Նոյեմբեր 25, 2022 | 16:03
Կրթություն
Գիտություն
ՀՈՎՀԱՆՆԵՍ ԻՍԱԿՈՎԻ ՄԱՍԻՆ ՊԱՏՄՈՂ ՓԱՍՏԱՎԱՎԵՐԱԳՐԱԿԱՆ ՖԻԼՄԻ ԴԻՏՈՒՄ ԵՊՀ ՊԱՏՄՈՒԹՅԱՆ ՖԱԿՈՒԼՏԵՏՈՒՄ
Ֆիլմը, որն առաջին անգամ է ցուցադրվում Հայաստանում, նվիրված է հայազգի գիտնական, գրող, ծովակալ, ռազմագետ, զինհրամանատար Հովհաննես Իսակովի կյանքին և գործունեությանը, հատկապես Հայրենական պատերազմին նրա անմիջական մասնակցությանը և դերակատարմանը:
Մինչ ֆիլմի դիտումը ողջույնի խոսք ասացին ԵՊՀ պատմության ֆակուլտետի դեկան Էդիկ Մինասյանը, ֆիլմի «ստեղծողներ» Տիգրան Մանասյանը, Արմաիս Կամալովը և Հայաստանում ՌԴ դեսպան Սերգեյ Կոպիրկինը:
Է. Մինասյանի խոսքով՝ ֆիլմի ցուցադրումը պատմության ֆակուլտետում անցկացնելը պատահական չէր, քանի որ մասնավորապես ապագա պատմաբանների համար այսօրինակ ֆիլմերի ցուցադրումն ու քննարկումը շատ կարևոր են: Այսպիսի ուսուցողական, դաստիարակչական ֆիլմերը սովորեցնում են հայրենասիրություն, հարգանք մեծերի և նրանց նկատմամբ, ովքեր ապահովում են մեր խաղաղ կյանքը:
Նշենք, որ Հովհաննես Իսակովը բազմակողմանի զարգացած անձնավորություն էր. նա եղել է նաև ԽՍՀՄ գիտությունների ակադեմիայի ակադեմիկոս, գրողների միության անդամ, ունի գիտական աշխատություններ: Չնայած նրան, որ Իսակովն ստացել էր մարմնական լուրջ վնասվածք, նա շարունակել է ռազմական գործունեությունը:
