«Հնարավորությունների տոնավաճառ»՝ ԵՊՀ առաջինկուրսեցիների համար

Տոնական օրվա ընթացքում ԵՊՀ տարբեր ստորաբաժանումները ներկայացրին իրենց գործունեությունը, առաջարկվող հնարավորությունները, պատասխանեցին ուսանողներին հետաքրքրող հարցերին:

Առաջինկուրսեցիները տեղեկացան համալսարանական կյանքի (լրացուցիչ կրթական հնարավորություններ, ուսանողներին տրամադրվող զեղչեր, ներքին հաղորդակցություն, միջազգային համագործակցություն, տեղեկատվական համակարգեր, մշակութային կյանք, կարիերայի հնարավորություններ և այլն) և ենթակառուցվածքների գործունեության մասին: 

Միջոցառմանն առանձին տաղավարներով ներկայացան Տեղեկատվական տեխնոլոգիաների վարչությունը, Տեղեկատվական տեխնոլոգիաների կրթական և հետազոտական կենտրոնը, Ուսումնամեթոդական վարչությունը, Ֆինանսական վերլուծությունների վարչությունը, Գիտական քաղաքականության վարչությունը, Ընդհանուր բաժինը, Սարգիս և Մարի Իզմիրլյանների անվան գրադարանը, Միջազգային համագործակցության վարչությունը, Շրջանավարտների և կարիերայի կենտրոնը, Շառլ Ազնավուրի անվան մշակույթի կենտրոնը, Շարունակական կրթության կենտրոնը, Լ. Ղարիբջանյանի անվան պատմության թանգարանը, Մարքեթինգի բաժինը, Ուսանողական գիտական ընկերությունը, Ուսանողական խորհուրդը, Ֆիզիկական դաստիարակության և սպորտի ամբիոնը, Բյուրականի ուսումնաարտադրական բազան: 

ԵՊՀ ռեկտոր Հովհաննես Հովհաննիսյանը և պրոռեկտորները շրջայց կատարեցին տաղավարներով։

Միջոցառումը նաև բացառիկ հնարավորություն էր առաջինկուրսեցիների համար՝ հանդիպելու և շփվելու համակուրսեցիների ու բարձր կուրսերի ուսանողների, դասախոսների և համալսարանական անձնակազմի հետ։

Հնարավորությունների ցուցահանդեսի ժամանակ կազմակերպվեցին հետաքրքիր խաղեր, վիկտորինաներ, մրցույթներ, քվեսթ: Բացի դրանից՝ ուսանողներն անմիջապես տեղում հնարավորություն ունեցան գրանցվելու, անդամագրվելու և հետագայում մասնակցելու ԵՊՀ ստորաբաժանումների կողմից իրականացվող տարբեր ծրագրերի, մշակութային միջոցառումների ու դասընթացների, ինչպես նաև կամավորական աշխատանքների։

Այս տարի ուսանողներին իրազեկելու գործընթացը մեկնարկել է դեռ ավելի վաղ. առաջին փուլում՝ նախքան ուսումնական տարվա մեկնարկը, Ուսանողների հետ տարվող աշխատանքների կենտրոնը կազմակերպել է ուսանողների իրազեկման միջոցառումների շարք, որի ընթացքում առաջինկուրսեցիներին ներկայացվել են իրենց իրավունքները, պարտականությունները, ուսանողական ինքնակազմակերպման ձևերը և այլն: Արդեն երկրորդ փուլում՝ ուսումնական տարվա առաջին օրը (այս տարի՝ սեպտեմբերի 2-ին), ուսանողներին ջերմորեն ընդունել են ֆակուլտետներում՝ ներկայացնելով ուսումնական գործընթացի կազմակերպման հետ կապված անհրաժեշտ բոլոր մանրամասները, կրթական ծրագրերը, ընտրված կրթական ծրագրերում առկա կարիերայի հնարավորությունները և այլն:

««Հնարավորությունների տոնավաճառ» միջոցառումն ուսանողներին իրազեկելու գործընթացի երրորդ բաղադրիչներից է, որի շրջանակում ԵՊՀ ստորաբաժանումները ներկայացրին իրենց գործունեությունը: Մենք փորձում ենք հենց ամենասկզբից իրազեկել ուսանողներին այն բոլոր հնարավորությունների ու կրթական ծառայությունների մասին, որոնք առկա են Երևանի պետական համալսարանում: Նախորդ և այս տարվա միջոցառման տարբերությունն էլ այս եռափուլության և փոխկապակցվածության մեջ է»,- ասաց ԵՊՀ զարգացման և նորարարությունների գծով պրոռեկտոր Միքայել Հովհաննիսյանը։

Միջոցառման շրջանակում ուսանողները ոչ միայն տեղեկացան բուհի ընձեռած հնարավորությունների մասին, այլ նաև իմացան այդ հնարավորությունների վերաբերյալ շարունակաբար նորություններ, հավելյալ տեղեկություններ ստանալու մեթոդներն ու ուղիները: Այս տեսանկյունից ուսանողների համար տոնավաճառը նաև գործողությունների քարտեզագրման նշանակություն ուներ: 

