Սիրելի՛ առաջինկուրսեցիներ, բարի գալուստ Երևանի պետական համալսարան։ Դուք կրթական ու գիտական փառավոր պատմություն ունեցող համալսարանի ուսանող եք և համալսարանական մեծ ընտանիքի անդամ։
Ուսումնառության ընթացքում այստեղ ծանոթանալու եք ավելի քան մեկդարյա հարուստ պատմություն ունեցող համալսարանի գեղեցիկ ավանդույթներին, ստանալու եք Հայաստանում լավագույն կրթությունը, ձեռք եք բերելու նոր հմտություններ, գիտական ասպարեզում կատարելու եք ձեր առաջին քայլերը, բացահայտելու եք ձեր ներուժը, սովորելու եք ինքնուրույն մտածել, կարողանալու եք փնտրել ստեղծագործական լուծումներ, հասկանալու եք՝ ինչպես կյանքի կոչել ձեր գաղափարներն ու լիարժեք ձևավորվել որպես անհատ ու քաղաքացի։
Սիրելի՛ առաջինկուրսեցիներ, ԵՊՀ-ն իր ստեղծագործական ոգեշնչող միջավայրով, բարեփոխումների ծրագրով, նորարարական մեթոդներով ու տեղեկատվական տեխնոլոգիաների կիրառմամբ կազմակերպվող տարբեր դասընթացներով, մշակութային ու մարզական միջոցառումներով հիշարժան ու անմոռանալի է դարձնելու ձեր ուսանողական առօրյան և ընձեռելու է հետագայում հաջողությունների հասնելու նոր հնարավորություններ։
Համոզված եմ, որ մենք միասին ձեր ուսումնառությունն առավել հետաքրքիր ու արդյունավետ ենք դարձնելու, կյանքի ենք կոչելու ձեր նորարար գաղափարները՝ նպաստելով մեր բուհի, ինչպես նաև մեր երկրի զարգացմանն ու առաջընթացին։
Սիրելի՛ առաջինկուրսեցիներ, օգտվե՛ք ձեզ ընձեռված բոլոր հնարավորություններից ու լիարժեք վայելե՛ք ձեր ուսանողական կյանքը։
