ՄԱՍՆԱԳԻՏԱԿԱՆ ԿՈՂՄՆՈՐՈՇՄԱՆ ՆՊԱՏԱԿՈՎ ՎԱՐԴԵՆԻՍԻ ԱՎԱԳ ԴՊՐՈՑԻ ԱՇԱԿԵՐՏՆԵՐՆ ԱՅՑԵԼԵՑԻՆ ԵՊՀ

Կազմակերպված հանդիպումներին ներկա էին ԵՊՀ ինֆորմատիկայի և կիրառական մաթեմատիկայի, ֆիզիկայի, կենսաբանության, տնտեսագիտության և կառավարման ֆակուլտետների դեկանները: Վերջիններս աշակերտներին ներկայացրին մայր բուհի կառուցվածքը, գործունեությունը, ներֆակուլտետային աշխատանքները և պատասխանեցին աշակերտների հարցերին:

Ինֆորմատիկայի և կիրառական մաթեմատիկայի ֆակուլտետի դեկան Յ. Հակոբյանը աշակերտներին ներկայացրեց ֆակուլտետի կրթական ծրագրերն ու ամբիոնները:

«Կարծում եմ՝ նմանատիպ այցերը արդյունավետ են և օգնում են դպրոցականներին մասնագիտության ընտրության հարցում ճիշտ կողմնորոշվել»,- ասաց դեկանը:

Վարդենիսի ավագ դպրոցի աշակերտներն այցելեցին նաև ֆիզիկայի ֆակուլտետ: Ֆակուլտետի դեկան Ռ. Հակոբյանն օրեր առաջ էր այցելել դիմորդներին: Անդրադառնալով Վարդենիսի ավագ դպրոց կատարած այցին՝ դեկանը նշեց. «Վարդենիսւոմ վերջերս եմ ներկայացրել ԵՊՀ ֆիզիկայի ֆակուլտետը և նրա գործունեությունը, իսկ այսօր աշակերտները հնարավորություն ունեցան անձամբ լինելու ֆիզիկայի ֆակուլտետում»:

Դեկանն աշակերտներին ուղեկցեց ֆակուլտետի գործող լաբորատորիաներ՝ նրանց ծանոթացնելու կատարվող աշխատանքներին:

Այնուհետև աշակերտներն այցելեցին կենսաբանության ֆակուլտետ, շրջեցին ֆակուլտետի յոթ ամբիոններով:

Ֆակուլտետի դեկանի տեղակալ Կարեն Ղազարյանը, կարևորելով մասնագիտական կողմնորոշման նպատակով կազմակերպվող նմանատիպ այցերը, ասաց. «Սա հնարավորություն է, որ աշակերտներն ավելի մանրամասն ծանոթանան ֆակուլտետի յուրաքանչյուր լաբորատորիայում արվող հետազոտություններին և իմանան՝ հետագայում ինչ մասնագիտություններ է հնարավոր ձեռք բերել` ընդունվելով այս ֆակուլտետ»:

Վերջում աշակերտները եղան  տնտեսագիտության և կառավարման ֆակուլտետում:

«Այսպիսի այցերը  յուրօրինակ կապ են ապահովում  դպրոցի և համալսարանի միջև: Մենք կարողանում ենք ապագա ուսանողների հետ նախապես շփվել, հասկանալ նրանց կարիքները, իսկ նրանք փորձում են լիարժեք ծանոթանալ տնտեսագիտության և կառավարման ֆակուլտետին»,- ասաց կառավարման և գործարարության ամբիոնի վարիչ Կառլեն  Խաչատրյանը:

Աշակերտների համար «Բիզնես միջավայրի նկարագրություն. բիզնեսի կարևորությունը տնտեսության մեջ» թեմայով դասախոսություն կարդաց տ.գ.թ., դոցենտ Նոննա  Խաչատրյանը:

Հանդիպման ընթացքում աշակերտները բանախոսներին ուղղեցին իրենց հետաքրքրող հարցերը և ստացան սպառիչ պատասխաններ։