Պինդ մարմնի ֆիզիկայի ամբիոն

Երևանի պետական համալսարանի պինդ մարմնի ֆիզիկայի ամբիոնը հիմնադրվել է 1956 թ. ֆիզիկամաթեմատիկական ֆակուլտետի ընդհանուր ֆիզիկայի ամբիոնի հիմքի վրա:

Ստեղծման օրվանից մինչև 1970թ. այն կոչվել է նյութի կառուցվածքի ամ­բիոն, 1970թ.՝ վերանվանվել պինդ մարմնի ֆիզիկայի ամբիոնի: Ամբիոնի հիմ­նադիրը և առաջին վարիչը պրոֆ. Նորայր Մարգարի Քոչարյանն է: Հետագայում ամբիոնի վարիչներ են եղել՝ պրոֆ. Պ.Հ.Բեզիրգանյանը (1960-1987թթ.), Ա.Հ.Դուրգարյանը (1987-1989թթ.), Կ.Գ.Թրունին (1989-1993թթ.), Ժ.Մ.Ղազարյանը (1993-2000թթ.), Ա.Ա.Կիրակոսյանը (2000-2018թթ.): 2018թ.-ից ամբիոնի վարիչը պրոֆեսոր Ա.Լ.Վարդանյանն  է:

Պինդ մարմնի ֆիզիկայի ամբիոնի անմիջական աջակցությամբ ռենտ­գենյան հետազոտությունների լաբորատորիաներ են կազմակերպվել Հայաստանի պետական ճարտարագիտական համալսարանում, Գյումրիի Մ. Նալբանդյանի անվ. մանկավարժական ինստիտուտում:

80-ական թվականների կեսերին պինդ մարմնի ֆիզիկայի ամբիոնը դարձել էր հզոր ուսումնագիտական և արտադրական կենտրոն և վերանվանվել  Երևանի պետական համալսարանի պինդ մարմնի ֆիզիկայի ամբիոնի միավորում, որտեղ աշխատում էին շուրջ 130 բարձրորակ մասնա­գետներ: Այդ տարիներին, ամբիոնը եղել է նախկին ԽՍՀՄ-ում ռենտգենյան հետազոտությունները համակարգող գիտական կառույցը:

Վերջին երկու տասնամյակների ընթացքում, ամբիոնում լայնորեն ընթանում են հետազոտություններ նանոֆիզիկայի ոլորտում, որը դարձել է նանո­տեխնոլոգիաների կարևորագույն և հիմնարար գիտական ոլորտը և ձևավո­րում է ժամանակակից քվանտային և տեղեկատվական տեխնոլոգիաների, հետևաբար՝ նաև բարձրտեխնոլոգիական արտադրություննրի գիտական հենքը:

Իր գոյության ընթացքում պինդ մարմնի ֆիզիկայի ամբիոնը պատրաստել է գիտության շուրջ 120 թեկնածու և 25 դոկտոր: Ամբիոնը պատրաստած կադրերը այսօր էլ հաջողությամբ աշխատում են արտասահմանյան բազմաթիվ երկրների առաջատար գիտական հաստատություններում:

      Իր գոյության ընթացքում պինդ մարմնի ֆիզիկայի ամբիոնում հրատարակվել է ավելի քան 1600 գիտական հոդված, 20 մենագրություն և ուսումնական ձեռնարկ, ստացվել է 50 հեղինակային իրավունք: Մեկ աշխա­տանք արժանացել է ՀԽՍՀ Պետական մրցանակի, մեկ աշխատանք՝ Հայաստանի կոմերիտմիու­թյան մրցանակի և 2 աշխատանք՝ ՀՀ Նախագահի մրցա­նակի:

Պինդ մարմնի ֆիզիկայի ամբիոնն ունի գիտական մեծ կարևորության և կիրառական  նշանակության պլաններ, որոնք կնպաստեն համալսարա­նա­կան կրթական նոր համակարգի պահանջներից բխող բազմազան և դժվարին խնդիրները հաղթահարելու և գիտահետազոտական աշխատանք­ները հաջողությամբ շարունակելու գործին:

Պինդ մարմնի ֆիզիկայի ամբիոնի առաջարկած կրթական ծրագրերին հնարավոր է ծանոթանալ «Կրթական ծրագրեր» էջում։