Մարդու իրավունքներ և ժողովրդավարացում (Ուկրաինա)

«Մարդու իրավունքներ և ժողովրդավարացում» տարածաշրջանային մագիստրոսական ծրագիրը հիմնադրվել է 2010 թ. «Ժողովրդավարության և մարդու իրավունքների եվրոպական գործիք» (EIDHR) ֆինանսական աջակցությամբ: Այն մեկամյա (60 կրեդիտ) միջմասնագիտական ծրագիր է, որը ներառում է իրավական, քաղաքագիտական և միջմասնագիտական մոդուլներ:

Այն Եվրահանձնաժողովի ֆինանսական աջակցությամբ հիմնադրված «Մարդու իրավունքներ և ժողովրդավարացում Կովկասում» տարածաշրջանային մագիստրոսական յոթ ծրագրերից մեկն է․

• Եվրոպա (Վենետիկ),
• Հարավարևմտյան Եվրոպա (Բոլոնյա ու Բոսնիա և Հերցեգովինա),
• Աֆրիկա (Պրետորիա),
• Լատինական Ամերիկա (Բուենոս Այրես),
• Ասիա-Խաղաղօվկիանոսյան տարածաշրջան (Բանկոկ),
• Կովկաս (Երևան),
• Միջին Արևելք (Բեյրութ)։

Ծրագրի շրջանակում ուսումնասիրվում են մարդու իրավունքների և ժողովրդավարացման հիմնախնդիրները Արևելյան գործընկերության և հետխորհրդային այլ երկրներում: Այն նախատեսում է ուսանողների ակադեմիական շարժունություն և դասախոսների փոխանակում, ուսուցողական այցելություններ եվրոպական կառույցներ և մասնակից երկրներ: Ծրագիրն իրականացվում է անգլերենով:

Մարդու իրավունքներ «Գլոբալ Կամպուս» ցանցը, որը համակարգում է Վենետիկի մարդու իրավունքների և ժողովրդավարացման եվրոպական միջհամալսարանական կենտրոնը, այսօր ներառում է ավելի քան 100 համալսարաններ և ունի 300-ից ավելի շրջանավարտներ: «Գլոբալ Կամպուս»-ը սերտորեն համագործակցում է ՄԱԿ-ի, ԵԱՀԿ-ի, Եվրոպական հանձնաժողովի, Եվրոպայի խորհրդի և միջազգային ու տարածաշրջանային տարբեր կազմակերպությունների հետ:

«Մարդու իրավունքներ և ժողովրդավարացում» տարածաշրջանային մագիստրոսական ծրագիրն իրականացվում է հինգ համալսարանների համագործակցությամբ: Մասնակից համալսարաններն են՝

• Երևանի պետական համալսարան (համակարգող),
• Կիևի Տարաս Շևչենկոյի անվան ազգային համալսարան,
• Թբիլիսիի Իվանե Ջավախիշվիլու անվան պետական համալսարան,
• Մոլդովայի պետական համալսարան,
• Կենտրոնական Ասիայի ամերիկյան համալսարան։

«Մարդու իրավունքներ և ժողովրդավարացում» տարածաշրջանային մագիստրոսական ծրագիրը համագործակցում և իրականացնում է ուսուցում տարածաշրջանի առաջատար համալսարանների` Կիևի Տարաս Շևչենկոյի անվան ազգային, Կենտրոնական Ասիայի ամերիկյան , Մոլդովայի պետական և Թբիլիսիի Իվանե Ջավախիշվիլու անվան պետական համալսարանների հետ: Ծրագրի բաղկացուցիչ տարրերից է ուսանողների ակադեմիական շարժունակությունը: Ուսումնառության ընթացքում յուրաքանչյուր ուսանող ստանում է հնարավորություն ուսանելու համագործակցող համալսարաններից մեկում` մասնագիտանալով քաղաքական, իրավական և այլ ուղղություններով:

Առաջին կիսամյակն անցկացվում է Երևանի պետական համալսարանում:

Երկրորդ կիսամյակն անցկացվում է գործընկեր համալսարաններից որևէ մեկում՝ հիմնված մոդուլի մասնագիտացման վրա.

