Օպտիկայի ամբիոն

Օպտիկայի ամբիոն

Օպտիկայի ամբիոնը հիմնադրվել է 1964 թվականին: Մինչև 1967թ. ամբիոնի վարիչի պարտականություններն իրականացրել է դոցենտ Վիլեն Մկրտչի Ասլանյանը, այնուհետև դոցենտ Մելիստ Եղիշեի Մովսիսյանը, ՝ ՀՀ ԳԱԱ ակադեմիկոս, ֆիզ.- մաթ. գիտությունների դոկտոր, պրոֆեսոր Յուրի Սերգեյի Չիլինգարյանը:

1972թ. ամբիոնում հիմնվել է «Օպտոէլեկտրոնիկայի և ֆոտոնիկայի գիտահետազոտական լաբորատորիան», որի կազմում գործել են ոչ ստացիոնար ոչ գծային երևույթների,  հեղուկ բյուրեղների ֆիզիկական հատկությունների, գերմաքուր օպտիկական ապակիների, մանրաթելային օպտիկական կապի ու տվիչների բաժինները, իսկ 2008թ.-ին  NATO-ի տրամադրած դրամաշնորհի շնորհիվ ստեղծվել և գործում է «Գերարագ օպտիկայի և ֆոտոնիկայի» լաբորատորիան, որը տարածաշրջանում իր հնարավորություններով նմանը չունեցող փոքրաթիվ լաբորատորիաներից է: 

Ամբիոնն իրականացրել է ընդհանուր ֆիզիկայի «Օպտիկա» բաժնի դասավանդումը ֆիզիկայի և ռադիոֆիզիկայի ֆակուլտետներում, ինչպես նաև «Ոչ գծային ֆիզիկայի ներածություն», «Ֆիզիկական գիտափորձի ավտոմատացում և ծրագրավորում» ֆիզիկայի, ռադիոֆիզիկայի և կենսաբանության, ֆակուլտետներում, «Մաթեմատիկական մոդելավորում, թվային մեթոդներ և կիրառական խնդիրների լուծում» ֆիզիկայի ֆակուլտետում և «Ժամանակակից բնագիտության կոնցեպցիաներ» դասընթացը սոցիոլոգիայի ու բանասիրության ‎ֆակուլտետներում: Ֆիզիկայի ֆակուլտետի բակալավրատում ամբիոնն ապահովել է «Օպտիկա» և «Լազերային ֆիզիկա» ուղղության բոլոր մասնագիտական դասընթացները, ինչպես նաև իրականացրել է «Կիրառական ֆիզիկա» մասնագիտության դասընթացների զգալի մասը:

2023 թվականից ամբիոնն իրականացնում է ընդհանուր ֆիզիկայի «Օպտիկական երևույթների ֆիզիկա» բաժնի դասավանդումը ֆիզիկայի ինստիտուտում, ինչպես նաև «Ֆիզիկական գիտափորձի ավտոմատացում և ծրագրավորում» ֆիզիկայի ինստիտուտում և կենսաբանության ֆակուլտետում, «Մաթեմատիկական մոդելավորում, թվային մեթոդներ և կիրառական խնդիրների լուծում» ֆիզիկայի ինստիտուտում և «Ժամանակակից բնագիտության կոնցեպցիաներ» դասընթացը սոցիոլոգիայի ու բանասիրության ‎ֆակուլտետներում: Ֆիզիկայի ինստիտուտի բակալավրատում ամբիոնն ապահովում է «Օպտիկա» և «Լազերային ֆիզիկա» ուղղության բոլոր մասնագիտական դասընթացները:

Մագիստրատուրայի համակարգում ամբիոնը մասնագետներ է պատրաստում «Օպտիկա» մասնագիտացմամբ:

Ամբիոնն իրականացնում է նաև ասպիրանտական կրթություն «Օպտիկա» և «Լազերային ֆիզիկա» մասնագիտություններով:

