Ակտուարական և ֆինանսական մաթեմատիկա

«Ֆինանսական մաթեմատիկա» կրթական ծրագրի դիմորդը պետք է ունենա միջնակարգ կամ մասնագիտական (նախնական, միջին, բարձրագույն) կրթություն։

Ընդունելության պահանջները

Ընդունելությունը կատարվում է՝ ըստ ՀՀ Կառավարության հաստատած «ՀՀ պետական և ոչ պետական բարձրագույն ուսումնական հաստատություններ ընդունելության (ըստ բակալավրի կրթական ծրագրի) կարգի»: Դիմորդները հանձնում են քննություններ հանրակրթական հետևյալ առարկաներից՝ «Մաթեմատիկա» (գրավոր) (պարտադիր), «Ֆիզիկա» կամ «Անգլերեն» (գրավոր) (դիմորդի ընտրությամբ), «Հայոց լեզու» (գրավոր, ոչ մրցութային)։

Ծրագրի նպատակը

Ծրագրի նպատակն է ուսանողներին տրամադրել բազային գիտելիքներ մաթեմատիկայի տարբեր բնագավառների, մասնավորապես՝ ֆինանսական և ակտուարական մաթեմատիկայի վերաբերյալ՝ կազմակերպությունների ֆինանսական հոսքերի կառավարման համար, ուսանողներին փոխանցել ռիսկերի կառավարմանն առնչվող գիտելիքներ:

Առավելությունները

Կրթական ծրագրի շրջանակում ուսանողները ստանում են գիտելիքներ, որոնք հնարավորություն են տալիս կանխատեսելի և կառավարելի դարձնելու ռիսկերը, ծանոթանում են ծրագրավորման արդի լեզուներին և դրանց կիրառությանը ֆինանսներում, ուսանողների մոտ ձևավորվում են ունակություններ ֆինանսական և ոչ ֆինանսական կազմակերպություններում մասնագիտական գործունեություն ծավալելու համար, կրթությունը մագիստրոսական և ասպիրանտական ծրագրերում շարունակելու ու հետագայում գիտական-հետազոտական գործունեությամբ զբաղվելու համար ունակություններ։

Կարիերայի հնարավորությունները

«Ֆինանսական մաթեմատիկա» կրթական ծրագրի շրջանավարտները կարող են աշխատել պետական համակարգի հաստատություններում՝ ՀՀ կենտրոնական բանկ, ՀՀ ֆինանսների նախարարություն, էկոնոմիկայի նախարարությունում, ՀՀ ԿԱ ՊԵԿ-ում, ֆինանսական կազմակերպություններում՝ առևտրային բանկեր, վարկային կազմակերպություններ, ներդրումային ընկերություններ, ապահովագրական ընկերություններ, կենսաթոշակային հիմնադրամներ, ինչպես նաև ոչ ֆինանսական կազմակերպություններ՝ ֆինանսական վերլուծաբանի, վիճակագրական վերլուծաբանի, ռիսկերի կառավարչի, ակտուարի, աուդիտորի, տնտեսագետի և այլ պաշտոններում: