ԴԱՍԱԽՈՍՈՒԹՅՈՒՆՆԵՐԻ ՇԱՐՔ՝ ՆՎԻՐՎԱԾ «ՄԱՅՐԵՆԻԻ ՕՐՎԱՆ»

Դպրոցներում ԵՊՀ-ից դասախոսությամբ հանդես են եկել Հայ բանասիրության ֆակուլտետի հայոց լեզվի ամբիոնի դոցենտ Շուշան Գևորգյանը, դոցենտ, բան. գիտ. դոկտոր Փառանձեմ Մեյթիխանյանը, դոցենտ Նարինե Դիլբարյանը, Հայ նորագույն գրականության ամբիոն ասիստենտ Սևակ Ղազարյանը, Հայոց լեզվի պատմության ամբիոնի դոցենտ, բան. գիտ. թեկ. Սուսաննա Գրիգորյանը, նույն ամբիոնի բան. գիտ. թեկ., ասիստենտ Նաիրա Պարոնյանը, Հայ գրականության ամբիոնի դոցենտ, բան. գիտ. թեկ. Սարգիս Մխիթարյանը, Ժուռնալիստիկայի ֆակուլտետի տպագիր և հեռարձակվող լրատվամիջոցների ամբիոն վարիչ, բան. գիտ. դոկտոր, պրոֆեսոր Մուշեղ Հովսեփյանը:  

Նշենք, որ փետրվարի 21-ը Հայաստանի պետական տոնացույցում իր արժանի տեղն ունի, այն ՅՈՒՆԵՍԿՕ-ի կողմից ճանաչվել է «Մայրենիի օր»:

Հայ բանասիրության ֆակուլտետի հայոց լեզվի ամբիոնի դոցենտ Շուշան Գևորգյանը դասախոսությամբ հանդես է եկել Երևանի Մ. Գալշոյանի անվան թիվ 148 դպրոցում: 

Այս դպրոցում այսօր դպրոցականները հանդես եկան Ա. Շիրվանզադեին նվիրված բաց դասով: Մինչ դասախոսությանն անցնելը՝ ԵՊՀ դոցենտն արժևորեց «Մայրենիի օրվան» նվիրված տոնը, ինչպես նաև կարևորեց ընթերցանության և գրքի դերն անհատի կյանքում:

Այնուհետև Շ. Գևորգյանը դասախոսություն կարդաց հայոց լեզվի գործառույթների և խոսքային բարեվարքության մասին: Ներկայացրեց, թե ինչպիսի գործառույթներ ունի հայերենը, ինչպես է այն դրսևորվում գրական, գեղարվեստական, պաշտոնական, գիտական և հրապարակախոսական ոճերում: ԵՊՀ դասախոսը նաև խոսեց զանգվածային լրատվամիջոցների և գովազդի լեզվի մասին:

Հանդիպման ընթացքում աշակերտներն արտասանեցին դասական գրողների բանաստեղծություններից, որից հետո տեղի ունեցավ հնչած բանաստեղծությունների գեղարվեստական վերլուծություն: Հանդիպման վերջում Շ. Գևորգյանը ներկայացրեց ֆակուլտետի կառուցվածքը, իրականացվող կրթական ծրագրերը:

ԵՊՀ ժուռնալիստիկայի ֆակուլտետի տպագիր և հեռարձակվող լրատվամիջոցների ամբիոն վարիչ, բան. գիտ. դոկտոր, պրոֆեսոր Մուշեղ Հովսեփյանն այսօր այցելել էր Թաթուլ Կրպեյանի անվան թիվ 62 ավագ դպրոց:

 Դպրոցականների հետ հանդիպման ընթացքում նա անդրադարձավ հեռուստատեսությունում, ռադիոյում և տպագիր մամուլում մայրենիի անաղարտության խնդրին: «Մեր խնդիրն է գլոբալիզացիայի այս ժամանակաշրջանում ոսկեղենիկ հայոց լեզուն անաղարտ պահել: Եթե մենք նախանձամուտ չլինենք մեր լեզվի անաղարտության պահպանման խնդիրներին, մասնավորապես եթերում, ապա այն կունենա շատ վատ հետևանքներ»,-հավելեց նա:   

Բ. Ժամկոչյանի անվան թիվ 119 ավագ դպրոցում Հայոց լեզվի ամբիոնի դոցենտ, բան գիտ. դոկտոր Փառանձեմ Մեյթիխանյանը հանդես եկավ «Անուն ազգանունն՝ իբրև ազգի արժեմշակույթի պարտադիր բաղադրիչ» և «Գրչության արվեստ, հայ ձեռագրական հարստությունն աշխարհում» թեմաներով դասախոսությամբ:

Փ. Մեյթիխանյանը հանդիպման ընթացքում խոսեց հայկական անվանարանի մասին, անդրադարձավ հայկական անուններին, ազգանուններին, հայրանուններին, կեղծանուններին և մականուններին:

Դասախոսության ավարտին ԵՊՀ դասախոսը կարևորեց մայրենիի դերը՝ իբրև մեր ժողովրդի ինքնության ամենակարևոր դրսևորում, որն իր արձանագրումն է ստանում մեր անուններում: «Մենք պետք է ամեն գնով պահենք և պահպանենք մեր հայկական  անուները, չաղավաղենք դրանք: Անունների ընտրության մեջ է դրսևորվում նաև մեր սերը հայրենիքի և մայրենիի նկատմամբ: Ինչո՞ւ ընտրել օտար անուններ, երբ մեր ավանդական անունները ոչ պակաս գեղեցիկ և հնչեղ են»,-հավելեց նա:

Նադեժդա Տեր-Աբրահամյան