Մասնագիտական ծրագրերն ընդգրկում են մի շարք բնագավառներ՝ ալիքային (գծային և ոչ գծային) և ֆիզիկական օպտիկա, քվանտային օպտիկա, վիճակագրական և կիրառական օպտիկա, լազերային սպեկտրադիտում, ինտեգրալ և մանրաթելային օպտիկա, քվանտային և բազմարժեք համակարգիչներ և այլն:

Ամբիոնում գործում է «Համակարգչային մեթոդները ֆիզիկայում» ուսումնական ծրագրերի ցիկլը և համակարգչային լսարանը, որտեղ կազմակերպում է «Ֆիզիկական գիտափորձի ավտոմատացում» առարկայի լաբորատոր աշխատանքները: 

Ամբիոնի պրոֆեսորադասախոսական կազմի մի մասը ամբիոնի տարբեր տարիների շրջանավարտներն են: Ամբիոնի որոշ շրջանավարտներ ներկայում աշխատում են Ճարտարագիտական համալսարանում, ՀՀ ԳԱԱ ֆիզիկական հետազոտությունների ինստիտուտում, Օպտիկաֆիզիկական չափումների ինստիտուտում, “Լազերային տեխնիկա” գիտաարտադրական միավորումում, ինչպես նաև Ճապոնիայի, ԱՄՆ-ի, Կանադայի, Ֆրանսիայի, Ռուսաստանի և մի շարք այլ երկրների առաջատար գիտական կենտրոններում:

Այսօր ամբիոնի աշխատակիցների կողմից իրականացվող գիտահետազոտական աշխատանքները իրականացվում են ԵՊՀ ֆիզիկայի գիտահետազոտական ինստիտուտի (ՖԳՀԻ) երեք՝ «Օպտոէլեկտրոնիկայի և ֆոտոնիկայի», «Գերարագ օպտիկայի և ֆոտոնիկայի» և «Ֆոտոնիկայի և արհեստական բանականության» գիտահետազոտական լաբորատորիաներում:

Ամբիոնում զարգացվող հիմնական գիտական ուղղություններն են. «Լազերային ճառագայթման տարածումը և ստացիոնար ու ոչ ստացիոնար փոխազդեցությունը պլանար ալիքատարներում և պարբերական միջավայրերում», «Լազերային ճառագայթներով մակածված կողմնորոշումային և հիդրոդինամիկական երևույթների կանխատեսումն ու հետազոտումը հեղուկ բյուրեղներում և նրանց պոլիմերային կոմպոզիցիաներում», «Ոչգծային օպտիկական երևույթների և կառուցվածքային փուլային (այդ թվում՝ լուսամակածված) անցումների հետազոտումը հեղուկ բյուրեղական համակարգերում», «Լազերային ճառագայթումը կառավարող սարքերի մշակում և հիմնական բնութագրերի հետազոտում» և «Լազերային Ճառագայթման ոչգծային ինքնազդեցության և փոխազդեցության երևույթների կիրառությունները ֆոտոնիկայի և հեռահաղորդակցության խնդիրներում», «Գերարագ օպտիկայի /լազերային ֆիզիկայի հիմնախնդիրները», «Լույսի փոխազդեցությունը ֆոտոնային բարդ համակարգերում», որոնց շրջանակն ընդգրկում է ինչպես հիմնարար, այնպես էլ կիրառական բնույթի աշխատանքներ:

Ամբիոնում աշխատում են օպտիկայի, լազերային ֆիզիկայի և ֆոտոնիկայի բնագավառներում հանրապետության ճանաչված և առաջատար մասնագետներ, որոնք պարբերաբար անցնում են վերապատրաստումներ, ներգրավված են մի շարք դրամաշնորհային ծրագրերում: Ամբիոնի գիտնական-մանկավարժները հեղինակ են ուսումնամեթոդական ձեռնարկների, մենագրությունների, դպրոցական ձեռնարկների, գիտական հոդվածների, որոնք տպագրվում են բարձր ազդեցության գործակից ունեցող պարբերականներում։