերությունների ֆակուլտետի նախաձեռնությամբ արդեն երրորդ անգամ համալսարանում կազմակերպվող միջոցառումը նպատակ ուներ վերարժևորելու ԵՊՀ-ում կորեերենի դերը և ուսանողների շրջանում մեծացնելու հետաքրքրությունը կորեերենի և կորեական մշակույթի նկատմամբ։
Միջոցառման ընթացքում ԵՊՀ-ում կորեերեն սովորող ուսանողները հանդես եկան կորեական հեքիաթի հիման վրա բեմադրված ներկայացմամբ, բանաստեղծություններով, երգ ու պարով: Միջոցառմանը պարային համարով ելույթ ունեցավ նաև Հայաստանում քեյ-փոփ պարային խումբը` «Միչյոսը», որը մի քանի տարի շարունակ Հայաստանում կազմակերպվող կորեական պարային մրցույթի հաղթող է ճանաչվել։
Միջոցառմանը ներկա էին ԵՊՀ միջազգային հարաբերությունների ֆակուլտետի դեկանի ժամանակավոր պաշտոնակատար, պատմական գիտությունների թեկնածու Տիգրան Եփրեմյանը, Դիվանագիտական ծառայության և մասնագիտական հաղորդակցման ամբիոնի վարիչ, բ.գ.թ., դոցենտ Սյուզաննա Նավասարդյանը, Հայաստանում կորեերեն դասավանդողների ասոցիացիայի անդամները։
Ինչպես կորեական մշակույթին նվիրված երկրորդ ցերեկույթին, այս անգամ ևս ԵՊՀ-ում անցկացված կորեերենի ութամսյա դասընթացի մասնակիցները ստացան ավարտական վկայականներ:
Ցերեկույթի ավարտին ԵՊՀ միջազգային հարաբերությունների ֆակուլտետի դեկանի ժամանակավոր պաշտոնակատար Տիգրան Եփրեմյանը դասընթացի մասնակիցներին հանձնեց վկայականներ։ Նա շնորհավորեց ուսանողներին՝ կարևորելով ասիական մշակույթի և լեզուների իմացության դերը։ Տիգրան Եփրեմյանի խոսքով՝ ուսանողները կապող օղակ են հայկական և կորեական մշակույթների միջև և նրանց հետագա գործունեությունը նպաստելու է նաև հայ-կորեական համագործակցության ամրապնդմանը։
Սյուզաննա Նավասարդյանը, անդրադառնալով ԵՊՀ-ում կորեերենի ուսուցմանը, ասաց. «2019 թվականից միջազգային հարաբերությունների ֆակուլտետում կորեերենը դասավանդվում է որպես երկրորդ օտար լեզու: Մեր ուսանողները բարձր արդյունքներ են գրանցում կորեերենի բանավոր խոսքի և կորեական ազգային մշակույթի մրցույթում՝ գրավելով 1-ին, 2-րդ և 3-րդ պատվավոր հորիզոնականներ ու արժանանալով պատվոգրերի և դրամական պարգևների։ Այս հաջողություններին ուսանողները հասնում են ԵՊՀ դասախոսների տված գիտելիքների ու լեզվամշակութային հմտությունների շնորհիվ»:
Արդեն 5 տարի ԵՊՀ-ում կազմակերպվող կորեերենի ութամսյա դասընթացներին ամեն տարի մեծ թվով ուսանողներ են մասնակցում ոչ միայն ԵՊՀ տարբեր ֆակուլտետներից, այլև այլ բուհերից, ինչը վկայում է կորեերենի և կորեական մշակույթի նկատմամբ ուսանողների ունեցած մեծ հետաքրքրության մասին:
