Ընդհանուր տվյալներ
Սույն նախագծի նպատակն է ուսումնասիրել սուլֆոն պարունակող տարբեր համակարգեր, հիմնականում ջրային երկ- և եռբաղադրիչ լուծույթները՝ օգտագործելով տարբեր մակրոսկոպիական և միկրոսկոպիական մոտեցումներ: Օրգանական լուծիչները, հատկապես սուլֆոնները, լայնորեն օգտագործվում են լիթիում-իոնային մարտկոցներում՝ շնորհիվ իրենց բարձր դիէլեկտրիկ հաստատունի, կաթոդների և անոդների հետ համատեղելիության։ Ներկայումս, օրգանական լուծիչ/ջուր պարունակող հիբրիդային էլեկտրոլիտները դիտարկվում են խոստումնալից տարբեր մետաղ-իոնային ջրային մարտկոցներում կիրառման տեսանկյունից: Նշված համակարգերում օգտագործվող հիբրիդային լուծիչը կարող է կտրուկ փոխել այս մարտկոցների հատկությունները: Հետևաբար՝ հիբրիդային էլեկտրոլիտների հատկությունները «կարգավորելու» ռազմավարություն է բոլոր միջմոլեկուլային փոխազդեցությունների բացահայտումը, որոնք առկա են համակարգում կոնցենտրացիոն լայն տիրույթում: Սույն նախագծի իրականացումը թույլ կտա բացահայտել սուլֆոն/ջուր համակարգերի կառուցվածքային, թերմոդինամիկական և սպեկտրային հատկությունները՝ հիմնվելով քվանտաքիմիական հաշվարկային մեթոդների, ինֆրակարմիր և Ռաման սպեկտրոսկոպիայի մեթոդների, մակերևութային լարվածության, մածուցիկության և խտության չափումների վրա: Նշված համակարգերի ֆիզիկաքիմիական հատկությունների իմացությունը օգտակար կլինի քիմիական տեխնոլոգիաներում դրանց հնարավոր կիրառությունները գնահատելու համար:
Օտարերկրյա գործընկեր
Կույավսկի Վոյցեխ, Նիկոլայ Կոպեռնիկոսի համալսարան (Տորուն)
