Էլեկտրադինամիկական պրոցեսների համակարգչային մոդելավորում և նմանակում

Ընդունելության պահանջները

ԵՊՀ մագիստրատուրայի 2023/2024 ուսումնական տարվա առկա և հեռակա ուսուցման ձևերով ընդունելությանը հնարավորություն ունեն դիմելու ՀՀ պետական և ըստ մասնագիտությունների հավատարմագրված/ինստիտուցիոնալ հավատարմագրում անցած ոչ պետական այլ բուհերի՝ բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները:

ԵՊՀ մագիստրատուրայի 2023/2024 ուսումնական տարվա առկա և հեռակա ուսուցման ձևերով ընդունելությունը կատարվելու է համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Ծրագրի նպատակը

Կրթական ծրագրի նպատակն է պատրաստել ռադիոֆիզիկական երևույթների և էլեկտրոնային հեռահաղորդակցական սարքերի համակարգչային մոդելավորման և նմանակման ժամանակակից մեթոդներին տիրապետող որակյալ կադրեր՝ ունակ ներդնելու իրենց գիտելիքները հիմնարար և կիրառական ոլորտներում, ուսանողներին տրամադրել գիտելիք և հմտություններ ռադիոֆիզիկական խնդիրների համակարգչային մոդելավորման և նախագծման սկզբունքների և դրանց առանձնահատկությունների վերաբերյալ, ուսանողների մեջ զարգացնել մասնագիտական ամբողջական նախագծերի իրականացման հմտություններ:

Առավելությունները

Այս ծրագրի ավարտին ուսանողն օժտված կլինի մասնագիտական գիտելիքներով և իմացությամբ, գործնական մասնագիտական և ընդհանրական (փոխանցելի) կարողություններով:

Կրթական ծրագրի ավարտին ուսանողն ունակ կլինի տարբերակելու և համակարգելու ԳԲՀ տիրույթի հիմնական հաճախային տիրույթներն ու կիրառելիության սահմանները և դրանց նշանակությունը քաղաքացիական և ռազմական նպատակների տեսանկյունից, ձևակերպելու ենթամիլիմետրային, տերահերցային և օպտիկական տիրույթներում էլեկտրամագնիսական ալիքների գեներացման, տարածման և դետեկտման առանձնահատկությունները, հիմնախնդիրները, մատնանշելու դրանց լուծման ուղիները, ներկայացնելու հիմնական կոմպոզիտային և անիզոտրոպ հաղորդականությամբ նյութերի տեսակներն ու առանձնահատկությունները միկրոալիքային և ՏՀց տիրույթներում և նրանցում ընթացող ֆիզիկական ու քիմիական երևույթների առանձնահատկությունները, ներկայացնելու կապի ժամանակակից համակարգերում օգտագործվող և նախատեսվող արձանագրությունները և ալգորիթմները, աշխատելու գիտության, արտադրության, անվտանգության ու ռազմական ոլորտներում կիրառվող ռադիոհաճախային և տերահերցային տիրույթներում հեռազննումն ու հեռակառավարումն իրականացնող սարքերի հետ՝ գիտենալով դրանց գործողության սկզբունքները:

Ուսանողը կկարողանա ներդնել ռադիոֆիզիկական խնդիրների համակարգչային նմանակման մոդելները՝ օգտագործելով ժամանակակից համակարգչային փաթեթները, կիրառել համակարգչային մոդելավորման և նմանակման ծրագրային փաթեթները ԳԲՀ տիրույթի սարքերի արդիական հանգույցների (ալիքատարներ, ռեզոնատորներ, ֆիլտրեր և այլն) նախագծման և պահանջվող պարամետրերի ապահովման հարցերում, իրականացնել նախագծային սարքերում փոխհամաձայնության և համատեղելիության գնահատում, համադրել էլեկտրամագնիսական ալիքների տարածման առանձնահատկությունները ռադիոտիրույթում, բարելավել ռադիոընդունիչների, ճառագայթիչների հիմնական պարամետրերը հեռազննման և հեռակառավարման համակարգերի առանձին հանգույցներում, օգտագործել նանոմասշտաբային համակարգերի էլեկտրամագնիսական, միկրոմեխանիկական և օպտիկական հատկությունները էլեկտրաֆիզիկական, էլեկտրաքիմիական, կենսաբանական գործընթացներում տեխնոլոգիական բնույթի սահմանափակումների գնահատման և նոր մեխանիզմների մոդելավորման համար:

Օգտվելով տեղեկատվական ժամանակակից աղբյուրներից (տպագիր և առցանց գրականություն)՝ ուսանողը կկարողանա դասակարգել և վերլուծել տեղեկատվություն՝ գործնական խնդիրներ ձևակերպելու և գործնական լուծումներ առաջարկելու համար, վերլուծել և ներկայացնել գիտական հետազոտությունների արդյունքները, պատրաստել զեկուցումներ և վարել գիտական սեմինարներ, հաջողությամբ ինտեգրվել և աշխատել գիտահետազոտական խմբերում, ինչպես նաև ղեկավարել գիտաարտադրական միավորումներ, ուղղորդվել մասնագիտական էթիկայի կանոններով:

Կարիերայի հնարավորությունները

Շրջանավարտները հնարավորություն ունեն շարունակելու կրթությունը ինչպես նույն ֆակուլտետի ասպիրանտուրայում, այնպես էլ այլ բուհերի և գիտահետազոտական ինստիտուտների ասպիրանտուրաներում։

Հնարավոր աշխատավայրերն են՝ ՀՀ ԳԱԱ ռադիոֆիզիկայի և էլեկտրոնիկայի ինստիտուտ, «Նեյշնլ Ինսթրումենթս» ՓԲԸ-ի հայկական մասնաճյուղ, «ՅԵԱ ինջինիրինգ» ՓԲԸ, Հայկական բջջային կապի օպերատորներ և այլն։