ԵՊՀ-ՈՒՄ ԱՆՑԿԱՑՎԵՑ ՄԻՋՊԵՏԱԿԱՆ «ՀԱՂԹԱՆԱԿԻ ԹԵԼԱԴՐՈՒԹՅՈՒՆ» ՄՐՑՈՒՅԹԸ
Երևանի պետական համալսարանում այսօր անցկացվեց համառուսական պատմական «Հաղթանակի թելադրություն» («Диктант Победы») խորագիրը կրող գրավոր մրցույթը, որը նվիրված էր Հայրենական մեծ պատերազմին։
![Competition-dedicated-to-Victory-day](/sites/default/files/styles/large_slide/public/migrated/images/MIyafQOAVqctNoDtCgu0oKnT1m.jpg?h=bccd1fa5&itok=uNvAAFqQ)
Նշենք, որ այս մրցույթը կազմակերպվում է Հայրենական պատերազմի պատմության հետազոտության վրա ավելի մեծ ուշադրություն հրավիրելու, պատմական ճանաչողությունը բարձրացնելու և հայրենասիրական դաստիարակությունը խթանելու նպատակով։ Ավելի մանրամասն տեղեկություններ, այդ թվում՝ մրցույթի կազմակերպիչների մասին, կարելի է գտնել «диктантпобеды.рф» կայքում։
Հայաստանում միջոցառումը համակարգում է Երևանում Ռուսաստանի գիտության և մշակույթի կենտրոնը։
Մեզ հետ զրույցում Ռուսաստանի գիտության և մշակույթի կենտրոնի մամուլի քարտուղար Ելենա Շուվաևա-Պետրոսյանն ասաց, որ մրցույթին կարող են մասնակցել բոլոր ցանկացողները՝ անկախ տարիքից և կրթությունից։
««Հաղթանակի թելադրություն» մրցույթի կազմակերպիչները մտադրություն ունեն այն դարձնելու ամենամյա։ Եթե անցած տարի միջոցառումը համառուսական էր և անցկացվում էր միայն Ռուսաստանի տարածքում, ապա այս տարի այն ընդգրկում է 23 երկիր»,- ասաց նա։
Մինչ միջոցառման սկիզբը ԵՊՀ պատմության ֆակուլտետի դեկան Էդիկ Մինասյանը ողջունեց հյուրերին ու մրցույթի մասնակիցներին և կարճ ներկայացրեց համալսարանի պատմությունը։ Նա ասաց, որ ինքն ուրախ է ողջունել հյուրերին ԵՊՀ-ում և մաղթում է բոլորին հաջողություն։
«Հաղթանակի թելադրություն»-ն 20 հարցից բաղկացած թեստային առաջադրանք է, որը լրացնելու համար մասնակիցներին տրվեց 45 րոպե ժամանակ։
Հաղթողները ստանալու են խրախուսական նվերներ և հրավիրվելու են Մոսկվա՝ մասնակցելու Հայրենական մեծ պատերազմում հաղթանակի օրվան նվիրված զորահանդեսին։
Մրցույթի կազմակերպիչները միջոցառման վերջում ասացին, որ արդյունքները հայտնի են լինելու հունիսի 12-ին և տեղադրված «диктантпобеды.рф» կայքում։
Մարինա Առաքելյան