ՆՈՐ ԾՐԱԳՐԵՐ ԵՎ ԽՆԴԻՐՆԵՐԻ ԼՈՒԾՄԱՆ ԱՌԱՋԱՐԿՆԵՐ. ՏԵՂԻ Է ՈՒՆԵՑԵԼ ԵՊՀ ԲԱՐԵՓՈԽՈՒՄՆԵՐԻ ՀԱՆՁՆԱԺՈՂՈՎԻ ՆԻՍՏԸ

Նախքան օրակարգային հարցերին անցնելը՝ հանձնաժողովի նախագահ Վահե Հովհաննիսյանը  նշեց, որ մամուլում վերջերս հրապարակվել է հանձնաժողովի և իր գործունեության վերաբերյալ տեղեկատվություն, որը ոչ միայն խեղաթյուրում է փաստերը և չի համապատասխանում իրականությանը, այլև կասկածի տակ է դնում հանձնաժողովի ինքնուրույնությունը: Նա նշեց, որ նույնիսկ տեղեկատվությունը հերքելն անիմաստ է համարել:

Վահե Հովհաննիսյանը պարզաբանեց, որ հանձնաժողովի՝ դեկանների հաշվետվողականության բարձրացման և կատարողականը գնահատելու չափորոշիչներ ներդնելու որոշումը ինստիտուցիոնալ բարեփոխում է, որը չի կարելի անձնավորված գործընթաց դիտարկել: Նա փաստեց, որ չափորոշիչները որևէ մեկի կարողություններին չեն համապատասխանեցվելու, և որևէ մեկն իրավասու չէ և չի կարող կարգադրություններ անել կամ ուղղորդել հանձնաժողովին. «Հանձնաժողովը որոշումներ կայացնելիս պետք է լինի ինքնուրույն, օբյեկտիվ և չառաջնորդվի նեղ խմբային կամ անհատական շահերով»:

Վահե Հովհաննիսյանը տեղեկացրեց, որ համապատասխան գրությամբ դիմել են ԿԳՆ-ին, և այժմ այն պատրաստում է առաջարկներ՝ կապված կրթության զարգացման ուղենիշների հետ: Բացի դրանից՝  նա տեղեկացրեց, որ ԵՊՀ հոգաբարձուների խորհրդի հետ քննարկվում է «Ասիական ուսումնասիրություններ» մագիստրոսական ծրագրի հետ կապված հարցը, որը կարող է ենթադրել նաև առանձին կառուցվածքային ստորաբաժանում ստեղծելու անհրաժեշտություն՝ միտված նշված ուղղության զարգացմանը, հետևաբար օրենքով և ԵՊՀ կանոնադրությամբ սահմանված կարգով՝ ԵՊՀ հոգաբարձուների խորհրդին դիմելու կարիք կառաջանա:
 

Նա նշեց, որ շատ առաջարկություններ են ստացվում, որոնք փորձում են զտել. «Շատ լավ է, որ ակտիվությունը մեծ է, բայց կան առաջարկություններ, որոնք զուտ ֆակուլտետների կամ ամբիոնների ինքնուրույն  կարգավորման հարցեր են, և իմաստ չունեն հանձնաժողովի քննարկման նյութ դառնալու»:

Վահե Հովհաննիսյանը հստակեցրեց, որ հանձնաժողովի սահմանած չափորոշիչները և ընդունած որոշումները ներկայացվելու են իրավասու մարմնի հաստատմանը, որից հետո դրանք ստանալու են իրավական ուժ և դառնալու են պարտադիր կիրառման ենթակա:

Նիստի ընթացքում քննարկվեցին Քաղաքացիական պաշտպանության ամբիոնին առնչվող հավաքագրված խնդիրները: Մասնավորապես՝ ԵՊՀ ուսումնական աշխատանքների գծով պրոռեկտոր Մենուա Սողոմոնյանը նշեց, որ դասընթացի կազմակերպման կարգը, գնահատման համակարգը, բացակայությունների վերաբերյալ մոտեցումները վերջին տարիներին փոփոխությունների են ենթարկվել, բայց այսօր էլ կան խնդիրներ և դժգոհություններ:

Ամբիոնի դասախոս Սուսաննա Շահինյանն ասաց, որ դժգոհություններն առկա են նաև դասախոսական կազմի շրջանում. «Մեր դասընթացն այժմ անցնում են առաջին կուրսի առաջին կիսամյակում, ինչի պատճառով ուսանողների մի մասն օբյեկտիվ պատճառներով բաց է թողնում պարապմունքները: Նրանք բանակից զորացրվածներն են, այլ բուհերից տեղափոխվածները և այլն»:

Նրա հավաստմամբ, խնդիրներ են առաջանում նաև այն ժամանակ, երբ բանակից զորացրված ուսանողները վերականգնվում են երկրորդ կիսամյակում և ստիպված են լինում հանձնել տարբերություն՝ առանց դասերին հաճախելու: Սուսաննա Շահինյանն առաջարկեց դասընթացը կազմակերպել երկրորդ կուրսի երկրորդ կիսամյակում՝ առավելագույնս նվազեցնելով ռիսկերը:

Քննարկում ծավալվեց մասնագիտական և ոչ մասնագիտական առարկաների չափաբաժնի վերաբերյալ: Մենուա Սողոմոնյանը փաստեց, որ կրեդիտատարության առումով ամբողջ կրթական ծրագրի 20 %-ը կազմում են ոչ մասնագիտական առարկաները. «Մի կողմից՝ պետությունն օրենքով և նորմատիվ իրավական այլ ակտերով սահմանում է պարտադիր առարկաներ, մյուս կողմից՝ ֆակուլտետներում պնդում են այս կամ այն առարկայի կարևորության մասին»:

Առաջարկությամբ հանդես եկավ Արշալույս Գալստյանը՝ նշելով, որ պետք է վերանայել նաև մագիստրատուրայում դասընթացի կազմակերպման կարգը՝ բացառելով համակարգչային դասընթացի և օտար լեզվի ուսուցման պարտադիր բաղադրիչը:

ԵՊՀ-ում բարեփոխումների իրականացման աշխատանքները համակարգող հանձնաժողովի նիստի ընթացքում քննարկվեցին  Ֆիզիկայի ֆակուլտետի ակադեմիկոս Գ. Սահակյանի անվան տեսական ֆիզիկայի ամբիոնի վարիչ Արամ Սահարյանի ներկայացրած խնդիրները, որոնցից մեկը վերաբերում էր հեռավար դասընթացների սակավությանը:

Վահե Հովհաննիսյանն ի պատասխան ասաց, որ Կրթության և գիտության նախարարության կողմից պատրաստվող նախագծում նախատեսված է հեռակա ուսուցման համակարգի վերափոխում:
 

Ներկայացրած խնդիրների ցանկում էր նաև գնումների կազմակերպման անարդյունավետությունն ինչպես ժամանակի, այնպես էլ որակի տեսանկյունից, որին համակարծիք էին հանձնաժողովի բոլոր անդամները:

Նիստի ավարտին՝ տարբեր խնդիրների և առաջարկների քննարկման վերջում, Վահե Հովհաննիսյանը նշեց, որ հանձնաժողովի գործունեության արդյունավետությունը բարձրացնելու համար պետք է ակտիվացվեն նիստերից դուրս տարվող աշխատանքները, իսկ նիստերի ժամանակ արձանագրվեն այդ աշխատանքների արդյունքները, ինչպես նաև սահմանվեն վերջնաժամկետներ:

Քնար Միսակյան