• Իրավական մոդուլը՝ Մոլդովայի պետական համալսարան,
• Իրավական մոդուլը՝ Կիևի Տարաս Շևչենկոյի անվան ազգային համալսարան,
• Սոցիալ-տնտեսական իրավունքների մոդուլը` Թբիլիսիի Իվանե Ջավախիշվիլու անվան պետական համալսարան,
• Միջմասնագիտական մոդուլը՝ Կենտրոնական Ասիայի ամերիկյան համալսարան։

«Մարդու իրավունքներ և ժողովրդավարացում» տարածաշրջանային մագիստրոսական ծրագրի արտադրական և ուսումնական պրակտիկայի տևողությունը չորս շաբաթ է: Յուրաքանչյուր ուսանող հնարավորություն ունի ընտրելու կամ առաջարկելու իր նախընտրած միջազգային կազմակերպությունը կամ պետական կառույցը, ինչպես Հայաստանում, այնպես էլ գործընկեր երկրներից մեկում:

Ծրագրի ուսանողներն իրենց արտադրական պրակտիկան անցնում են ՀՀ արդարադատության և ֆինանսների նախարարություններում, Մարդու իրավունքների պաշտպանի գրասենյակում, «Սեյվ դը չիլդրեն»-ում, ՅՈՒՆԻՍԵՖ-ում, ՄԱԿ-ի մարդու իրավունքների գերագույն հանձնակատարի և Ղազախստանում ՄԱԿ-ի գրասենյակներում, Ուկրաինայում ԵՄ պատվիրակությունում, Վրաստանում Եվրոպական և Եվրաատլանտյան ինտեգրման նախարարի գրասենյակում, ինչպես նաև Հայաստանի և գործընկեր երկրների հասարակական կազմակերպություններում։

«Մարդու իրավունքներ և ժողովրդավարացում» մագիստրոսական ծրագիրը բաց է բոլոր այն դիմորդների համար, ովքեր՝

• ունեն առնվազն բակալավրի աստիճան,
• տիրապետում են անգլերենին և ռուսերենին,
• ունեն ժողովրդավարաության և մարդու իրավունքների թեմաներին առնչվող մասնագիտական հետաքրքրություն։

Գիտական, մասնագիտական փորձը վերը նշված բնագավառներում կդիտվի որպես առավելություն։

Առկա են անվճար և վճարովի տեղեր։ Ծրագիրն ունի սահմանափակ քանակությամբ կրթաթոշակներ, որոնք հոգալու են կեցության ծախսերը հյուրընկալող համալսարանում ուսանելու ժամանակահատվածում: 

Ընդունելության, պահանջների և ժամկետների վերաբերյալ առավել մանրամասն տեղեկություններ հնարավոր է գտնել այստեղ։

Մագիստրատուրայի ընդունելության համար դիմորդները պետք է մուտքագրեն հետևյալ փաստաթղթերը (սկանավորված)․

ա. առցանց հայտադիմում,

բ. լուսանկար (3X4 չափսի),

գ․ դիպլոմ(ներ)ի պատճեններ,

դ․ դիպլոմ(ներ)ի միջուկի պատճեն և նոտարական թարգմանություն, եթե այն հայերենով չէ,

ե․ զինվորական գրքույկի (առկայության դեպքում) բնօրինակը (անհրաժեշտ է ներբեռնել 1-4-րդ և 18-19-րդ էջերը),

զ․ անձնագիր (1-4-րդ էջերը) կամ նույնականացման քարտ (երկկողմանի),

է․ ինքնակենսագրական (CV)

ը․ 2 մոտիվացիոն նամակ անգլերենով՝ ընդունելությանը և կրթաթոշակին վերաբերող (450-600 բառ)

թ․ էսսե (Essay, 1500-2000 բառ)

Անհրաժեշտ փաստաթղթերը կցելու համար այցելե՛ք այստեղ։

Ընդունելության ծառայությունների համար գանձվող 3000 ՀՀ դրամի վճարման անդորրագիրը (ԵՊՀ «Արդշինբանկ» ՓԲԸ-ի 2470101276000001 հաշվեհամարին)։

Եթե փոխանցումը կատարված է առցանց տարբերակով և անդորրագրի վրա չեն երևում վճարման նպատակը և դիմորդի անուն-ազգանունը, ապա դրանք պետք է ձեռագիր ավելացնել և սկանավորել:

*ԵՊՀ 2023 թ. շրջանավարտները (դեռևս դիպլոմ չստացած) պետք է ներկայացնեն ակադեմիական տեղեկագիր՝ կնքված և ստորագրված ֆակուլտետի դեկանի կողմից, իսկ ՀՀ այլ բուհերի՝ 2023 թ. շրջանավարտները (դեռևս դիպլոմ չստացած)՝ տվյալ բուհի ռեկտորի ստորագրությամբ տեղեկանք՝ բակալավրիատի շրջանավարտ լինելու մասին, և ակադեմիական տեղեկագիր՝ կնքված և ստորագրված:

Արտասահմանյան բուհի դիպլոմ ներկայացնելու դեպքում դիմորդը դիպլոմի հետ պետք է ներկայացնի նաև Ակադեմիական փոխճանաչման և շարժունության ազգային տեղեկատվական կենտրոնից տեղեկանք՝ դիպլոմի համարժեքության մասին:

Ընդունելության, պահանջների և ժամկետների վերաբերյալ առավել մանրամասն տեղեկություններ հնարավոր է գտնել այստեղ։