ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ ԴԱՐՁԵԼ ԵՆ ԻՐԱՎԱԿԱՆ ԱԿՏԵՐԻ ՆԱԽԱԳԾԵՐԻ ՀԵՂԻՆԱԿՆԵՐ

Ծրագիրը բաղկացած է մի քանի փուլից. առաջին փուլի շրջանակում դասախոսություններ են վարում ոլորտի փորձառու մասնագետներ, երկրորդ փուլում անցկացվում է երկօրյա կոնֆերանս, իսկ երրորդ փուլում՝ ԱԺ նիստ, որի ընթացքում ուսանողները հանդես են գալիս պատգամավորների դերում՝ ներկայացնելով իրենց կազմած իրավական ակտերը: Ծրագրի բուն նպատակն ուսանողներին իրավական ակտերի նախագծեր կազմելու հմտությունները սովորեցնելն է:

Մեզ հետ զրույցում ԵՊՀ իրավագիտության ֆակուլտետի ՈՒԽ նախագահ Գոհար Ավագյանն ասաց. «Լիահույս ենք, որ իբրև ԱԺ պատգամավոր հանդես եկող ուսանողների լավ առաջարկները հետագայում տեղ կգտնեն իրավական դաշտում: Կարևոր ենք համարում նաև այն, որ ծրագրին կարող են մասնակցել ԵՊՀ այլ ֆակուլտետների ուսանողներ»:

Դասընթացի բանախոսը ԵՊՀ իրավագիտության ֆակուլտետի քաղաքացիական դատավարության անբիոնի դասախոս, ՀՀ արդարադատության նախարարության Օրենսդրության զարգացման և իրավական հետազոտությունների կենտրոնի տնօրեն Տիգրան Դադունցն էր:

Բանախոսը նշեց իրավական ակտերի նախագծեր կազմելու մի քանի առանձնահատկություն. առաջինը ճիշտ կարիքի գնահատում իրականացնելն է, երկրորդը՝ միջազգային փորձի ուսումնասիրությունը, երրորդը՝ օրենսդրության՝ իրական տվյալների վրա հիմնված լինելը: