ԵՊՀ-ՈՒՄ ՇԱՐՈՒՆԱԿՈՒՄ Է ԱՄՐԱՊՆԴՎԵԼ ԴՊՐՈՑ-ԲՈՒՀ ԿԱՊԸ
ԵՊՀ-ում տեղի ունեցավ «ԿԶՆԱԿ» հիմնադրամի նախաձեռնած «Մեդիաստեղծո՞ղ, թե՞ մեդիասպառող» խորագրով նախագծի ամփոփումը, որը կազմակերպվել էր ՀՀ հանրակրթական դպրոցների աշակերտների համար՝ նպաստելու նրանց՝ մեդիագրագիտության ու մեդիայի գործիքների վերաբերյալ գիտելիքի ձևավորմանը։
![school-university-connection-is-strengthened-at-YSU](/sites/default/files/styles/large_slide/public/migrated/images/pyruPMbXexz6IGFrQYOoxDhWvI.jpg?h=bccd1fa5&itok=nN7wnNCK)
Աշակերտները ծանոթացան համալսարանի, հատկապես ժուռնալիստիկայի ֆակուլտետի գործունեությանը, եղան ֆակուլտետի հեռուստա- և ռադիոստուդիաներում: ՀՀ դպրոցների 7-12-րդ դասարանների ավելի քան 120 աշակերտներ հնարավորություն ունեցան իրենց խոսքը ձայնագրելու պրոֆեսիոնալ ստուդիայում, ապա՝ նկարահանվելու հեռուստաստուդիայում: Նրանք ծանոթացան լրագրողի աշխատանքին, ստացան իրենց հետաքրքրող հարցերի պատասխանները: Գալով ԵՊՀ կենտրոնական մասնաշենքի նախասրահ՝ աշակերտները ներկայացրին թեմատիկ տաղավարներ, որոնք կազմված էին իրենց՝ մեդիային և մեդիագրագիտությանը վերաբերող նախագծերի հիման վրա:
ԵՊՀ զարգացման և նորարարության գծով պրոռեկտոր Միքայել Հովհաննիսյանը, ողջունելով աշակերտներին, հույս հայտնեց, որ նրանց այցելությունը ԵՊՀ կարևոր նշանակություն կունենա հետագայում՝ մասնագիտական կողմնորոշման ժամանակ: Պրոռեկտորը նշեց, որ արագ զարգացող աշխարհում տեղեկատվության հետ «ճիշտ վարվելու» ձևերին տիրապետելը մեր օրերում ամենակարևոր հմտություններից մեկն է:
ՀՀ ԿԳՄՍ նախարարության «ԿԶՆԱԿ» հիմնադրամի տնօրեն Արտաշես Թորոսյանը, խոսելով նախագծի կարևորության և դրա շրջանակում կատարված աշխատանքների մասին, ասաց, որ աշակերտները ոչ միայն սովորեցին մեդիագրագիտություն, այլև ձեռք բերեցին հետազոտական աշխատանքներ ու ուսումնասիրություններ կատարելու, միմյանց հետ համագործակցելու և հաղորդակցվելու հմտություններ:
Հիմնադրամի կրթական նորարարությունների և հետազոտությունների վարչության պետ Լիլիթ Մկրտչյանն ընդգծեց, որ պատահական չէ, որ «Մեդիաստեղծո՞ղ, թե՞ մեդիասպառող» նախագիծն ամփոփվում է հենց Երևանի պետական համալսարանում:
«Ակնկալում ենք, որ ԵՊՀ ժուռնալիստիկայի ֆակուլտետի հետ համագործակցությունը շարունակական կլինի, հաջորդ փուլում աշակերտ-ուսանող կապը կընդլայնվի, և աշակերտները համատեղ նախագծեր կիրականացնեն»,- ասաց Լ. Մկրտչյանը:
Վարչության պետը հույս հայտնեց, որ աշակերտները մի քանի տարի անց մասնագիտական կրթություն կստանան և կլինեն Երևանի պետական համալսարանի ուսանողներ:
ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը համոզմունք հայտնեց, որ, մասնակցելով «Մեդիասպառո՞ղ, թե՞ մեդիաստեղծող» նախագծին, աշակերտները կարողացել են է՛լ ավելի զարգացնել մեդիայից օգտվելու իրենց հմտությունները, և ընդլայնվել է մեդիագրագիտության շրջանակը:
«Կարևոր է, որ թե՛ իբրև մեդիասպառող և թե՛ իբրև մեդիաստեղծող դուք մեդիագրագետ լինեք, իսկ մեդիագրագիտությունն անհրաժեշտ բովանդակությունը որոնելու, գտնելու, այն քննադատաբար վերլուծելու, գնահատելու հմտությունների ամբողջությունն է»,- դիմելով աշակերտներին՝ ասաց ԵՊՀ ժուռնալիստիկայի ֆակուլտետի դեկանը և հավելեց. «Համացանցի առկայությամբ մեծացել են տեղեկատվական հոսքերը, տարածվում է ահռելի ծավալով չճշտված և կեղծ տեղեկատվություն, և այս համատեքստում առավել քան կարևորվում են մեդիագրագիտությունը, ճիշտ և ստուգված աղբյուրներից օգտվելու հմտությունները»:
Նշենք, որ նախագծի մասնակից աշակերտները ուսումնասիրեցին, վերլուծեցին մեդիայի դերը և ազդեցությունը մարդու կյանքի վրա, նախագծային աշխատանքի միջոցով զարգացրին քննադատական մտածողությունը, որը հնարավորություն կտա վերլուծելու, գնահատելու համացանցի և մեդիայի արժանահավատ լինելը, զարգացնելու դրանցից օգտվելու հմտությունները:
Նախագծի շրջանակում դպրոցներում ստեղծվել են մեդիա ակումբներ՝ «Մեդիասպառո՞ղ, թե՞ մեդիաստեղծող» խորագրով: Ակումբն ընտրել և ուսումնասիրել է փաստերի ստուգման գործիքները և կեղծ լուրերը, մասնավորապես՝ ինչպես տարբերակել ու չտարածել դրանք:
Միջոցառման ավարտին աշակերտներին հանձնվեցին շնորհակալագրեր: