«ՀԵՏԱԶՈՏՈՒԹՅՈՒՆՆԵՐՆ ԻՐԱԿԱՆԱՑՆԵԼՈՒ ՀԱՄԱՐ ԵՆԹԱԴՐՎՈՒՄ Է ՕԳՏԱԳՈՐԾԵԼ ԵՊՀ ՏՏ ԿԵՆՏՐՈՆԻ ՏԵԽՆԻԿԱԿԱՆ ԵՎ ԾՐԱԳՐԱՅԻՆ ՄԻՋՈՑՆԵՐԸ». ՍԱՄՎԵԼ ՇՈՒՔՈՒՐՅԱՆ

Գիտական թեմայի ղեկավարը զրույցի սկզբում հստակեցրեց, որ արդի միջավայրերը պետք է ապահովեն տրամադրվող ծառայությունների ճկունություն, կայացնեն որոշումներ անորոշության պայմաններում, լինեն գիտելիքահեն և ինքնաուսուցվող:

«Հաշվի առնելով դիտարկվող խնդիրների բարդությունը՝ առաջարկվող նախագծում ենթադրվում է լայնորեն օգտագործել արհեստական բանականության մեթոդները՝ գիտելիքների ներկայացման, ոչ հստակ տրամաբանության և ինքնաուսուցման շեշտադրմամբ»,- ասաց պրոֆեսորը:

Շուքուրյանը ծանոթացրեց կատարվելիք հետազոտությունների  ընթացքին և իրականացման եղանակներին. «Հետազոտությունները կկատարվեն հետևյալ ուղղություններով՝ բազմաժապավեն ավտոմատների վերլուծություն, ոչ հստակ տեղեկատվության մշակում, գիտելիքների ներկայացում և ղեկավարում, ներկառուցված թեստային լուծումներ բյուրեղի վրա տեղադրված համակարգերի համար, որոնց իրականացման համար ենթադրվում է օգտագործել ԵՊՀ տեղեկատվական տեխնոլոգիաների կրթական և հետազոտական կենտրոնի տեխնիկական և ծրագրային միջոցները»:

Սամվել Շուքուրյանը փաստեց, որ մեծ տվյալների կոնցեպցիան համեմատաբար նոր է և իր մեջ ներառում է տվյալների աճող դերը մարդկային գործունեության բոլոր բնագավառներում՝ սկսած հետազոտություններից մինչև բիզնեսի ինովացիոն զարգացումներ:

Պրոֆեսորը կետ առ կետ առանձնացրեց գիտական թեմայի նպատակները. «Նախ կատարելու ենք օնթոլոգիական մոդելի կառուցում, որը կոնցեպտուալ սխեմայի օգնությամբ հնարավորություն կտա ֆորմալիզացնելու որոշակի առարկայական տիրույթի գիտելիքներ: Ենթադրվում է առաջարկել մեծ տվյալների ինտեգրում ՝ հիմքում ունենալով մեքենայական ուսումնառության և օնթոլոգիայի կոնցեպցիաները, ինչպես նաև կատարելու ենք բնական լեզվից կառուցվածքային հարցումների գեներացում՝ հիմնվելով նեյրոնային ցանցերի կոնցեպցիայի վրա»:

Սամվել Շուքուրյանի  «Մշակման, ուսումնառության և կանխատեսման մեթոդների հաշվարկների բաշխված մոդելներում»  գիտական թեմայի հետազոտական խմբի անդամներն են ֆիզիկամաթեմատիկական գիտությունների թեկնածուներ Արմեն Կոստանյանը և Մանուկ Մանուկյանը, տեխնիկական գիտությունների թեկնածու Գուրգեն Հարությունյանը և Տեղեկատվական տեխնոլոգիաներ բաժնի ասպիրանտ՝Գրիգոր Ճաղարյանը, որոնց արգասավոր աշխատանքի շնորհիվ գիտական թեման կունենա  ցանկալի արդյունք. 

Ըստ Սամվել Շուքուրյանի՝ կատարած հետազոտությունների արդյունքները փորձարկելու համար տեսական արդյունքները կունենան թեորեմների, պնդումների և ալգորիթմների տեսք: 

Անգին Խաչատրյան