Պրոռեկտորը փաստեց, որ այս տարի ընդլայնվել է ցուցահանդեսին մասնակցող ԵՊՀ ստորաբաժանումների շրջանակը: Միջոցառման ժամանակ ներկայացվեցին նաև այս տարվա ընթացքում ԵՊՀ-ի արձանագրած ձեռքբերումները։ Առաջինկուրսեցիները իրազեկվեցին ժամանակակից սարքավորումներով հագեցած ԵՊՀ մարզասրահի մասին: 

«Մենք կարևորում ենք հենց հարցուպատասխանի միջոցով տեղեկություն տրամադրելու եղանակը և այս միջոցառման շնորհիվ փորձում թիրախավորել այն հաղորդակցական բացը, որն անհրաժեշտ է պարբերաբար լրացնել: Մեզ համար առանցքային նշանակություն ունեն ուսանողների մոտիվացվածությունը համալսարանում սովորելու, համալսարանական կյանքով ապրելու ցանկությունը բարձրացնելը, և այդ ուղղությամբ աշխատելու համար գործադրում ենք մեր բոլոր ջանքերը»,- նշեց Միքայել Հովհաննիսյանը՝ կարևորելով նմանօրինակ միջոցառումների արդյունավետությունը ոչ միայն ԵՊՀ-ի, այլև բազմաթիվ համալսարանների փորձով: Տարիներ շարունակ նմանօրինակ միջոցառումներ անցկացրել են Հարվարդի, Օքսֆորդի, Քեմբրիջի համալսարանները: 

Միքայել Հովհաննիսյանը, խոսելով հետագայում ներդրվող ծրագրերի մասին, տեղեկացրեց, որ այժմ մշակվում է ուսանողական կյանքին արդյունավետ ինտեգրվելուն նպաստող սեմինարների շարք առաջինկուրսեցիների համար։

Պրոռեկտորն առաջինկուրսեցիներին խորհուրդ տվեց օգտվել բոլոր այն հնարավորություններից, որ համալսարանն ընձեռում է, չսահմանափակվել նրանով, ինչ կա լսարանում, չվախենալ և չխուսափել հարցեր տալուց, լինել նախաձեռնող: 

«Ուսանողական տարիները ուսանողի համար չափազանց կարևոր են։ Սա բացառիկ հնարավորություն է աշխատելու, կենտրոնանալու: Սա փուլ է, որտեղ ուսանողը կարող է իրեն լիովին նվիրել սովորելուն, իսկ սովորելու համար ջանք գործադրելը բանական մարդու համար շատ հաճելի է»,- ընդգծեց Մ. Հովհաննիսյանը: 

ԵՊՀ մարքեթինգի բաժնի ղեկավար Ազնիվ Գրիգորյանը միջոցառման նշանակությունը կարևորեց հաղորդակցության տեսանկյունից՝ ընդգծելով, որ «Հնարավորությունների տոնավաճառ»-ը ևս մեկ հարթակ է համալսարանի կրթական ու գիտահետազոտական աշխատանքները, գրանցած արդյունքները և հնարավորությունները առաջինկուրսեցիներին ներկայացնելու համար։

«Մարքեթինգի բաժինն առանձին տաղավարով ներկայացրեց համալսարանի բրենդային ապրանքները, որոնք մշտապես առանձնահատուկ ուշադրության են արժանանում նմանօրինակ ցուցահանդես-միջոցառումների ժամանակ։ 

Օգտվելով ստեղծված հնարավորությունից՝ առաջինկուրսեցիներին ներկայացրինք Մարքեթինգի բաժնի գործունեությունը, որի հիմնական գործառույթներից են նպաստելը ԵՊՀ հանրային դիրքի շարունակական բարելավմանը հաղորդակցական նյութերի տարածման միջոցով և աջակցելը ներքին հաղորդակցության կազմակերպմանը»,- ասաց Ազնիվ Գրիգորյանը՝ հորդորելով ուսանողներին համալսարանական կյանքի, ուսումնական գործընթացի վերաբերյալ անհրաժեշտ տեղեկություններն իմանալու համար հետևել ԵՊՀ պաշտոնական կայքէջին և սոցիալական հարթակներում համալսարանի պաշտոնական էջերին։

Նշենք, որ առաջինկուրսեցիների ուսումնական ճամփորդության սկիզբն ազդարարող միջոցառմանը համերգային ծրագրով հանդես եկավ «YSU Band»-ը:

Հիշեցնենք, որ նախորդ տարի ևս ԵՊՀ-ում անցկացվել է առաջինկուրսեցիների դիմավորման տոնական միջոցառում՝ «105-ՐԴ ԲԱՐԵՎԸ» խորագրով: