«Հեքիաթի և առակի դերը երեխաների կյանքում»․ հանդիպում-քննարկում ԵՊՀ-ում

Հանդիպումն անցկացվեց համաժամանակյա ձևաչափով․ ծնողներն ու երեխաները հեքիաթներին ու առակներին առնչվող պատմություններ լսեցին զուգահեռ սրահներում։

Ծնողների հետ հանդիպում-զրույցն անցկացրեց ԵՊՀ եվրոպական լեզուների և հաղորդակցության ֆակուլտետի անգլիական բանասիրության ամբիոնի դասախոս, բանասիրական գիտությունների դոկտոր, պրոֆեսոր Ալվարդ Ջիվանյանը։ 

Նա ներկայացրեց հեքիաթի կարևորությունը երեխաների դաստիարակության, ծնողավարման գործում, ինչպես նաև մանրամասնեց հեքիաթներ ընտրելու առանձնահատկությունները՝ նկատի ունենալով երեխաների տարիքը, անձնային յուրահատկությունները, նախասիրությունները։

Խոսելով տարբեր հեքիաթների մասին՝ Ա․ Ջիվանյանն անդրադարձավ «չար հեքիաթներին», որտեղ դիպաշարը զարգանում է ծնողների ու զավակների հարաբերությունների ոչ սովորական օրինակով։ Այսպես՝ «Չարի վերջը» հեքիաթում մայր կկուն մյուս զավակներին փրկելու համար պատրաստ է զոհաբերելու ձագուկներից մեկին, «Հենզելն ու Գրետելը» հեքիաթում ծնողները որոշում են ազատվել իրենց երեխաներից և այլն։ 

«Նմանօրինակ սյուժեները բավականին հաճախադեպ են և գրանցում են հաջողություններ՝ տարածվելով ու սիրվելով շատերի կողմից։ Պետք է նկատի ունենալ, որ հեքիաթը չի կարող կառուցվել առանց բացասական կերպարների, հետևաբար այսօրինակ հեքիաթներից ամբողջապես խուսափումը սխալ է»,- պատմեց Ա․ Ջիվանյանը։

Նա անդրադարձավ տարբեր դիպաշարերով հեքիաթների առկայության կարևորությանն ու անհրաժեշտությանը՝ ակտիվ քննարկում ծավալելով ներկաների հետ։

Զուգահեռ սրահում երեխաների հետ քննարկման առանցքում առակներն էին։ Հանդիպմանը բանախոսություն ներկայացրեց ԵՊՀ հայ բանասիրության ֆակուլտետի ակադեմիկոս Հրանտ Թամրազյանի անվան հայ գրականության պատմության և գրականության տեսության ամբիոնի դասախոս, դոցենտ Նվարդ Վարդանյանը:

Նա ներկայացրեց, թե ինչ է առակը, ինչպես է առաջացել և զարգացել այն։ Երեխաները հնարավորություն ունեցան ծանոթանալու հայտնի առակագիրներ Եզոպոսի, Իվան Կռիլովի, Մխիթար Գոշի ու Վարդան Այգեկցու ստեղծագործություններին։

Հանդիպման ինտերակտիվությունն ապահովվեց առակների ընթերցմամբ և դրանց շուրջ ակտիվ քննարկման ծավալմամբ։ Երեխաները հնարավորություն ունեցան նաև դիտելու կարճամետրաժ մուլտֆիլմեր՝ առակների հիմքով, ինչպես նաև հայտնի առակներից նկարելու պատկերներ։ 

Հավելենք, որ ծնողների և երեխաների հետ հանդիպումը հնարավորություն ընձեռեց ևս մեկ անգամ ուշադրություն դարձնելու երեխաների կյանքում հեքիաթների ու առակների ունեցած կարևորությանը․ չէ՞ որ մանկության խայտաբղետ կտավում հեքիաթներն ու առակներն այն ոսկե ներկերն են, որոնք ընդգծում են արժեքային համակարգի կարևոր դրույթներ՝ բարոյականություն, քաջություն, մարդասիրություն և մի շարք այլ հիմնաքարային սկզբունքներ։