1957 թ. ԵՊՀ-ում գործող Ֆիզիկամաթեմատիկական ֆակուլտետում բացվել է Հաշվողական մաթեմատիկայի ամբիոնը, որի հիմքի վրա հետագայում՝ 1971 թ., հիմնադրվել է Կիրառական մաթեմատիկայի ֆակուլտետը, որն էլ հետագայում վերանվանվել է Ինֆորմատիկայի և կիրառական մաթեմատիկայի (ԻԿՄ) ֆակուլտետ։ Ֆակուլտետը Հայաստանի առաջատար գիտակրթական կենտրոնն է ինֆորմատիկայի և կիրառական մաթեմատիկայի ուղղություններով, որտեղ պատրաստվում են ծրագրավորող բարձրակարգ կադրեր։
Ֆակուլտետի կայացման, գիտական ուղղությունների որոշման ու ֆակուլտետում դասավանդելու համար կադրերի պատրաստման գործում վճռորոշ դեր է ունեցել ականավոր գիտնական, ԽՍՀՄ ԳԱ թղթակից անդամ Ս. Ն. Մերգելյանը: Վերջինս եղել է նաև նորաստեղծ ֆակուլտետի երեք ամբիոններից մեկի` Թվային անալիզի ամբիոնի առաջին վարիչը:
Ֆակուլտետում գործում է ուսուցման եռաստիճան համակարգ՝ բակալավրիատական, մագիստրոսական և ասպիրանտական։
Ուսումնական պլանով ԻԿՄ ֆակուլտետի ուսանողների համար նախատեսված է մաթեմատիկական հիմնարար պատրաստվածություն, կարդացվում են դասընթացներ` կապված ժամանակակից ինֆորմացիոն տեխնոլոգիաների հետ:
Ֆակուլտետի ամբիոններում աշխատում են գիտության դոկտորներ և թեկնածուներ, որոնցից շատերը հայտնի են ոչ միայն Հայաստանում, այլև նրա սահմաններից դուրս:
ԻԿՄ ֆակուլտետն իր գործունեության ողջ ընթացքում արդյունավետ համագործակցել է Երևանի մաթեմատիկական մեքենաների գիտահետազոտական ինստիտուտի և ՀՀ ԳԱԱ ինֆորմատիկայի և ավտոմատացման պրոբլեմների ինստիտուտի հետ` (նախկինում՝ ՀՍՍՀ ԳԱ հաշվողական կենտրոն)՝ այդ կազմակերպություններին մշտապես տալով բարձրակարգ կադրեր։ Ֆակուլտետը գործուն կապեր ունի Գերմանիայի, Ֆրանսիայի, ԱՄՆ-ի, Լեհաստանի, Շվեդիայի և այլ երկրների մի շարք համալսարանների ու գիտական կենտրոնների, ինչպես նաև Մ. Վ. Լոմոնոսովի անվան Մոսկվայի պետական համալսարանի, Ռուսաստանի ԳԱԱ. Ա. Դորոդնիցինի անվան հաշվիչ կենտրոնի, Ռուսաստանի ԳԱ Վ. Ա. Ստեկլովի անվան մաթեմատիկական ինստիտուտի հետ: Ֆակուլտետի աշխատակիցներն ու ասպիրանտները մասնակցում են միջազգային գիտաժողովների, և նրանց գիտական աշխատանքները տպագրվում են գիտական հեղինակավոր պարբերականներում:
Ֆակուլտետում ուսանողական առօրյան ավելի հետաքրքիր է դառնում ուսանողական կառույցների ակտիվ գործունեության շնորհիվ։ Փոխանակման ծրագրերի շրջանակում ֆակուլտետի ուսանողները հնարավորություն ունեն կրթություն ստանալու արտերկրի հեղինակավոր համալսարաններում։ Ուսանողների պարտադիր ուսումնական պրակտիկան հիմնականում կազմակերպվում է ՀՀ ԳԱԱ մաթեմատիկայի, մեխանիկայի ինստիտուտներում, ինչպես նաև ՀՀ ԳԱԱ ինֆորմատիկայի և ավտոմատացման պրոբլեմների ինստիտուտում։
Բակալավրիատի ուսանողները հնարավորություն ունեն մասնակցելու մանկավարժական կրթաբլոկի դասընթացներին (վճարովի հիմունքով) և ստանալու մանկավարժի որակավորում։
Ֆակուլտետի շրջանավարտները մեծ պահանջարկ ունեն աշխատաշուկայում․ նրանցից շատերն աշխատում են մի շարք երկրների տարբեր կազմակերպություններում` ակադեմիական և գիտահետազոտական ինստիտուտներում, բարձրագույն ուսումնական հաստատություններում, պետական և կառավարական կազմակերպություններում, ՏՏ ոլորտի ընկերություններում, առևտրային բանկերում և այլուր:
